ᑯᕉᓂᑲ ᓯᕗᓪᓖᑦ 16 - ᐊᒡᓔᑦ ᐃᑦᔪᕐᖕᓁᑦᑐᑦ1 ᒎᑎᐅᓪᓗ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖁᑎᖓ ᐃᑎᕐᑎᓐᓇᒥᑦᔪᒃ, ᑐᐱᕐᒧᐊᕈᑎᕚᑦ ᑍᕕᑎᐅᑉ ᓇᑉᐸᓚᐅᕐᑕᖓᓄᑦ, ᑐᓂᕐᕈᓯᕐᓗᑎᒡᓗ ᑐᓂᕐᕈᑎᓂᒃ ᐆᑕᒃᓴᓂᒃ ᑐᓂᕐᕈᑎᓂᒡᓗ ᖁᔭᓕᑦᔪᑎᒃᓴᓂᒃ ᒎᑎᐅᑉ ᓵᖓᓂ. 2 ᑍᕕᑎᐅᓪᓗ ᑐᓂᕐᕈᑏᑦ ᐆᑕᒃᓴᑦ ᑐᓂᕐᕈᑏᓪᓗ ᖁᔭᓕᑦᔪᑎᒃᓴᑦ ᑐᓂᔭᕇᕋᒥᒋᑦ, ᐃᓄᒋᐊᒃᑐᕐᔪᐊᑦ ᓮᒻᒪᕐᑎᑉᐰᑦ ᐊᑕᓂᐅᑉ ᐊᑎᖓᓂ. 3 ᐂᑐᕐᑐᐃᓪᓗᓂᓗ ᐃᓴᕆᐊᓕᒥᐅᓕᒫᓄᑦ, ᐊᖑᑎᓄᑦ ᐊᕐᓇᓄᓪᓗ, ᐊᑐᓂᑦ ᓂᐊᖂᔭᒥᒃ, ᓂᖅᑭᒥᒡᓗ, ᐆᓯᒪᔪᓂᒡᓗ ᓂᐊᖂᔭᓂᒃ ᐸᐅᕐᖓᐅᔭᓕᖕᓂᒃ. 4 ᑎᓕᓯᒋᕗᕐᓗ ᓕᕔᑏᑦ ᐃᓚᖏᓐᓂᒃ ᐱᓇᓱᐊᕐᓂᐊᕐᑐᓂᒃ ᐊᑕᓂᐅᑉ ᐃᒃᓯᕐᕕᖁᑎᖓᑕ ᓯᕗᕌᓂ, ᖁᕕᐊᓱᖃᑎᒌᖁᓪᓗᒋᑦ, ᖁᔭᓕᓗᑎᒃ, ᓂᕐᑐᐃᓗᑎᒡᓗ ᐊᑕᓂᕐᒥᒃ, ᐃᓴᕆᐊᓕᒃᑯᑦ ᒎᑎᖓᓂᒃ. 5 ᐊᓴᐸ ᐊᖓᔪᖅᑳᖑᓚᐅᕐᐳᖅ, ᑐᖓᓕᖃᕐᓗᓂ ᓴᑲᕅᐊᒥᒃ, ᐅᑯᐊᓗ ᔨ-ᐂᓕ, ᓯᒥᕋᒫᑎ, ᔨᕼᐃᐅᓪ, ᒪᑎᑍᐊ, ᐃᓔᐊᑉ, ᐱᓁᐊ, ᐅᐱᑦ-ᐄᑕᒻᓗ, ᔨ-ᐂᓕᓗ, ᑖᒃᑯᐊ ᐊᑐᓚᐅᕐᐳᖅ ᓄᖃᕐᑎᓕᖕᓂᒃ ᕼᐊᕐᐱᓂᒡᓗ; ᐊᓴᐸ ᓯᕙᓂᕋᐅᑎᓂᒃ ᓂᓪᓕᐊᑎᑦᓯᑎᓪᓗᒍ, 6 ᐱᓁᐊᓗ ᔭᕼᐊᔨᐅᓗ ᑐᓂᕐᕈᓯᕐᑎᑦᓯᔩᒃ ᑍᒪᓐᖓᑦ ᑎᑦᑐᓚᐅᑎᓂᒃ ᓂᓪᓕᐊᑎᑦᓯᔪᒃᓴᐅᓪᓗᑎᒃ, ᒎᑎᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖁᑎᖓᑕ ᓯᕗᕌᓂ. 7 ᑖᑦᓱᒪᓂ ᐅᓪᓗᒥ ᑍᕕᑎ ᓯᕗᓪᓕᕐᐹᒥᒃ ᖁᔭᓕᑦᔪᑎᒥᒃ ᐊᑕᓂᕐᒧᑦ ᑎᓕᓯᓚᐅᕐᐳᖅ ᐃᓐᖏᖁᔨᓪᓗᓂ ᐊᓴᐸᒥᒃ ᐃᓚᖏᓐᓂᒡᓗ. ᐃᓐᖏᕈᓯᖅ ᓂᕐᑐᐃᓂᕐᒧᑦ ᐃᓐᖏᕈᑦ 105:1-15 ; 96:1-13 ; 106:1 , 47-48 8 ᐊᑕᓂᖅ ᖁᔭᒋᓯᐅᒃ, ᐊᑎᖓ ᑐᒃᓯᐊᕐᕕᒋᓗᒍ, ᐱᓂᐊᕐᓂᕆᓯᒪᔭᖏᑦ ᐅᖃᐅᓯᐅᓕᑦ ᐃᓄᖕᓄᑦ! 9 ᑖᓐᓇ ᐃᓐᖏᕐᕕᒋᓯᐅᒃ, ᓂᕐᑐᕐᓗᒍ ᐃᓐᖏᕐᕕᒋᓯᐅᒃ; ᑖᑦᓱᒪ ᑲᒪᓇᕐᑐᓕᓂᓕᒫᖏᑦ ᐅᖃᐅᓯᕆᓯᒋᒃ! 10 ᐊᑎᖓ ᐃᑦᔪᕐᓁᑦᑐᖅ ᓂᕐᑐᕐᓇᕐᓯᑎᑕᐅᓕ; ᐆᒻᒪᑎᒥᒍᑦ ᐊᑕᓂᕐᒥᒃ ᕿᓂᕐᑐᑦ ᖁᕕᐊᓱᒡᓕᑦ! 11 ᐊᑕᓂᖅ ᕿᓂᕐᓯᐅᒃ ᓲᖑᓂᖓᓗ ᕿᓂᕐᓗᒍ, ᑖᑦᓱᒪ ᓇᔫᑎᓂᖓ ᓄᖅᑲᔪᐃᓪᓗᓯ ᕿᓃᓐᓇᕐᓯᐅᒃ! 12 ᑲᒪᓇᕐᑐᓕᓃᑦ ᐱᓂᐊᕐᓂᕆᓚᐅᕐᑕᖏᑦ ᐃᖅᑲᐅᒪᓯᒋᒃ, ᓇᓗᓁᒃᑯᑍᑦ ᓴᖅᑭᑎᓚᐅᕐᑕᖏᑦ, ᐋᖅᑭᒃᓱᐃᓂᖏᓪᓗ ᐅᖃᐅᓯᒃᑯᑦ, 13 ᐱᔨᖓᓄᑦ ᐂᑉᕋᕼᐋᒧᑦ ᑭᖑᕚᖑᔪᓯ, ᔧᑰᑉ ᑭᖑᕚᖏᑦ, ᑖᑦᓱᒧᖓ ᓂᕈᐊᕐᑕᐅᓯᒪᔪᑦ! 