ᑯᕉᓂᑲ ᓯᕗᓪᓖᑦ 15 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖏᖃᑎᒌᖕᓂᐅᑉ ᐃᒃᓯᕐᕕᖓᑕ ᐊᑐᐃᓐᓇᕈᕐᑎᕐᑕᐅᓂᖓ ᓅᑕᐅᔪᒪᓪᓗᓂ

¹ ᑍᕕᑎ ᐃᒡᓗᓕᐅᓚᐅᕐᐳᖅ ᐃᒡᓗᒃᓴᒥᓂᒃ ᑍᕕᑎᐅᑉ ᐃᒡᓗᒐᓴᖏᓐᓂ; ᐃᓂᒃᓴᓕᐅᕐᐳᕐᓗ ᒎᑎᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓄᑦ, ᑐᐱᕐᒥᒡᓗ ᓇᑉᐰᕗᖅ ᑖᑦᓱᒪ ᐃᓂᒃᓴᖓᓂᒃ.

² ᑍᕕᑎᓗ ᐅᖃᕐᐳᖅ, “ᒎᑎᐅᑉ ᐃᒃᓯᕐᕕᖁᑎᖓ ᑭᓇᑐᐃᓐᓇᒧᑦ ᐊᒡᔭᕐᑕᐅᔪᒃᓴᐅᓐᖏᓚᖅ ᓕᕔᑎᓄᑦ ᑭᓯᐊᓂ, ᑖᒃᑯᐊ ᐊᑕᓂᐅᑉ ᓂᕈᐊᕐᓯᒪᖕᒪᒋᑦ ᐊᑕᓂᐅᑉ ᐃᒃᓯᕐᕕᖁᑎᖓᓂᒃ ᑲᒪᔨᐅᖁᓪᓗᒋᑦ ᐃᓱᖃᖏᑦᑐᒧᑦ.”

³ ᑍᕕᑎᐅᓪᓗ ᐃᓴᕆᐊᓕᒥᐅᓕᒫᑦ ᑲᑎᑎᑦᐰᑦ ᔨᕉᓴᓕᒧᑦ, ᐊᑕᓂᐅᑉ ᐃᒃᓯᕐᕕᖁᑎᖓ ᑎᑭᐅᑦᔭᐅᖁᓪᓗᒍ ᐃᓕᔭᐅᖁᓪᓗᒍᓗ ᐃᓂᖓᓄᑦ, ᐃᓂᒃᓴᓕᐊᕆᓚᐅᕐᑕᒥᓄᑦ.

⁴ ᑍᕕᑎᐅᓪᓗ ᐂᕉᓂᐅᑉ ᑭᖑᕚᖏᑦ ᓕᕔᑏᓪᓗ ᑲᑎᖁᕔᑦ:

⁵ ᑯᕼᐋᑎᐅᑉ ᐃᕐᓂᖏᑦ, ᔪᕅᐅᓪᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ ᐃᓚᐅᑎᓪᓗᒋᑦ 120ᐅᔪᑦ;

⁶ ᒥᕋᕆᐅᑉ ᐃᕐᓂᖏᑦ, ᐊᓮᐊᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ 220ᐅᔪᑦ;

⁷ ᒌᕐᓲᒻ ᐃᕐᓂᖏᑦ, ᔪᐃᓕᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ 130ᐅᔪᑦ;

⁸ ᐃᓔ-ᓴᐸᓇᐅᑉ ᐃᕐᓂᖏᑦ, ᓯᒤᐊᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ 200ᐅᔪᑦ;

⁹ ᕼᐃᐸᕋᓂᐅᑉ ᐃᕐᓂᖏᑦ, ᐃᓔᐅᓪᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ 80ᐅᔪᑦ;

¹⁰ ᐊᑦᔧᐆᑉ ᐃᕐᓂᖏᑦ, ᐊᐱᓇᑕᑉᒥᒃ ᐊᖓᔪᖅᑳᓖᑦ, ᐃᓚᒋᔭᖏᓪᓗ 112ᐅᔪᑦ.

¹¹ ᑕᕝᕙ ᑍᕕᑎᐅᑉ ᔭᑑᒡᓗ ᐊᐰᐊᑕᓗ ᑐᓂᕐᕈᓯᕐᑎᑦᓯᔩᒃ ᕾᖁᕔᑦ, ᓕᕔᑏᓪᓗ, ᔪᕅᐅᓪ, ᐊᓮᐊ, ᔪᐃᓕ, ᓯᒤᐊ, ᐃᓔᐅᓪ, ᐊᒥᓇᑕᑉᓗ.

