ᑯᕉᓂᑲ ᓯᕗᓪᓖᑦ 12 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᒪᓕᒃᑎᖏᑦ ᐱᓐᔭᒥᓂᐅᑉ ᑭᖑᕚᖏᓐᓂᑦ

¹ ᐅᑯᐊ ᑕᕝᕙ ᐊᖑᑏᑦ ᑍᕕᑎᒧᐊᓚᐅᕐᑐᑦ ᔨᒡᓛᒡᒦᑎᓪᓗᒍ, ᓇᒧᑐᐃᓐᓈᕈᓐᓇᕋᓂ ᕿᒪᐅᖅᑲᑎᓪᓗᒍ ᓴᐅᓕᒥᑦ ᑭᔅ ᐃᕐᓂᖓᓂᑦ; ᑖᒃᑯᐊᓗ ᐊᔪᖏᑦᑐᕐᔪᐊᖑᖃᑕᐅᓚᐅᕐᐳᑦ ᐃᑲᔪᖃᑦᑕᓚᐅᕐᑐᑦ ᐅᓇᑕᕐᑎᓪᓗᒋᑦ.

² ᐱᓯᒃᓯᓖᑦ, ᖃᕐᔪᓄᑦ ᐱᓯᒋᐊᕈᓐᓇᕐᑐᑦ, ᐃᓪᓘᕆᐊᕈᓐᓇᕐᑐᑦ ᑕᓕᕐᐱᖕᒥᖕᓄᑦ ᓴᐅᒥᖕᒥᖕᓄᓪᓗ; ᐱᓐᔭᒥᓂᒃᑯᓐᓂᑦ ᐱᓯᒪᔪᑦ, ᓴᐅᓕᐅᑉ ᐃᓚᒋᔭᖏᑦ.

³ ᐊᖓᔪᖅᑳᖓᑦ ᐊᕼᐂᓱᕆ, ᐊᒻᒪ ᔪᐊᓯ, ᓯᒪᐅᑉ ᒋᐱᐊᒥᐅᑕᐅᑉ ᐃᕐᓂᖏᒃ; ᔨᓯᐅᓗ ᐱᓕᑦᓗ ᐊᔾᒪᕕᑎᐅᑉ ᐃᕐᓂᖏᒃ; ᐱᕌᑲ, ᔨᕼᐆᓗ ᐊᓇᑑᑎᐅᑉ ᐃᕐᓂᖏᒃ,

⁴ ᐃᓯᒤᐊ ᒋᐱᐅᓂᒥᐅᑕᖅ, ᐊᔪᖏᑦᑐᕐᔪᐊᖑᖃᑕᐅᔪᖅ 30ᓄᑦ ᐊᖓᔪᖅᑳᖑᓪᓗᓂᓗ ᑖᒃᑯᓄᖓ; ᔨᕆᒤᐊ, ᔭᕼᐊᔨᐅᓪ, ᔪᕼᐋᓇᓐ, ᔫᓴᐸᓪᓗ ᒋᑎᕋᒥᐅᑕᖅ.

⁵ ᐃᓗᓮ, ᔨᕆᒪᑎ, ᐲᓔᐊ, ᓯᒪᕅᐊ, ᓯᕚᑍᐊᓗ ᕼᐊᕈᐰᒥᐅᑕᖅ;

⁶ ᐃᐅᓪᑳᓇ, ᐃᓮᐊ, ᐊᔭᕆᐅᓪ, ᔪᐃᔨᕆ, ᔭᓱᐱᐊᒻᓗ, ᑰᕋᕼᐂᑎᒥᐅᑕᖅ;

⁷ ᔪᐃᓚ, ᔨᐸᑍᐊᓗ, ᔨᕈᕼᐋᒻ ᒋᑐᐊᕆᒥᐅᑕᐅᑉ ᐃᕐᓂᖏᒃ.