14 ᑖᓐᓇ ᐊᑕᓂᐅᕗᖅ ᒎᑎᕗᑦ; ᑖᑦᓱᒪ ᐋᖅᑭᒃᓱᐃᓂᖓ ᓄᓇᕐᔪᐊᓕᒫᒦᑉᐳᖅ. 15 ᑖᑦᓱᒪ ᐊᖏᖃᑎᒌᒍᑎᒋᓯᒪᔭᓂ ᐃᖅᑲᐅᒪᕚ ᐃᓱᖃᖏᑦᑐᒧᑦ, ᐅᖃᐅᓰᑦ ᐱᖁᔨᓂᕆᓚᐅᕐᑕᖏᑦ ᑭᖑᕚᕆᓄᑦ ᐃᓱᖃᖏᑦᑐᒧᑦ, 16 ᐊᖏᖃᑎᒌᒍᑎᒋᓚᐅᕐᑕᓂ ᐂᑉᕋᕼᐋᒧᑦ, ᐅᖃᕕᒃᓗᓂ ᐊᖏᕈᑎᒋᓚᐅᕐᐹ ᐂᓴᑭᒧᑦ, 17 ᓇᓗᓁᒃᑲᓐᓂᓚᐅᕐᐹ ᔧᑯᒧᑦ ᐊᑐᕐᑕᐅᖁᓯᒪᔭᓂ, ᐃᓴᕆᐊᓕᒧᑦ ᐊᖏᖃᑎᒌᖕᓂᓐᖑᕐᑎᓚᐅᕐᐹ ᐃᓱᖃᖏᑦᑐᒧᑦ, 18 ᐅᖃᐅᑎᓪᓗᒍ, “ᐃᓕᖕᓄᑦ ᓄᓇ ᑬᓇᓂ ᑐᓂᓂᐊᕐᐸᕋ, ᑭᖑᕐᖑᑎᔭᒃᓴᕐᓄᑦ ᐱᑖᕆᔭᕆᐊᖃᕐᓯᒪᒐᕕᐅᒃ.” 19 ᐃᓄᒋᐊᒃᑐᕐᔪᐊᓐᖑᓚᐅᕐᑎᓐᓇᒋᑦ ᓱᓕ ᑍᑦᓱᒪᓂ, ᓄᓇᖃᓚᐅᕐᑎᓐᓇᒋᓪᓗ ᓱᓕ ᑕᒫᓂ ᓄᓇᒥ. 20 ᓅᖃᑦᑕᓚᐅᕐᒪᑕ ᐃᓅᖃᑎᒌᒡᔪᐊᓂᑦ ᐃᓅᖃᑎᒌᒡᔪᐊᓄᑦ, ᐊᖓᔪᖅᑳᕐᔪᐊᖃᕐᕕᖕᒥᑦ ᐃᓅᖃᑎᒌᒡᔪᐊᑦ ᐊᓯᖏᓐᓄᑦ, 21 ᑖᑦᓱᒪ ᓇᓪᓕᐊᓐᓄᓪᓘᓐᓃᑦ ᐅᖁᒤᒃᓴᕐᑎᑕᐅᖁᓚᐅᓐᖏᓔᑦ; ᐊᖓᔪᖅᑳᕐᔪᐊᑦ ᓱᐊᓚᐅᕐᐰᑦ ᐃᓄᖁᑎᓂ ᐱᓪᓗᒋᑦ, 22 ᐅᖃᕐᓗᓂ, “ᓂᕈᐊᕐᓯᒪᔭᒃᑲ ᐊᒃᑐᕐᓂᐊᕋᓯᒋᒃ, ᐅᖃᕐᑎᒃᑲᓗ ᐋᓐᓂᕐᓂᐊᕐᓇᒋᑦ!” 