¹² ᐅᖃᐅᑎᓪᓗᒋᓪᓗ, “ᐃᓕᑦᓯ ᐊᖓᔪᖅᑳᖑᒐᑦᓯ ᐊᑖᑕᑦᓯ ᐃᓚᒋᔭᖏᓐᓂ ᓕᕔᑎᓂ; ᐃᑦᔪᕐᓁᓕᑎᕆᑦᓯ, ᐃᓚᒋᔭᓯᓗ, ᐂᒃᓯᕈᓐᓇᖁᓪᓗᓯ ᐊᑕᓂᐅᑉ ᐃᓴᕆᐊᓕᒥᐅᑦ ᒎᑎᖓᑕ ᐃᒃᓯᕐᕕᖁᑎᖓᓂᒃ, ᐃᓕᔭᐅᖁᓪᓗᒍ ᐃᓂᒃᓴᖓᓄᑦ ᐊᑐᐃᓐᓇᕈᓚᐅᕐᑕᓐᓄᑦ.

¹³ ᐱᒋᐊᓕᕐᑎᓪᓗᑕ ᓯᕗᓪᓕᕐᒥᒃ ᐊᒡᔭᕐᓯᓚᐅᖏᓐᓇᑦᓯ, ᐊᑕᓂᐅᑉ ᒎᑎᑦᑕ ᓱᒋᐊᓚᐅᕐᐹᑎᒍᑦ, ᖃᐅᔨᒋᐊᓚᐅᖏᓐᓂᑦᑎᓐᓄᑦ ᑖᑦᓱᒥᖓ ᖃᓄᐃᓕᐅᕐᓗᑕ ᐱᓇᓱᐊᕆᐊᖃᕐᓂᑦᑎᓐᓂᒃ.”

¹⁴ ᑕᕝᕙ ᑐᓂᕐᕈᓯᕐᑎᑦᓯᔩᑦ ᓕᕔᑏᓪᓗ ᐃᒻᒥᖕᓂᒃ ᐃᑦᔪᕐᓁᓕᑎᕐᐳᑦ ᐊᑕᓂᐅᑉ ᐃᓴᕆᐊᓕᒥᐅᑉ ᒎᑎᖓᑕ ᐃᒃᓯᕐᕕᖁᑎᖓᓂᒃ ᐂᒃᓯᕈᓇᖁᓪᓗᒋᑦ.

¹⁵ ᓕᕔᑏᓪᓗ ᒎᑎᐅᑉ ᐃᒃᓯᕐᕕᖁᑎᖓ ᐃᕐᓱᒃᐹᑦ ᐊᑭᕋᐅᑎᖏᑎᒍᑦ, ᒨᓯᓯ ᑍᒫᒃ ᐱᖁᔨᓯᒪᖕᒪᑦ ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ.

¹⁶ ᑍᕕᑎᐅᑉ ᓕᕔᑏᑦ ᓯᕗᓕᕐᑎᖏᑦ ᐅᖃᐅᑎᒋᕔᑦ ᐃᓚᒋᔭᒥᖕᓂᑦ ᑎᓕᓯᖁᓪᓗᒋᑦ ᐃᓐᖏᕐᑎᒃᓴᓂᒃ ᑖᒃᑯᐊ ᓂᑦᔭᐅᓯᔭᖁᓪᓗᒋᑦ ᓄᖃᕐᑎᓕᖕᓄᑦ, ᕼᐅᕐᐱᓄᑦ, ᑯᑭᑦᑕᐸᐅᑎᓄᓪᓗ ᓯᕙᓂᕋᐅᑎᓄᓪᓗ, ᓂᐱᖅᑯᕐᑐᓗᑎᒃ ᖁᕕᐊᓱᒡᓗᑎᒃ ᓂᓪᓕᐊᖁᓪᓗᒋᑦ.

¹⁷ ᑕᕝᕙ ᓕᕔᑏᑦ ᑎᓕᓯᕗᑦ ᕼᐃᒪᓐᒥᒃ ᔪᐃᓕᐅᑉ ᐃᕐᓂᖓᓂᒃ; ᐃᓚᒋᔭᖏᓐᓂᒡᓗ, ᐊᓴᐸᒥᒃ ᐱᕆᑬᐊᑉ ᐃᕐᓂᖓᓂᒃ; ᒥᕋᕆᐅᓪᓗ ᐃᕐᓂᖏᓐᓂᒃ, ᐃᓚᒋᔭᖏᓐᓂᒡᓗ, ᐃᑖᓐᒥᒃ ᑯᓮᐊᐅᑉ ᐃᕐᓂᖓᓂᒃ;

