ᑯᕉᓂᑲ ᓯᕗᓪᓖᑦ 11 - ᐊᒡᓔᑦ ᐃᑦᔪᕐᖕᓁᑦᑐᑦ

ᑍᕕᑎᐅᑉ ᐊᖓᔪᖅᑳᕐᔪᐊᓐᖑᕐᓂᖓ ᐃᓴᕆᐊᓕᒧᑦ ᔫᑕᒧᓪᓗ

¹ ᑕᕝᕙ ᐃᓴᕆᐊᓕᒥᐅᓕᒫᑦ ᑍᕕᑎᒧᐊᕐᐳᑦ ᕼᐃᐸᕋᓐᒧᑦ ᐅᖃᕐᓗᑎᒡᓗ, “ᑕᑯᒋᑦ, ᓴᐅᓂᖃᑎᒋᕙᑦᑎᒋᑦ ᐅᕕᓂᖃᑎᒋᓪᓗᑎᓪᓗ.

² ᑍᑦᓱᒪᓂ, ᓴᐅᓕ ᐊᖓᔪᖅᑳᕐᔪᐊᖑᑎᓪᓗᒍ, ᐃᓴᕆᐊᓕᐅᑉ ᐃᓄᖏᑦ ᐅᓇᑕᕐᓂᒃᑯᑦ ᑕᓯᐅᓚᐅᕐᐸᑎᑦ, ᐊᑕᓂᐅᓪᓗ ᒎᑎᕕᑦ ᐅᖃᐅᑎᓚᐅᕐᐹᑎᑦ, ‘ᐃᓄᖁᑎᓐᓄᑦ ᐃᓴᕆᐊᓕᓄᑦ ᐰᕐᓯᔨᐅᔪᒫᕐᐳᑎᑦ, ᐊᖓᔪᖅᑳᖑᔪᒫᕐᐳᑎᓪᓗ ᐃᓄᖁᑎᓐᓄᑦ ᐃᓴᕆᐊᓕᓄᑦ.’”

³ ᑍᒤᒻᒪᑦ ᐃᓴᕆᐊᓕᐅᑉ ᐊᖓᔪᖅᑳᖏᑦ ᐊᖓᔪᖅᑳᕐᔪᐊᕐᒧᐊᓚᐅᕐᐳᑦ ᑍᕕᑎᒧᑦ ᕼᐃᐸᕋᓐᒧᑦ; ᑍᕕᑎᐅᓪᓗ ᐊᖏᖃᑎᒌᒍᑎᓕᐅᖃᑎᒋᕔᑦ ᕼᐃᐸᕋᓐᒥ ᐊᑕᓂᐅᑉ ᓵᖓᓂ, ᑖᒃᑯᐊᓗ ᐅᕐᓱᒧᑦ ᒥᖑᐊᕐᐹᑦ ᐊᖓᔪᖅᑳᕐᔪᐊᓐᖑᖁᓪᓗᒍ ᐃᓴᕆᐊᓕᓄᑦ, ᐊᑕᓂᐅᑉ ᐅᖃᐅᓯᖏᑦ ᒪᓕᒡᓗᒋᑦ ᓴᒧᐃᓕᒃᑯᑦ.

⁴ ᑍᕕᑎᓗ ᐃᓴᕆᐊᓕᒥᐅᓕᒫᓪᓗ ᔨᕉᓴᓕᒧᐊᕐᐳᑦ, ᑍᔭᐅᔪᒥᒃ ᔨᐳᓯᒥᒃ, ᔨᐳᓮᑎᒥᐅᓄᑦ ᓄᓇᖃᑐᓄᑦ ᑕᕝᕙᓂ.

⁵ ᓄᓇᖃᕐᑐᓪᓕ ᔨᐳᓯᒥ ᑍᕕᑎ ᐅᖃᐅᑎᕚᑦ, “ᑕᕝᕗᖓ ᐃᑎᕐᑐᒃᓴᐅᓐᖏᓚᑎᑦ!” ᑍᕕᑎᐅᓪᓕ ᓮᐅᓂᐅᑉ ᐱᔭᐅᑦᑍᓕᕕᖓ ᓵᓚᒋᕚ, ᑕᕝᕙ, ᑍᕕᑎᐅᑉ ᐃᒡᓗᒐᓴᖏᑦ.