23 ᐊᑕᓂᖅ ᐃᓐᖏᕐᕕᒋᓯᐅᒃ, ᓄᓇᕐᔪᐊᕐᒥᐅᖑᔪᓯ ᑕᒪᑦᓯ! ᐱᐅᓕᔭᐅᕕᒃᓴᖃᕐᑎᑦᓯᓂᖓ ᐅᖃᐅᑎᒋᓯᐅᒃ ᖃᐅᑕᒫᑦ. 24 ᑖᑦᓱᒪ ᓂᕐᑐᕐᓇᕐᓂᖓ ᐃᓅᖃᑎᒌᒡᔪᐊᓄᑦ ᐅᖃᐅᑎᒋᓯᐅᒃ, ᑲᒪᓇᕐᑐᓕᓂᖏᓪᓗ ᐃᓅᖃᑎᒌᒡᔪᐊᓕᒫᓄᑦ! 25 ᐊᑕᓂᖅ ᐊᖏᔫᖕᒪᑦ, ᐊᖏᔪᒥᒡᓗ ᓂᕐᑐᕐᑕᐅᔪᒃᓴᐅᕗᖅ; ᓯᕘᕋᒋᔭᐅᔪᒃᓴᐅᕗᖅ ᐊᖏᓂᕐᓴᒥᒃ ᒎᑎᒋᔭᐅᔪᓕᒫᓂᑦ. 26 ᐃᓄᐃᑦ ᒎᑎᒋᔭᓕᒫᖏᑦ ᒎᑎᓐᖑᐊᖑᕗᑦ; ᐊᑕᓂᐅᓪᓕ ᕿᓔᑦ ᓴᓇᓚᐅᕐᐰᑦ. 27 ᐅᐱᓐᓇᕐᓂᖅ ᐊᖓᔪᖅᑳᕐᔪᐊᖑᓂᕐᓗ ᑖᑦᓱᒪᓃᑉᐳᑦ; ᓲᖑᓂᖅ ᖁᕕᐊᓱᖕᓂᕐᓗ ᑖᑦᓱᒪ ᐃᓂᖓᓃᑉᐳᑦ. 28 ᐊᑕᓂᖅ ᑐᓂᓯᕕᒋᓯᐅᒃ, ᐃᓚᒌᖑᔪᓯ ᐃᓅᖃᑎᒌᒡᔪᐊᓂ, ᐊᑕᓂᖅ ᑐᓂᓯᕕᒋᓯᐅᒃ ᓂᕐᑐᕐᓇᕐᓂᕐᒥᒃ ᓲᖑᓂᕐᒥᒡᓗ! 29 ᐊᑕᓂᖅ ᑐᓂᓯᕕᒋᓯᐅᒃ ᐊᑎᖓᑕ ᓂᕐᑐᕐᓇᕐᓂᖓᓂᒃ; ᑐᓂᕐᕈᑎᒃᓴᓯ ᓇᒃᓴᕐᓗᒋᑦ, ᑖᑦᓱᒧᖓ ᐂᒋᑦᓯ, ᐊᑕᓂᖅ ᑐᒃᓯᐊᕐᕕᒋᓯᐅᒃ ᐃᑦᔪᕐᓁᑦᑑᑉ ᐱᐅᓯᑎᑦᓯᓂᖓᒍᑦ! 30 ᑖᑦᓱᒪ ᓵᖓᓂ ᓴᔪᓕᕆᑦᓯ, ᓄᓇᕐᔪᐊᕐᒥᐅᓕᒫᖑᔪᓯ, ᐃᓛᒃ, ᓄᓇᕐᔪᐊᖅ ᐊᐅᓚᓐᖏᓚᖅ, ᐊᐅᓚᑎᑕᐅᔪᓐᓇᕋᓂᓗ. 31 ᕿᓔᑦ ᖁᕕᐊᓱᒡᓕᑦ, ᓄᓇᕐᔪᐊᕐᓗ ᓯᕆᓕᕐᓕ, ᐃᓅᖃᑎᒌᒡᔪᐊᓪᓗ ᐅᖃᕐᓕᑦ, “ᐊᑕᓂᖅ ᐊᐅᓚᑦᓯᕗᖅ!” 