ᑯᕉᓂᑲ ᓯᕗᓪᓖᑦ 17 - ᐊᒡᓔᑦ ᐃᑦᔪᕐᖕᓁᑦᑐᑦ

ᓁᑕᓂᐅᑉ ᐅᖃᕆᐊᕐᑐᕐᓂᖓ ᑍᕕᑎᒧᑦ

¹ ᑕᒪᑐᒪ ᑭᖑᕐᖓᒍᑦ ᑍᕕᑎ ᐃᒡᓗᖃᓕᕐᓗᓂ ᐊᖓᔪᖅᑳᕐᔪᐊᑉ ᐃᒡᓗᖓᓂ, ᑍᕕᑎ ᐅᖃᕐᐳᖅ ᓁᑕᓂᒧᑦ ᐊᑕᓂᐅᑉ ᐅᖃᕐᑎᖓᓄᑦ, “ᑕᑯᒋᑦ, ᐃᒡᓗᒦᑉᐳᖓ ᓰᑕᕆᓂᒃ ᕿᔪᑦᓯᐊᕚᓗᖕᓂᑦ ᓴᓇᓯᒪᔪᒥ, ᒎᑎᐅᓪᓕ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᑐᐱᕐᒦᑐᐃᓐᓇᕐᑎᓪᓗᒍ!”

² ᓁᑕᓂᓗ ᑭᐅᕗᖅ, “ᐆᒻᒪᑎᖕᓂ ᐃᓱᒪᒋᔭᓕᒫᑎᑦ ᐊᑐᑐᐃᓐᓇᒃᑭᑦ, ᒎᑎᐅᑉ ᐃᓚᒋᕚᑎᑦ.”

³ ᐅᓐᓄᒃᑎᓪᓗᒍᓕ ᑖᑦᓱᒪᓂᑦᓮᓐᓇᖅ ᐊᑕᓂᐅᑉ ᓁᑕᓂ ᐅᖃᐅᑎᕚ ᐅᖃᕐᓗᓂ,

⁴ “ᐅᐸᒡᓗᒍ ᐱᔨᒐ ᑍᕕᑎ ᐅᖃᐅᑎᔭᕐᑐᕈᒃ, ‘ᐃᒫᒃ ᐊᑕᓂᖅ ᐅᖃᕐᐳᖅ: ᓴᓇᔪᒃᓴᐅᓐᖏᓚᑎᑦ ᐃᒡᓗᒥᒃ ᓇᔪᒐᒃᓴᓐᓂᒃ.

⁵ ᐃᓴᕆᐊᓕᒥᐅᑦ ᐊᐅᓪᓚᐅᑎᓚᐅᕐᓯᒪᒐᒃᑭᑦ ᐄᑦᔨᑉᑎᒥᑦ ᐅᓪᓗᒥᒧᑦ ᑎᑭᓪᓗᒍ ᐃᓂᖃᓚᐅᕐᓯᒪᓐᖏᓚᖓ ᐃᒡᓗᒥ, ᐊᐅᓪᓚᖃᑦᑕᓚᐅᕐᐳᖓ ᐃᓂᖃᕐᓗᖓᓗ ᑐᐱᕐᒥ, ᑕᕝᕙᓂᑦᓮᓐᓇᐅᖏᑦᑐᖅ ᐃᓂᖃᖃᑦᑕᕐᓗᖓ.

⁶ ᐃᓴᕆᐊᓕᒥᐅᓕᒫᑦ ᐊᐅᓚᖃᑎᒋᓪᓗᒋᑦ ᓇᒧᑐᐃᓐᓇᖅ, ᐅᖃᓚᐅᕐᓯᒪᓐᖏᓚᖓ ᐃᓴᕆᐊᓕᒥᐅᑦ ᐃᓱᐊᕐᓮᔨᖏᓐᓄᑦ, ᑖᒃᑯᓄᖓ ᑎᓕᓚᐅᕐᑕᓐᓄᑦ ᐰᕐᓯᔨᐅᖁᓪᓗᒋᑦ ᐃᓄᖁᑎᓐᓂᒃ, ᐅᖃᕐᓗᖓ, “ᓱᒻᒪᑦ ᕿᔪᖕᒥᒃ ᓰᑕᕆᒥᒃ ᐃᒡᓗᓕᐅᓚᐅᕐᓯᒪᓐᖏᓚᑦᓯᓐᖓ?”’