⁶ ᑍᕕᑎ ᐅᖃᕐᐳᖅ, “ᓇᓪᓕᐊᑦ ᔨᐳᓮᑎᒥᐅᓂᒃ ᓯᕗᓪᓕᕐᐸᐅᓗᓂ ᑐᖁᑦᓯᔪᖅ ᑖᓐᓇ ᐊᖓᔪᖅᑳᕈᕐᑐᒃᓴᐅᕗᖅ ᐅᓇᑕᕐᑎᓄᑦ.” ᑕᕝᕙ ᔪᐊᐱ ᔨᕈᐃᐊᐅᑉ ᐃᕐᓂᖓ ᒪᔪᕋᕐᓗᓂ ᓯᕗᓪᓕᕐᐸᐅᕗᖅ, ᑍᒤᒻᒪᑦ ᐅᓇᑕᕐᑎᓄᑦ ᐊᖓᔪᖅᑳᓐᖑᕐᑎᑕᐅᕗᖅ.

⁷ ᑍᕕᑎᓕ ᐱᔭᐅᑦᑍᓕᕕᖕᒥ ᐊᖏᕐᕋᖃᕐᐳᖅ; ᑍᒤᒻᒪᑦ ᑍᔭᐅᓕᓚᐅᕐᐳᖅ ᑍᕕᑎᐅᑉ ᐃᒡᓗᒐᓴᖏᓐᓂᒃ.

⁸ ᐃᒡᓗᒐᓴᓕᐅᕐᐳᕐᓗ ᐊᕙᑖᓂ, ᓄᓇᓕᖕᓂᑦ ᒥᓗᒥᑦ ᐱᒋᐊᕐᓗᒍ ᖃᓂᒋᔭᖓᓃᑦᑐᓂᒡᓗ ᐊᕙᓗᓯᓯᒪᔪᓂᒃ; ᔪᐊᐱᐅᓪᓗ ᐃᒡᓗᒐᓮᑦ ᐊᓯᖏᑦ ᐋᖅᑭᒃᓱᑦᓯᐊᕐᐰᑦ.

⁹ ᑍᕕᑎᓗ ᑲᔪᓯᔪᒥᒃ ᐊᔪᕈᓐᓃᕐᐸᓪᓕᐊᑐᐃᓐᓇᓕᓚᐅᕐᐳᖅ, ᕿᓚᖕᒥᐅᒐᓴᒡᔪᐃ ᐊᑕᓂᖓᑕ ᐃᓚᒋᓚᐅᕐᒪᒍ.

ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᑲᐅᔨᒪᔭᐅᑦᓯᐊᕐᑐᑦ

¹⁰ ᐅᑯᐊ ᑕᕝᕙ ᑍᕕᑎᐅᑉ ᐅᓇᑕᕐᑐᒃᓴᖁᑎᖏᑦ ᐊᖓᔪᖅᑳᑦ ᐊᔪᖏᑦᑐᕐᔪᐊᖑᓚᐅᕐᑐᑦ, ᐱᔪᓐᓇᕐᓯᑎᑦᓯᓚᐅᕐᑐᑦ ᑖᑦᓱᒪ ᐊᖓᔪᖅᑲᐅᕕᖓᓂᒃ, ᐊᑕᐅᑦᓯᒃᑯᑦ ᐃᓴᕆᐊᓕᒥᐅᓕᒫᑦ ᑲᑐᑦᔨᓪᓗᑎᒃ, ᐊᖓᔪᖅᑳᕐᔪᐊᓐᖑᕐᑎᑦᓯᓚᐅᕐᑐᑦ, ᐊᑕᓂᐅᑉ ᐅᖃᐅᓯᖏᑦ ᐃᓴᕆᐊᓕᓄᑦ ᒪᓕᒡᓗᒋᑦ.