ᑍᕕᑎᐅᑉ ᒪᓕᒃᑎᖏᑦ ᒑᑦ ᑭᖑᕚᖏᓐᓂᑦ

⁸ ᒑᑎᒥᐅᓂᑦ ᐃᓚᓕᐅᑎᔪᖃᓚᐅᕆᕗᖅ ᑍᕕᑎᒧᑦ ᐱᔭᐅᑦᑍᓕᕕᖓᓂ ᐃᓄᖃᔪᐃᑦᑐᒥ ᐊᔪᖏᑦᑐᕐᔪᐊᓂᒃ ᓯᕘᕋᖏᑦᑐᓂᒃ, ᐅᓇᑕᓕᒪᑦᓯᐊᕐᑐᓂᒃ, ᓴᐴᓗᑕᕐᓂᒃ ᑲᓗᒋᐊᓂᒡᓗ ᐊᑐᕆᐊᒃᓴᖅ ᖃᐅᔨᒪᑦᓯᐊᕐᑐᓂᒃ, ᑮᓇᖏᑦ ᓛᔭᑎᑐᑦ ᑕᐅᑦᑐᓕᖕᓂᒃ, ᑐᒃᑑᔮᕐᑐᑎᑐᓪᓗ ᖃᖅᑲᒥᐅᑕᑎᑐᑦ ᐊᐅᓚᑦᔭᑦᑎᐊᕆᒃᑎᒋᔪᓂᒃ:

⁹ ᐊᖓᔪᖅᑳᖓᑦ ᐃᔨᕆ, ᑐᖓᓕᐊ ᐅᐸᑍᐊ, ᐱᖓᔪᐊᑦ ᐃᓔᐊᑉ,

¹⁰ ᓯᑕᒪᖓᑦ ᒥᔅᒪᓐᓇ, ᑕᓪᓕᒪᖓᑦ ᔨᕆᒤᐊ,

¹¹ ᐱᖓᓲᔪᕐᑐᖓᑦ ᐊᑦᑍ, 7ᖓᑦ ᐃᓔᐅᓪ,

¹² ᓯᑕᒪᐅᔪᕐᑐᖓᑦ ᔪᕼᐋᓇᓐ, 9ᖓᑦ ᐃᐅᓪᔭᐸᑦ,

¹³ ᖁᓕᖓᑦ ᔨᕆᒤᐊ, 11ᖓᑦ ᒫᑲᐹᓐᓁ.

¹⁴ ᑖᒃᑯᐊ ᒑᑦ ᑭᖑᕚᖏᑦ ᐅᓇᑕᕐᑐᒃᓴᓂ ᐊᖓᔪᖅᑳᕆᔭᐅᕗᑦ, ᖃᑦᓰᓐᓇᐅᓂᕐᐹᓄᑦ ᐊᖓᔪᖅᑳᖑᔪᑦ 100ᓄᑦ ᑲᒪᓪᓗᑎᒃ, ᐅᓄᕐᓂᕐᐹᓄᑦ ᐊᖓᔪᖅᑳᖑᔪᑦ 1,000ᓄᑦ ᑲᒪᓪᓗᑎᒃ.

¹⁵ ᑖᒃᑯᐊ ᑕᕝᕙ ᔪᐊᕐᑕᓂᐅᑉ ᑰᖓᓂᒃ ᐃᑳᓚᐅᕐᑐᑦ ᑕᖅᑭᐅᑉ ᓯᕗᓪᓕᕐᐹᖓᓂ, ᑰᓕᒫᑦᓯᐊᖅ ᖄᒥᓯᒪᑎᓪᓗᒍ ᐳᒃᑭᓐᓂᖓᓃᑦᑐᓪᓗ ᓴᓂᕌᓃᑦᑐᓕᒫᑦ ᐅᓗᑦᔭᐅᓯᒪᑎᓪᓗᒋᑦ, ᓇᕐᓴᒦᑦᑐᓕᒫᓪᓗ ᐅᓇᑕᕐᓗᒋᑦ ᕿᒫᑎᑉᐰᑦ, ᓯᕿᓂᐅᑉ ᓄᐃᕕᐊᓂᑦ ᓂᐱᕕᐊᓄᑦ.

ᑍᕕᑎᐅᑉ ᒪᓕᒃᑎᖏᑦ ᐱᓐᔭᒥᓂᒃᑯᓐᓂᑦ ᔫᑕᒃᑯᓐᓂᓪᓗ

¹⁶ ᐱᓐᔭᒥᓂᒃᑯᑦ ᔫᑕᒃᑯᓪᓗ ᐃᓚᖏᑦ ᐅᐸᒍᑎᓚᐅᕐᐳᑦ ᑍᕕᑎᒧᑦ ᐱᔭᐅᑦᑍᓕᕕᖓᓃᑎᓪᓗᒍ.