⁷ “ᒫᓐᓇ ᑍᒤᒻᒪᑦ ᐅᖃᕐᑐᒃᓴᐅᕗᑎᑦ ᐱᔨᓐᓄᑦ ᑍᕕᑎᒧᑦ, ‘ᐃᒫᒃ ᕿᓚᖕᒥᐅᒐᓴᒡᔪᐃᑦ ᐊᑕᓂᖓ ᐅᖃᕐᐳᖅ, ᓰᐱᓕᕆᔨᐅᑎᓪᓗᑎᑦ ᑎᒍᓚᐅᕐᐸᒋᑦ, ᓰᐱᓂᒃ ᒪᓕᒃᑎᓪᓗᑎᑦ, ᐊᖓᔪᖅᑳᓐᖑᖁᓪᓗᑎᑦ ᐃᓄᖁᑎᓐᓄᑦ ᐃᓴᕆᐊᓕᒥᐅᓄᑦ.

⁸ ᐃᓚᒌᓐᓇᓚᐅᕐᐸᒋᑦ ᓇᒧᑐᐃᓐᓇᖅ ᐂᑎᓪᓗᑎᑦ, ᓄᖑᑎᓚᐅᕐᐸᒃᑲᓗ ᐊᑭᕋᑎᑦ ᓯᕗᓂᕐᓂ; ᐊᑏᓪᓗ ᐃᓚᒋᓕᐅᑎᓐᓂᐊᕐᐸᕋ ᐊᔪᖏᑦᑐᕐᔪᐊᓄᑦ ᓄᓇᕐᔪᐊᕐᒥ.

⁹ ᓂᕈᐊᓛᕐᐳᖓᓗ ᐃᓴᕆᐊᓕᒥᐅᑦ ᐃᓄᖁᑎᒪ ᐃᓂᒃᓴᖏᓐᓂᒃ, ᐃᓂᑖᑦᓯᐊᕐᑎᓪᓗᒋᑦ, ᓇᖕᒥᓂᖅ ᓄᓇᒥᖕᓂ ᐃᓂᖃᖁᓪᓗᒋᑦ, ᐸᒡᕕᓵᕐᑕᐅᖃᑦᑕᕈᓐᓃᕐᓗᑎᒃ; ᐋᓐᓂᕐᑎᕆᔨᓄᑦ ᐊᒡᕕᐊᑕᐅᔪᓐᓁᖁᓪᓗᒋᑦ, ᑍᑦᓱᒪᓂᐅᕙᓚᐅᕐᑐᑎᑐᑦ.

¹⁰ ᑍᑦᓱᒪᓂᐅᑎᓪᓗᒍ ᐃᓗᐊᕐᓮᔩᑦ ᑎᓕᓚᐅᕐᐸᒃᑲ ᐃᓄᖁᑎᓐᓂᒃ ᐃᓴᕆᐊᓕᒥᐅᓂᒃ ᑲᒪᔨᐅᖁᓪᓗᒋᑦ; ᐊᑭᕋᕐᑐᕐᑎᑎᓪᓗ ᓵᓚᒋᔪᒫᕐᐸᒃᑲ. ᓱᓕᓗ ᐅᖃᐅᑎᒃᑲᓐᓂᕐᐸᒋᑦ ᐊᑕᓂᐅᑉ ᐃᒡᓗᓕᐅᕈᒫᕐᐹᑎᑦ.

¹¹ ᐅᓪᓗᑎᑦ ᓈᒃᐸᑕ ᐊᑖᑕᒋᔭᑎᑦ ᐅᐸᒃᓯᒪᓕᕈᕕᒋᑦ, ᑭᖑᕚᕐᓂᑦ ᒪᑭᑎᑦᓯᔪᒫᕐᐳᖓ ᐃᓕᖕᓂᒃ ᑭᖑᕝᕖᔪᒃᓴᒥᒃ, ᓇᖕᒥᓂᖅ ᐃᕐᓂᕐᐱᑦ ᐃᓚᖓᓐᓂᒃ; ᐊᖓᔪᖅᑲᐅᕕᖓᓗ ᑲᔪᓯᑎᑦᓱᒫᕐᐸᕋ.

¹² ᑖᓐᓇ ᐅᕙᓐᓄᑦ ᐃᒡᓗᓕᐅᕈᒫᕐᐳᖅ, ᑖᑦᓱᒪᓗ ᐃᒃᓯᕙᐅᑕᕐᔪᐊᖓ ᑲᔪᓯᑎᑦᓱᒫᕐᐸᕋ ᐃᓱᖃᖏᑦᑐᒧᑦ.

¹³ ᐊᑖᑕᒋᔪᒫᕐᐹᖓ, ᐅᕙᖓᓗ ᐃᕐᓂᕆᔪᒫᕐᐸᕋ; ᓇᒡᓕᖕᓂᕋᓗ ᓱᖁᓯᔪᐃᑦᑐᖅ ᐲᕈᒫᓐᖏᓚᕋ ᑖᑦᓱᒪᓐᖓᑦ, ᓯᕗᓂᕐᓃᑦᑐᒥᒃ ᐊᕐᓵᕐᓯᓚᐅᕐᓯᒪᓂᑦᑐᑦ.