¹¹ ᐅᑯᐊ ᐊᖑᑏᑦ ᐊᔪᖏᑦᑐᕐᔪᐊᖑᓚᐅᕐᑐᑦ ᑍᕕᑎᐅᑉ ᐅᓇᑕᕐᑎᖏᑦ: ᔭᓱᐱ-ᐊᒻ, ᕼᐊᑯᒧᓁᑎᐅᑉ ᐃᕐᓂᖓ, ᐱᖓᓱᓄᑦ ᐊᖓᔪᖅᑳᕆᔭᐅᓚᐅᕐᑐᖅ; ᖃᓗᒋᐊᓂ ᐊᑐᕐᓗᒍ ᑐᖁᑦᓯᓚᐅᕐᑐᖅ 300ᓂᒃ ᐅᓇᑕᕐᓂᕐᒥ ᐊᑕᐅᓯᕐᒥ.

¹² ᑖᑦᓱᒪ ᑐᖓᓕᖓ ᐃᓕᓯᕆ ᑐᑑᑉ ᐃᕐᓂᖓ ᐊᕼᐅᕼᐂᒥᐅᑕᖅ, ᑖᓐᓇ ᐃᓚᒋᔭᐅᕗᖅ ᐱᖓᓱᓄᑦ ᐊᔪᖏᑦᑐᕐᔪᐊᓄᑦ ᐊᖑᑎᓄᑦ.

¹³ ᑖᓐᓇ ᑍᕕᑎᒥᒃ ᐃᓚᖃᓚᐅᕐᐳᖅ ᐹᔅ-ᑕᒥᒻᒥ ᑕᕝᕙᓂ ᐱᓕᔅᑍᓂᒥᐅᑦ ᑲᑎᓪᓗᑎᒃ ᐅᓇᑕᕆᐊᕐᓯᒪᑎᓪᓗᒋᑦ. ᐅᓇᑕᓚᐅᕐᐳᑦ ᓂᐊᖂᔭᒃᓴᓕᖕᒥ ᐹᕐᓕᒥᒃ, ᑕᕝᕙᓐᖓᑦ ᐃᓴᕆᐊᓕᑎᑦ ᕿᒪᒃᓯᓚᐅᕐᐳᑦ ᐱᓕᔅᑍᓂᒥᐅᓂᒃ.

¹⁴ ᑖᓐᓇᓕ ᕿᒪᒃᓯᓇᓂ ᐃᓂᒥᓂ ᓱᕐᕋᓚᐅᓐᖏᓚᖅ, ᐱᕈᕐᓰᕕᐅᑉ ᕿᑎᖓᓂ ᓴᐳᓐᓂᐊᕐᓗᓂ, ᐱᓕᔅᑍᓂᒥᐅᓪᓗ ᑐᖁᓚᐅᕐᐰᑦ; ᐊᑕᓂᐅᓪᓗ ᐱᐅᓕᓚᐅᐰᑦ ᓵᓚᒃᓴᕕᒡᔪᐊᕐᑎᓪᓗᒋᑦ ᑕᕝᕙᓂ.

¹⁵ ᑖᒃᑯᐊ ᐱᖓᓱᑦ 30ᓂᑦ ᐅᓇᑕᕐᑎᓂᑦ ᐊᖓᔪᖅᑳᓂᑦ ᐃᓚᒋᔭᐅᓪᓗᑎᒃ ᐅᐸᒍᑎᓚᐅᕐᓯᒪᕗᑦ ᑍᕕᑎᒧᑦ ᕾᕈᓱᖕᒦᑦᑐᒧᑦ ᐊᑑᓚᒻᒥᒃ ᐊᑎᓕᖕᒧᑦ; ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖏᑦ ᑕᖕᒫᕐᓯᒪᑎᓪᓗᒋᑦ ᕆᐰᒻᒥ ᓇᕐᓴᒥ.

¹⁶ ᑍᕕᑎᓗ ᑕᕝᕙᓂ ᐱᔭᐅᑦᑍᓕᕕᖕᒥᓃᓚᐅᐳᖅ; ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖃᕐᕕᖕᒥᓃᑎᓪᓗᒋᑦ ᐱᑦᓕᐊᒻᒥ.