¹⁷ ᑍᕕᑎᐅᓪᓗ ᐸᕐᕆᐊᕐᓗᒋᑦ ᑲᑎᒐᒥᒋᑦ ᐅᖃᐅᑎᕔᑦ, “ᕾᒍᑦᓯ ᐃᓚᓐᓈᖃᕈᒪᓗᓯ ᐃᑲᔪᕆᐊᕈᑦᓯ ᐅᕙᓐᓂᒃ, ᐆᒻᒪᑎᒐ ᐊᑕᐅᓯᓐᖑᖃᑕᐅᓂᐊᕐᐳᖅ ᐃᓕᑦᓯᓐᓄᑦ, ᐊᑭᕋᓐᓄᓪᓕ ᐱᔭᐅᒃᑬᔭᕐᑐᕈᑦᓯ, ᑕᒻᒪᓚᐅᖏᒃᑲᓗᐊᕐᑎᓪᓗᖓ, ᐊᑖᑕᑦᑕ ᒎᑎᖓᑕ ᑕᑯᓐᓇᕐᒪᓯ ᓱᒋᐊᕐᓂᐊᕐᐹᓯ.”

¹⁸ ᑕᕝᕙ ᐊᓂᕐᓂᐅᑉ ᐊᒪᓮ ᑎᑭᕝᕕᒋᕚ, ᐊᖓᔪᖅᑳᖑᔪᖅ 30ᓄᑦ, ᐅᖃᕐᓗᓂᓗ, “ᐃᓕᖕᓄᑦ ᐱᒋᔭᐅᕗᒍᑦ, ᑍᕕᑏ; ᐃᓕᖕᓂᒡᓗ ᐃᓕᖃᕐᐳᒍᑦ, ᔨᓯᐅᑉ ᐃᕐᓂᖓ! ᓮᒻᒪᕐᑎᑕᐅᒋᑦ, ᓮᒪᓂᐅᓪᓗ ᓇᔪᕐᓕᑎᑦ, ᐃᑲᔪᕐᑎᑎᓪᓗ ᓮᒻᒪᕐᑎᑕᐅᓕᑦ! ᒎᑎᕕᑦ ᐃᑲᔪᕐᒫᑎᑦ.” ᑕᕝᕙ ᑍᕕᑎᐅᑉ ᐃᓚᓕᐅᕐᐰᑦ, ᐊᖓᔪᖅᑳᓐᖑᕐᑎᓪᓗᒋᓪᓗ ᐅᓇᑕᕐᑐᒃᓴᖁᑎᒥᓄᑦ.

ᒫᓇᓯᐅᑉ ᑭᖑᕚᖏᓐᓂᑦ ᒪᓕᒃᑎᖏᑦ

¹⁹ ᒫᓇᓯᐅᑉ ᑭᖑᕚᖏᑕ ᐃᓚᖏᑦ ᐃᓚᓕᐅᑎᓚᐅᕐᐳᑦ ᑍᕕᑎᒧᑦ ᐱᓕᔅᑍᓂᒥᐅᓂᒃ ᐃᓚᖃᕐᓗᓂ ᐅᓇᑕᕆᐊᕐᑎᓪᓗᒍ ᓴᐅᓕᒥᒃ. ᑍᕕᑎᐅᓪᓕ ᐃᑲᔪᓚᐅᓐᖏᓔᑦ, ᐱᓕᔅᑍᓂᒥᐅᑦ ᐊᖓᔪᖅᑳᖏᑕ ᐊᐅᓪᓚᕐᑎᓚᐅᕐᒪᒋᑦ ᐅᖃᖃᑎᒌᒃᓗᑎᒃ ᐅᖃᓚᐅᕐᒪᑕ, “ᐃᓚᓕᐅᑎᑐᐃᓐᓇᕆᐊᖃᕐᒪᑦ ᐊᖓᔪᖅᑳᒥᓄᑦ ᓴᐅᓕᒧᑦ ᐅᕙᑦᑎᓐᓄᑦ ᑲᑉᐱᐊᓇᕐᓯᓗᓂ.”