¹⁴ ᐋᖅᑭᒃᓯᒪᑎᑦᓱᒫᕐᐸᕋ ᐃᒡᓗᓐᓂ ᐊᑕᓂᐅᕕᓐᓂᓗ ᐃᓱᖃᖏᑦᑐᒧᑦ ᐃᒃᓯᕙᐅᑕᕐᔪᐊᖓᓗ ᐋᖅᑭᒃᓯᒪᔪᒫᕐᐳᖅ ᐃᓱᖃᖏᑦᑐᒧᑦ.’”

¹⁵ ᐅᖃᐅᓰᑦ ᑕᑯᑎᑦᔪᑎᓕᒫᓪᓗ ᒪᓕᒡᓗᒋᑦ, ᓁᑕᓂᐅᑉ ᑍᕕᑎ ᐅᖃᓪᓚᒡᕕᒋᓚᐅᕐᐹ.

ᑍᕕᑎᐅᑉ ᑐᒃᓯᐊᕐᓂᖓ ᖁᔭᓕᓂᕐᒧᑦ

¹⁶ ᑕᕝᕙ ᐊᖓᔪᖅᑳᕐᔪᐊᖅ ᑍᕕᑎ ᐃᑎᕋᒥ ᐃᖏᑉᐳᖅ ᐊᑕᓂᐅᑉ ᓵᖓᓄᑦ; ᐅᖃᕐᓗᓂᓗ, “ᖃᓄᐃᑦᑑᕗᖔ, ᐊᑕᓃᖅ ᒎᑏᒃ? ᐃᓚᒃᑲᓗ ᖃᓄᐃᑦᑑᕙᑦ, ᑕᒪᐅᖓ ᑎᑭᐅᑎᑎᓯᒪᓕᕋᕕᓐᖓ?

¹⁷ ᑕᒪᓐᓇ ᑕᑯᓐᓇᕐᑕᕕᑦ ᓵᖓᓂ ᒥᑭᔫᒐᓗᐊᖅ, ᒎᑏᒃ; ᐅᖃᕐᓯᒪᒐᕕᓪᓗ ᐱᔨᕕᑦ ᐃᓚᒋᔭᖏᑕ ᓯᕗᓂᕐᒥ ᐊᖏᔪᒥᒃ ᐱᕙᓪᓕᐊᓂᒃᓴᕆᔭᖏᓐᓂᒃ, ᑕᑯᑎᓯᒪᒐᕕᖓᓗ ᓯᕗᓂᒃᓴᒥ ᑭᖑᕚᕇᒃᐸᓪᓕᐊᔪᒫᕐᑐᓂᒃ, ᐊᑕᓃᖅ ᒎᑏᒃ!

¹⁸ ᖃᓄᒃᑲᓐᓃᖅ ᑍᕕᑎ ᐃᓕᖕᓄᑦ ᐅᖃᕈᓐᓇᕐᐹ ᐱᔩᑦ ᐅᐱᓐᓇᕐᓯᑎᑕᐅᖁᓗᒍ? ᐱᔩᑦ ᖃᐅᔨᒪᒐᕕᐅᒃ.

¹⁹ ᐱᔩᑦ ᐱᓪᓗᒍ, ᐊᑕᓃᖅ, ᐆᒻᒪᑎᖕᓂ ᐱᔪᒪᔧᑦ ᒪᓕᒡᓗᒍ, ᐱᐅᔪᕐᔪᐊᓂᒃ ᐱᓂᐊᕐᓯᒪᒐᕕᑦ, ᐱᐅᔪᕐᔪᐊᕌᓗᐃᓪᓗ ᖃᐅᔨᔭᐅᑎᒃᑲᕕᒋᑦ.

²⁰ ᐊᑕᓃᖅ ᐊᑦᔨᖃᓐᖏᓚᑎᑦ, ᐊᓯᖕᓂᒡᓗ ᒎᑎᑕᖃᓐᖏᓚᖅ, ᐱᓂᐊᕐᓂᕆᓚᐅᕐᑕᑎᑦ ᐱᓪᓗᒋᑦ ᓇᖕᒥᓂᖅ ᑐᓴᕐᓯᒪᔭᕗᑦ.