32 ᐃᒪᕕᒃ ᐃᒃᑐᑑᕐᓕ, ᐃᓗᐊᓃᑦᑐᓕᒫᓪᓗ; ᐱᕈᕐᓰᕖᑦ ᖁᕕᐊᓱᒡᓕᑦ, ᑕᕝᕙᓃᑦᑐᓕᒫᓪᓗ! 33 ᑕᕝᕙ ᓇᐹᕐᑐᐃᑦ ᕿᔪᓕᒫᓪᓗ ᐃᓐᖏᕈᒫᕐᐳᑦ ᖁᕕᐊᓱᒡᓗᑎᒃ ᐊᑕᓂᐅᑉ ᓵᖓᓂ, ᕾᓕᖕᒪᑦ ᓄᓇᕐᔪᐊᕐᒥᐅᑦ ᐱᓇᓱᐊᕐᕕᒋᔭᕐᑐᕐᓗᒋᑦ. 34 ᐊᑕᓂᖅ ᖁᔭᒋᓯᐅᒃ, ᐱᐅᔫᖕᒪᑦ; ᓇᒡᓕᖕᓂᖓ ᓱᕐᕋᔪᐃᑦᑑᖕᒪᑦ ᐃᓱᖃᖏᑦᑐᒧᑦ! 35 ᐅᖃᕐᓗᓯᓗ: “ᓴᐳᑎᑎᒍᑦ, ᒎᑎ ᐱᐅᓕᔨᕗᑦ, ᑲᑎᕐᓱᕐᓗᑕᓗ ᐱᐅᓕᑎᒍᑦ ᐃᓅᖃᑎᒌᒡᔪᐊᑦ ᐊᑯᕐᖓᓐᓂᑦ, ᐊᑎᕐᓂᒃ ᐃᑦᔪᕐᓁᑦᑐᒥᒃ ᖁᔭᓕᖁᓪᓗᑕ, ᐅᐱᒋᓗᑎᓪᓗ ᐃᓕᖕᓂᒃ ᓂᕐᑐᐃᖁᓪᓗᑕ.” 36 ᐊᑕᓂᖅ ᓂᕐᑐᕐᑕᐅᓕ, ᐃᓴᕆᐊᓕᒃᑯᑦ ᒎᑎᖓᑦ, ᐃᓱᖃᖏᑦᑐᒥᑦ ᐃᓱᖃᖏᑦᑐᒧᑦ! ᐃᓄᓕᒫᓪᓗ ᐅᖃᕐᓕᑦ, “ᐋᒦᓐ!” ᐊᑕᓂᕐᓗ ᓂᕐᑐᕐᑕᐅᓕ. ᑐᒃᓯᐊᖃᑎᒌᖕᓃᑦ ᔨᕉᓴᓕᒥ ᒋᐱᐊᒥᓗ 37 ᑕᕝᕙ ᑍᕕᑎᐅᑉ ᐊᓴᐸ ᐃᓚᒋᔭᖏᓪᓗ ᑕᕝᕗᖓ ᕿᒪᒃᐰᑦ ᐊᑕᓂᐅᑉ ᐊᖏᖃᑎᒌᒍᑎᖓᑕ ᐃᒃᓯᕐᕕᖓᑕ ᓵᖓᓄᑦ ᑲᔪᓯᓗᑎᒃ ᐱᓇᓱᐊᖁᓪᓗᒋᑦ ᐃᒃᓯᕐᕕᐅᑉ ᓵᖓᓂ, ᖃᐅᑕᒫᑦ ᐱᔭᕆᐊᖃᕐᓂᑎᑦ ᒪᓕᒡᓗᒋᑦ; 38 ᐅᐱᑦ-ᐃᑐᒻᓗ ᐃᓚᒋᔭᖏᓪᓗ 68 ᐃᓚᒋᓪᓗᒋᑦ, ᐅᐱᑦ-ᐄᑕᒻᓗ, ᔨᑐᑕᓂᐅᑉ ᐃᕐᓂᖓ, ᕼᐅᓴᓗ ᐃᑎᕐᑕᕐᕕᖕᒥ ᑲᒪᔨᐅᑎᑕᐅᕗᑦ. 