¹⁸ ᐃᓚᖃᕐᓗᑎᒃ ᐃᓚᒋᓐᓂᒃ ᑎᓕᔭᐅᒋᓪᓗᑎᒃ: ᓴᑲᕅᐊ, ᔮ-ᐊᔨᐅᓪ, ᓯᒥᕋᒫᑎ, ᔨᕼᐃᐅᓪ, ᐆᓐᓂ, ᐃᓔᐊᑉ, ᐱᓁᐊ, ᒫ-ᐊᓯᐊ, ᒪᑍᑎᐊ, ᐃᓕᕕᓕᕼᐅ, ᒥᒃᓁᐊᓗ, ᐅᒃᑯᐊᓕᕆᔩᓪᓗ ᐅᐱᑦ-ᐄᑕᒻ, ᔨ-ᐂᓕᓗ.

¹⁹ ᐃᓐᖏᕐᑎᖃᕐᓗᑎᒃ ᐅᑯᓂᖓ, ᕼᐃᒪᓐ, ᐊᓴᐸ, ᐃᑖᓐᒥᒡᓗ, ᓯᕙᓂᐅᑎᓂᒡᓗ ᑲᓐᓄᔭᓂᒃ ᓂᓪᓕᐊᑎᑦᓯᔪᒃᓴᐅᓪᓗᑎᒃ;

²⁰ ᓴᑲᕅᐊ, ᐊᔧ-ᐃᐅᓪ, ᓯᒥᕋᒫᑎ, ᔨᕼᐃᐅᓪ, ᐆᓐᓂ, ᐃᓔᐊᑉ, ᒫ-ᐊᓯᐊ, ᐱᓁᐊᓗ, ᓄᖃᕐᑎᓕᖕᓂᒃ ᕼᐊᕐᐱᓂᒃ ᐊᑐᑦᑐᒃᓴᐅᓪᓗᑎᒃ ᐊᓚᒨᑎ ᒪᓕᒡᓗᒍ;

²¹ ᐅᑯᐊ ᒪᑎᑍᐊ, ᐃᓕᕕᓕᕼᐅ, ᒥᒃᓁᐊ, ᐅᐱᑦ-ᐄᑕᒻ, ᔨ-ᐂᓕ, ᐊᔭᔧᐊᓗ ᓄᖃᕐᑎᓕᖕᓄᑦ ᐊᑐᕐᑐᒃᓴᐅᕗᑦ ᓯᕗᓕᕐᓗᑎᒃ ᓯᒤᓂᑎᒥᒃ ᒪᓕᒡᓗᑎᒃ;

²² ᓯᓇᓁᐊ, ᓯᕗᓕᕐᑎᐅᔪᖅ ᓕᕔᑎᓄᑦ ᓂᑦᔭᐅᓯᔭᕐᓂᕐᒧᑦ, ᑖᓐᓇ ᐊᐅᓚᑦᓯᔪᒃᓴᐅᕗᖅ ᓯᕗᓕᕐᓗᓂ ᓂᓪᓕᐊᔪᓂᒃ, ᑕᒪᑐᒥᖓ ᖃᐅᔨᒪᖕᒪᑦ;

²³ ᐱᕆᑬᐊ ᐃᐅᓪᑳᓇᓗ ᑲᒪᔨᐅᔪᒃᓴᐅᓪᓗᑎᒃ ᐊᖏᕈᑕᐅᓯᒪᔪᑦ ᐃᒃᓯᕐᕕᖁᑎᖓᑕ ᒪᑐᖓᓂᒃ;

²⁴ ᓯᐸᓁᐊ, ᔫᓴᐸᑦ, ᓇᑖᓂᐅᓪ, ᐊᒪᓮ, ᓴᑲᕅᐊ, ᐱᓁᐊ, ᐃᓔᓯᕆᓗ, ᑐᓂᕐᕈᓯᕐᑎᑦᓯᔩᑦ, ᑎᑦᑐᓚᐅᑎᓂᒃ ᓂᓪᓕᕐᑎᑦᓯᔪᒃᓴᐅᓪᓗᑎᒃ ᒎᑎᐅᑉ ᐃᒃᓯᕐᕕᖁᑎᖓᑕ ᓯᕗᓂᖓᓂ; ᐅᐱᑦ-ᐄᑕᒻ ᔨᕼᐂᐊᓗ ᐊᖏᕈᑕᐅᓯᒪᔪᑦ ᐃᒃᓯᕐᕕᖁᑎᖓᓂᒃ ᖃᐅᔨᓴᕐᑎᐅᔪᒃᓴᐅᓪᓗᑎᒃ.