²⁰ ᔨᒡᓛᒡᒧᐊᕐᑎᓪᓗᒍ ᒫᓇᓯᐅᑉ ᑭᖑᕚᖏᑦ ᑍᕕᑎᒧ ᐃᓚᓕᐅᑎᓚᐅᕐᑐᑦ ᐅᑯᐊᖑᕗᑦ: ᐋᑦᓇ, ᔫᓴᐸᑦ, ᔨᑎᐊ-ᐃᐅᓪ, ᒤᑯ, ᔫᓴᐸᑦ, ᐃᓕᕼᐅ, ᔨᓕᑍᓗ, ᐊᖓᔪᖅᑳᖑᔪᑦ ᑕᐅᓴᓐᑎᓄᑦ ᒫᓇᓯᒥᓐᖔᕐᑐᓄᑦ.

²¹ ᑖᒃᑯᐊ ᑍᕕᑎᒥᒃ ᐃᑲᔪᓚᐅᕐᐳᑦ ᐊᕐᓵᕐᑎᕆᔨᓂᒃ ᐅᓇᑕᕐᑎᓪᓗᒍ; ᐊᔪᖏᑦᑐᕐᔪᐊᖏᓐᓇᐅᒐᒥᒃ ᓯᕘᕋᓇᑎᒃ, ᐊᖓᔪᖅᑳᖑᓪᓗᑎᒡᓗ ᐅᓇᑕᕐᑐᒃᓴᓄᑦ.

²² ᖃᐅᑕᒫᑦ ᐊᖑᑏᑦ ᑍᕕᑎᒧᑦ ᐃᓚᓕᐅᑎᕙᓪᓕᐊᖏᓐᓇᓚᐅᕐᐳᑦ ᐃᑲᔪᕆᐊᕐᓗᑎᒃ, ᐊᔪᖏᑦᑐᕐᔪᐊᖑᓪᓗᑎᒃ ᐅᓄᕐᓯᔪᐊᓘᓚᐅᕐᐳᑦ ᐅᓇᑕᕐᑐᒃᓴᕐᔪᐊᖑᓕᕐᓗᑎᒃ, ᒎᑎᐅᑉ ᐅᓇᑕᕐᑐᒃᓴᖁᑎᖏᑎᑐᑦ.

ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᕼᐃᑉᐸᕌᓐᒦᑦᑐᑦ

²³ ᐅᑯᐊ ᑕᕝᕙ ᓈᓴᕐᑕᐅᓯᒪᔪᑦ ᐊᕕᒃᑐᕐᓯᒪᔪᑦ ᐅᓇᑕᕐᑐᒃᓮᑦ, ᑍᕕᑎᒧᐊᓚᐅᕐᑐᑦ ᕼᐃᐸᕋᓐᒧᑦ, ᓴᐅᓕᐅᑉ ᐊᖓᔪᖅᑲᐅᕕᖓ ᑐᓂᔭᕐᑐᕐᓗᒍ ᑖᑦᓱᒧᖓ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ.

²⁴ ᔫᑕᐅᑉ ᑭᖑᕚᖏᓐᓂᑦ ᓴᐴᓗᑕᓖᑦ ᑲᓗᒋᐊᖃᕐᓗᑎᒡᓗ, 6,800ᐅᕗᑦ ᐅᓇᑕᕐᑐᒃᓮᑦ;

²⁵ ᓯᒥᐅᓂᐅᑉ ᑭᖑᕚᖏᓐᓂᑦ, ᐊᖑᑏᑦ ᐊᔪᖏᑦᑐᑦ ᓯᕘᕋᖏᑦᑐᑦ ᐅᓇᑕᕐᓂᕐᒥᒃ, 7,100ᐅᕗᑦ;

²⁶ ᓕᕔᑉ ᑭᖑᕚᖏᓐᓂᑦ 4,600ᐅᕗᑦ;

²⁷ ᔨᕼᐅᐃᐊᑕ ᓯᕗᓕᕐᑎᐅᔪᖅ ᐂᕉᓂᒃᑯᓐᓂᑦ ᐱᓯᒪᔪᖅ, ᐃᓚᖃᕐᐳᖅ 3,700ᓂᒃ;

²⁸ ᔭᑑᒃ, ᐃᓅᓱᒃᑐᖅ ᓯᕘᕋᖏᑦᑐᖅ ᐅᓇᑕᕐᑎ, ᐊᑖᑕᖏᑕ ᐃᓚᖏᓐᓂᑦ ᐱᓯᒪᔪᓂᒃ ᐃᓚᖃᕐᓗᓂ 22ᓂᒃ ᐊᖓᔪᖅᑳᖑᔪᓂᒃ.