²¹ ᐃᓄᖁᑎᑎᑦ ᐃᓴᕆᐊᓕᒥᐅᑉ ᐃᓅᖃᑎᒌᒡᔪᐊᑦ ᓇᓪᓕᖏᓐᓂᒃ ᐊᑦᔨᖃᕐᐹᑦ ᓄᓇᕐᔪᐊᕐᒥ? ᒎᑎᐅᑉ ᐱᐅᓕᓚᐅᕐᑕᖏᑦ ᐃᓄᖁᑎᒋᔪᒪᓪᓗᒋᑦ, ᐊᑏᑦ ᖃᐅᔨᔭᐅᖁᓪᓗᒍ ᑲᒪᓇᕐᑐᕐᔪᐊᒃᑯᑦ ᐱᓂᐊᕐᓂᒃᑯᑦ, ᐃᓅᖃᑎᒋᒡᔪᐊᑦ ᐊᐅᓪᓚᕐᑎᓚᐅᕋᕕᒋᑦ ᐃᓄᖁᑎᕕᑦ ᓵᖏᓐᓂ ᑖᒃᑯᐊ ᐱᐅᓕᓚᐅᕐᑕᕕᑦ ᐄᑦᔨᑉᑎᒥ.

²² ᐃᓴᕆᐊᓕᒥᐅᑉ ᐃᓄᖁᑎᑖᕆᓚᐅᕋᕕᒋᑦ ᓇᖕᒥᓂᖅ ᐃᓄᖁᑎᒋᔪᒪᓪᓗᒋᑦ ᐃᓱᖃᖏᑦᑐᒧᑦ; ᐃᕝᕕᓪᓗ ᐊᑕᓃᖅ, ᑖᒃᑯᓄᖓ ᒎᑎᒋᔭᐅᓕᕐᓗᑎᑦ.

²³ “ᒫᓐᓇᓗ, ᐊᑕᓃᖅ, ᐅᖃᐅᓰᑦ ᐅᖃᐅᓯᕆᓚᐅᕐᑕᑎᑦ ᐱᔩᖕᓄᑦ ᐃᓚᖏᓐᓄᓪᓗ ᑲᔪᓯᓕᕐᓕᑦ ᐃᓱᖃᖏᑦᑐᒧᑦ, ᑲᔪᓯᓕᕆᓪᓗ ᐅᖃᐅᓯᕆᓚᐅᕐᑕᑎᑦ ᒪᓕᒡᓗᒋᑦ.

²⁴ ᐊᑏᓪᓗ ᑲᔪᓯᔪᒥᒃ ᐊᖏᔪᕈᕐᑎᑕᐅᖁᓪᓗᒍ ᐃᓱᖃᖏᑦᑐᒧᑦ, ᐅᖃᕐᓗᑎᒃ, ‘ᕿᓚᖕᒥᐅᒐᓴᒡᔪᐃᑦ ᐊᑕᓂᖓᑦ, ᐃᓴᕆᐊᓕᒥᐅᑦ ᒎᑎᖓᑦ, ᑖᓐᓇ ᐃᓴᕆᐊᓕᒥᐅᑦ ᒎᑎᒋᕚᑦ.’ ᐱᔩᓪᓗ ᑍᕕᑎ ᐃᓚᒋᔭᖏᓪᓗ ᑲᔪᓯᑎᑕᐅᓕᑦ ᓵᖕᓂ.

²⁵ ᐃᕝᕕᑦ ᒎᑎᒑ, ᐱᔩᑦ ᑕᑯᑎᓚᐅᕋᕕᐅᒃ ᐃᒡᓗᓕᐅᕐᓂᐊᕐᓂᕋᕐᓗᒍ; ᑍᒤᒻᒪᑦ ᐱᔩᑦ ᓴᐱᕈᓐᓃᕐᐳᖅ ᑐᒃᓯᐊᕈᒪᓪᓗᓂ ᓵᖕᓂ.

²⁶ ᒫᓐᓇᓗ ᐊᑕᓃᖅ, ᒎᑎᐅᔪᑎᑦ, ᐊᖏᕈᑎᖃᓚᐅᕐᐳᑎᑦ ᐱᔩᑦ ᐱᐅᔪᓂᒃ ᐱᓂᐊᕐᕕᒋᔪᒪᓪᓗᒍ;

²⁷ ᒫᓐᓇ ᑍᒤᒻᒪᑦ ᖁᕕᐊᒋᒍᕕᐅᒃ ᓮᒻᒪᕐᑎᓚᐅᒃᑭᑦ ᐱᔨᕕᑦ ᐃᓚᒋᔭᖏᑦ, ᑲᔪᓯᖁᓪᓗᒋᑦ ᓵᖕᓂ ᐃᓱᖃᖏᑦᑐᒧᑦ; ᐃᕝᕕᑦ ᐊᑕᓃᖅ, ᓮᒻᒪᕐᑎᑦᓯᒪᔭᑎᑦ ᑖᒃᑯᐊ ᓮᒻᒪᕐᑎᑕᐅᓯᒪᓂᐊᕐᒪᑕ ᐃᓱᖃᖏᑦᑐᒧᑦ.”