²⁵ ᑍᒤᒻᒪᑦ ᑍᕕᑎ ᐃᓴᕆᐊᓕᒥᐅᓪᓗ ᐊᖓᔪᖅᑳᖏᑦ, ᐅᓇᑕᕐᑎᓄᓪᓗ ᐊᖓᔪᖅᑳᑦ ᑕᐅᓴᓐᑎᓄᑦ, ᐂᒃᓯᓕᕐᐳᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓂᒃ ᐅᐱᑦ-ᐄᑕᒥᐅᑉ ᐃᒡᓗᖓᓂᑦ ᖁᕕᐊᓱᒡᓗᑎᒃ.

²⁶ ᒎᑎᐅᓪᓗ ᐃᑲᔪᓚᐅᕐᒪᒋᑦ ᓕᕔᑏᑦ ᐊᒡᔭᕐᓯᔪᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓᓂᒃ, ᑐᓂᕐᕈᓯᓚᐅᕐᐳᑦ ᑐᒃᑐᕙᖕᓂᒃ 7ᓂᒃ ᓰᐲᓪᓗ ᐊᖑᓴᓪᓗᖏᓐᓂᒃ 7ᓂᒃ.

²⁷ ᑍᕕᑎ ᐊᓐᓄᕌᕐᓯᒪᓚᐅᕐᐳᖅ ᐅᓕᖕᒥᒃ ᖃᓪᓗᓈᕐᑕᒥᒃ ᓵᑦᑐᒥᒃ, ᓕᕔᑎᓕᒫᓪᓗ ᐊᑭᕋᕐᑐᑦ ᐊᑕᓂᐅᑉ ᐊᖏᖃᑎᒌᒍᑎᖏᑕ ᐃᒃᓯᕐᕕᖓᓂᒃ ᑍᒤᑦᑐᓂᒃ ᐊᑐᓚᐅᕆᕗᑦ, ᐃᓐᖏᕐᑏᓪᓗ, ᓂᑦᔭᐅᓯᔭᕐᓂᕐᒧᓪᓗ ᐊᖓᔪᖅᑳᖓᑦ ᓯᓇᓁᐊ; ᑍᕕᑎᓗ ᓴᒡᕕᖕᒥᐅᑕᒥᒃ ᖃᓪᓗᓈᕐᑕᒥᒃ ᓵᑦᑐᒥᒃ ᐊᑐᓚᐅᕆᕗᖅ.

²⁸ ᑕᕝᕙ ᐃᓴᕆᐊᓕᒥᐅᓕᒫᑦ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᔨᕉᓴᓕᒧᐊᕈᑎᓕᓚᐅᕐᐹᑦ ᖁᕕᐊᓱᖕᓂᕐᒧ ᕾᒐᓛᕐᓗᑎᒃ, ᑎᑦᑐᓛᕐᓗᑎᒃ, ᓱᐴᒐᕐᓗᑎᒃ, ᓯᕙᓂᕋᐅᑎᓂᒡᓗ ᓂᓪᓕᐊᑎᑦᓯᓪᓗᑎᒃ, ᓄᖃᕐᑎᓕᖕᓄᑦ ᕼᐊᕐᐱᓄᓪᓗ ᓂᑦᔭᐅᓯᔭᕐᓗᑎᒃ ᓂᐱᖅᑯᕐᑐᓪᓗᑎᒃ.

²⁹ ᐊᑕᓂᐅᑉ ᐊᖏᖃᑎᒌᖕᓂᕐᒧᑦ ᐃᒃᓯᕐᕕᖓ ᑍᕕᑎᐅᑉ ᑎᑭᐅᑦᔭᐅᓕᕐᑎᓪᓗᒍ, ᒤᑲᐅᓪ ᓴᐅᓕᐅᑉ ᐸᓂᖓ ᐃᒐᓛᒃᑯᑦ ᐃᑦᑐᐊᕋᒥ, ᐊᖓᔪᖅᑳᕐᔪᐊᖅ ᑍᕕᑎ ᑕᑯᕚ ᑖᓂᓯᕐᑎᓪᓗᒍ ᖁᕕᐊᓱᖕᓂᕐᒧᓪᓗ ᕿᒡᒋᖃᕐᑕᕐᑎᓪᓗᒍ; ᑖᑦᓱᒪ ᐆᒻᒪᑎᒥᒍᑦ ᓇᕐᕈᒋᓕᕐᐹ.