²⁹ ᐱᓐᔭᒥᓂᐅᑉ ᑭᖑᕚᖏᓐᓂᑦ, ᓴᐅᓕᐅᑉ ᐃᓚᒋᔭᖏᑦ, 3,000ᐅᕗᑦ, ᐅᓄᕐᓂᕐᓮᓪᓕ ᐱᓐᔭᒥᓂᐅᑉ ᑭᖑᕚᖏᑦ ᓴᐅᓕᒥᒃ ᐃᑲᔪᕐᑐᓚᐅᕐᐳᑦ;

³⁰ ᐃᕗᕅᒥᐅᑉ ᑭᖑᕚᖏᓐᓂᑦ 20,800ᐅᕗᑦ, ᐊᔪᖏᑦᑐᑦ ᐊᖑᑏᑦ ᓯᕘᕋᖏᑦᑐᑦ, ᐊᔪᖏᑦᑐᖁᑎᒋᔭᐅᑦᓯᐊᕐᑐᖅ ᐊᑖᑕᖏᑕ ᐃᓚᖏᓐᓂᑦ.

³¹ ᒫᓇᓯᐅᑉ ᑭᖑᕚᖏᑕ ᐊᕝᕙᖏᓐᓂᑦ 18,000ᐅᕗᑦ, ᐊᑎᖏᑎᒍᑦ ᑎᓕᔭᐅᓚᐅᕐᑐᑦ ᑍᕕᑎᒥᒃ ᐊᖓᔪᖅᑳᕐᔪᐊᓐᖑᕐᑎᑦᓯᖁᓪᓗᒋᑦ;

³² ᐃᓴᑳᕆᐅᑉ ᑭᖑᕚᖏᑦ ᑍᑦᓱᒪᓂᐅᑎᓪᓗᒍ ᑐᑭᓯᐅᒪᓚᐅᕐᐳᑦ ᐃᓴᕆᐊᓕᒃᑯᑦ ᖃᓄᐃᓕᐅᕐᑐᒃᓴᐅᖕᒪᖔᑕ, ᐊᖓᔪᖅᑳᖏᑦ 200ᐅᕗᑦ, ᐃᓚᒋᔭᓕᒫᖏᓪᓗ ᓈᓚᑦᓯᐊᓚᐅᕐᐳᑦ ᐊᖓᔪᖅᑲᖏᑕ ᐱᖁᔨᓂᖏᓐᓂᒃ;

³³ ᓯᐳᓗᓂᐅᑉ ᑭᖑᕚᖏᓐᓂᑦ 50,000ᐅᕗᑦ ᐅᓇᑕᕐᑏᑦ, ᐅᓇᑕᕐᓂᕐᒧᑦ ᐊᑐᐃᓐᓇᐅᑦᓯᐊᕐᑐᑦ ᓱᓇᓕᒫᓂᒡᓗ ᐅᓇᑕᐅᑎᖃᑦᓯᐊᕐᓗᑎᒃ, ᑍᕕᑎᒥᒃ ᐃᑲᔪᕆᐊᓚᐅᕐᐳᑦ ᐊᑕᐅᓯᐅᓕᖅᑲᖓᑦᓯᐊᕐᑐᒥᒃ ᓯᕗᓂᖃᕐᓗᑎᒃ.

³⁴ ᓈᑉᑕᓕᐅᑉ ᑭᖑᕚᖏᓐᓂᑦ 1,000ᓮᑦ ᐊᖓᔪᖅᑳᑦ ᐃᓚᖃᕐᓗᑎᒃ 37,000ᓂᒃ ᓴᐴᓗᑕᓕᖕᓂᒃ ᑲᓗᒋᐊᓕᖕᓂᒡᓗ.