39 ᔭᑑᒃ ᑐᓂᕐᕈᓯᕐᑎᑦᓯᔨ, ᐃᓚᒋᔭᖏᓪᓗ ᑐᓂᕐᕈᓯᕐᑎᑦᓯᔩᑦ, ᐊᑕᓂᐅᑉ ᑐᐱᖓᓃᑉᐳᑦ ᐃᑦᔪᕐᓁᑦᑐᒥ ᒋᐱᐅᓂᒥ, 40 ᑐᓂᕐᕈᓯᖃᑦᑍᓐᓇᖁᓪᓗᒋᑦ ᐆᑕᒃᓴᓂᒃ ᐊᑕᓂᕐᒧᑦ ᑐᓂᕐᕈᓯᕐᕕᖕᒥ ᐅᓪᓛᒃᑯᑦ ᐅᓐᓄᒃᑯᓪᓗ, ᐊᑕᓂᐅᑉ ᐱᖁᔭᖏᑦ ᑎᑎᕋᕐᓯᒪᔪᑦ ᒪᓕᒡᓗᒋᑦ ᐱᖁᔨᓂᕆᓚᐅᕐᑕᖏᑦ ᐃᓴᕆᐊᓕᒥᐅᓕᒫᓄᑦ; 41 ᐃᓚᖃᕐᓗᑎᒃ ᕼᐃᒪᓐᒥᒃ ᔨᑐᑕᓐᒥᒡᓗ ᐊᓯᖏᓐᓂᒡᓗ ᓂᕈᐊᕐᑕᐅᓯᒪᔪᓂᒃ, ᑎᓕᔭᐅᓯᒪᔪᑦ ᐊᑎᖏᑎᒍᑦ ᖁᔭᓕᖁᓪᓗᒋᑦ ᐊᑕᓂᕐᒧᑦ, ᓇᒡᓕᖕᓂᖓ ᓱᕐᕋᔪᐃᑦᑑᖕᒪᑦ ᐃᓱᖃᖏᑦᑐᒧᑦ. 42 ᕼᐃᒪᓐ ᔨᑐᑕᓐᓗ, ᓂᐱᖅᑯᕐᑐᓪᓗᑎᒃ ᓂᓪᓕᐊᑎᑦᓯᓚᐅᕐᐳᑦ ᑎᑦᑐᓚᐅᑎᓂᒃ ᓯᕙᓂᕋᐅᑎᓂᒡᓗ ᓂᑦᔮᑎᑦᓯᓪᓗᑎᒃ ᐃᓐᖏᕈᓯᕐᓂᒃ ᐃᑦᔪᕐᓁᑦᑐᓂᒃ. ᔨᑐᑕᐅᑉ ᐃᕐᓂᖏᑦ ᓇᐅᑦᓯᕐᑐᕐᑎᐅᑎᑕᐅᑎᓪᓗᒋᑦ ᐃᑎᕐᑕᕐᕕᖕᒥ. 43 ᑕᕝᕙ ᐃᓄᓕᒫᑦ ᐊᑐᓂᑦ ᐊᖏᕐᕋᓕᓚᐅᕐᐳᑦ ᐃᒡᓗᒥᖕᓄᑦ, ᑍᕕᑎᓗ ᐊᖏᕐᕋᕐᐳᖅ ᐃᒡᓗᒥᓄᑦ ᐃᒡᓗᒥᐅᖃᑎᓂ ᓮᒻᒪᕐᑎᑦᓴᕐᑐᕐᓗᒋᑦ. |
Eastern Arctic Inuktitut Bible © Canadian Bible Society, 2012, 2021-2023.
Canadian Bible Society