³⁵ ᑖᓐ ᑭᖑᕚᖏᓐᓂᑦ 28,600ᐅᕗᑦ ᐅᓇᑕᕐᓂᕐᒧᑦ ᐊᑐᐃᓐᓇᐅᑦᓯᐊᕐᑐᑦ;

³⁶ ᐋᓱᕆᒥᑦ ᐱᓯᒪᔪᑦ ᐋᖅᑭᒃᓯᒪᑦᓯᐊᕈᓐᓇᕐᑐᑦ 40,000ᐅᕗᑦ ᐅᓇᑕᕆᐊᕐᓂᕐᒧᑦ ᐊᑐᐃᓐᓇᐅᔪᑦ;

³⁷ ᕉᐱᓂᒥᐅᑦ ᒑᑎᒥᐅᓪᓗ ᒫᓇᓯᐅᓪᓗ ᑭᖑᕚᖏᑕ ᐊᕝᕙᖏᓐᓂᑦ ᔪᐊᕐᑕᓂᐅᑉ ᑰᖓᑕ ᐊᑭᐊᓃᓐᖔᕐᓯᒪᔪᑦ, 120,000ᐅᕗᑦ ᐅᓇᑕᐅᑎᓖᑦ ᖃᓄᐃᑦᑐᑐᐃᓐᓇᓂᒃ ᐅᓇᑕᐅᑎᓂᒃ ᐊᑐᕈᓐᓇᕐᑐᑦ.

³⁸ ᑖᒃᑯᐊ ᐊᖑᑎᓕᒫᑦ ᐅᓇᑕᕈᓐᓇᕐᑐᑦ, ᐅᓇᑕᕐᓂᕐᒥᓗ ᐋᖅᑭᒃᓯᒪᔪᓐᓇᕐᑐᑦ, ᕼᐃᐸᕋᓐᒧᐊᓚᐅᕐᐳᑦ ᑍᕕᑎᒥᒃ ᐊᖓᔪᖅᑳᕐᔪᐊᓐᖑᕐᑎᑦᓯᔪᒪᓪᓗᑎᒃ ᐃᓴᕆᐊᓕᒥᐅᓕᒫᓄᑦ; ᐃᓴᕆᐊᓕᒥᐅᓪᓗ ᐊᓯᓕᒫᖏᑦ ᐊᑕᐅᓯᐅᓕᖅᑲᖓᑦᓯᐊᓚᐅᕐᐳᑦ ᑍᕕᑎ ᐊᖓᔪᖅᑳᕐᔪᐊᓐᖑᖁᓪᓗᒍ.

³⁹ ᑍᕕᑎᓗ ᐅᐸᒃᓯᒪᓚᐅᕐᐹᑦ ᐅᓪᓗᓂᒃ ᐱᖓᓱᓂᒃ, ᓂᕆᓪᓗᑎᒃ ᐃᒥᕐᓗᑎᒡᓗ, ᐃᓚᒋᔭᖏᑕ ᐊᑐᐃᓐᓇᕈᓚᐅᕐᑕᖏᓐᓂᒃ.

⁴⁰ ᓱᓕ ᑖᒃᑯᐊ ᖃᓂᒋᔭᖓᓃᑦᑐᑦ ᐃᓴᑳᕆᒥᑦ, ᓯᐳᓗᓂᒥᓪᓗ ᓈᑉᑕᓕᒥᓪᓗ, ᓂᕿᒃᓴᓂᒃ ᑐᔪᐃᓚᐅᕐᐳᑦ ᓯᐅᑎᖅᑯᕐᑐᔪᒃᑯᑦ ᑳᒥᓕᒃᑎᒍᓪᓗ ᓯᐅᑎᖅᑯᕐᑐᔪᐃᑦ ᕿᒻᒥᕐᔪᐊᓪᓗ ᕿᑐᕐᖓᖏᑎᒍᑦ ᐃᒻᒧᒃᓯᐅᒊᓪᓗ ᐊᖑᓴᓪᓗᖏᑎᒍᑦ, ᓂᕆᔭᒃᓴᓂᒃ ᖃᓄᐃᑦᑐᑐᐃᓐᓇᕐᓂᒃ, ᐸᐅᕐᖓᓂᒃ ᐱᒋᓕᖕᓂᒃ ᐆᓯᒪᔪᓂᒃ, ᐸᐅᕐᖓᐅᔭᓂᒃ, ᕔᓂᒥᒡᓗ ᐅᕐᓱᒥᒡᓗ, ᑐᒃᑐᕙᖕᓂᒃ ᓰᐱᓂᒡᓗ ᐅᓄᕐᑐᕐᔪᐊᓂᒃ, ᖁᕕᐊᓱᖃᑎᒌᓚᐅᕐᐳᓪᓗ ᐃᓴᕆᐊᓕᒥᐅᑦ.