¹⁷ ᑍᕕᑎᓗ ᐃᒥᑦᓯᐊᒥᒃ ᐃᒥᕈᓪᓕᕐᓱᓂ ᐅᖃᓚᐅᕐᓯᒪᕗᖅ, “ᐃᒥᕐᑎᑕᐅᓚᐅᕐᓚᖓᑐᖅ ᐃᒥᕐᑕᕐᕕᖕᒥᑦ ᐱᑦᓕᐊᒻ ᐃᑎᕐᑕᕐᕕᐊᑕ ᓴᓂᐊᓃᑦᑐᒥᑦ!”

¹⁸ ᑖᒃᑯᐊ ᐊᖑᑏᑦ ᐱᖓᓱᑦ ᐊᔪᖏᑦᑐᐊᓗᐃᑦ ᐱᓕᔅᑍᓂᒥᐅᑦ ᐅᓇᑕᕐᑐᒃᓴᖏᑎᒎᕐᓗᑎᒃ, ᐃᒥᕐᑕᕐᕕᖕᒥᑦ ᐃᒥᕐᑕᓚᐅᕐᓯᒪᕗᑦ ᐱᑦᓕᐊᒻᒥᑦ ᐃᑎᕐᑕᕐᕕᐅᑉ ᓴᓂᐊᓃᑦᑐᒥᑦ, ᑐᓂᓪᓗᒍᓗ ᑍᕕᑎᒧᑦ. ᑍᕕᑎᐅᓪᓕ ᐃᒥᕈᒪᓚᐅᓐᖏᓛ; ᑯᕕᓚᐅᕐᐹᓕ ᐊᑕᓂᕐᒧᑦ.

¹⁹ ᐅᖃᕐᓗᓂᓗ, “ᐃᒥᕈᓐᓇᓐᖏᑕᕋᐅᓇ ᒎᑎᐅᑉ ᓵᖓᓂ. ᐃᒥᕈᓐᓇᕐᐳᖔ? ᑖᒃᑯᐊ ᐊᖑᑏᑦ ᐊᐅᖏᓐᓂᒃ ᐊᑭᖃᕋᔭᕐᑐᒥᒃ? ᑐᖁᓐᓇᕐᑐᒦᓚᐅᕐᓂᖏᑦ ᐱᓪᓗᒋᑦ.” ᑍᒤᒻᒪᑦ ᐃᒥᕈᒪᓚᐅᓐᖏᓛ. ᑍᒫᒃ ᑖᒃᑯᐊ ᐊᖑᑏᑦ ᐊᔪᖏᑦᑐᕐᔪᐊᑦ ᐱᓂᐊᕐᓂᖃᓚᐅᕐᓯᒪᕗᑦ.

²⁰ ᐊᐱᓮ, ᔪᐊᐱᐅᑉ ᓄᑲᖓ ᐊᖓᔪᖅᑳᕆᔭᐅᓛᐅᕐᐳᖅ ᐊᖓᔪᖅᑳᓄᑦ 30ᓄᑦ. ᑖᑦᓱᒪ ᐅᓈᓂ ᐊᑐᕐᓗᒍ 300ᓂᒃ ᐊᖑᑎᓂᒃ ᑐᖁᑦᓯᓚᐅᕐᓯᒪᕗᖅ, ᑍᒤᒻᒪᑦ ᖃᐅᔨᒪᔭᐅᒻᒪᕆᓕᓚᐅᕐᐳᖅ ᑖᒃᑯᑎᑐᓇᑦ ᐱᖓᓱᑎᑐᑦ.

²¹ ᐅᐱᒋᔭᐅᓂᕐᓴᐅᓚᐅᕐᐳᖅ ᑖᒃᑯᓇᓐᖓᑦ 30ᓂᑦ, ᑖᒃᑯᓄᖓᓗ ᐊᖓᔪᖅᑳᕐᑖᕆᔭᐅᓪᓗᓂ; ᐱᖓᓱᓄᓪᓕ ᐊᔪᖏᑦᑐᕐᔪᐊᓄᑦ ᑍᔭᐅᖃᑕᐅᓯᒪᓚᐅᓐᖏᓚᖅ.

²² ᐱᓁᐊᓗ ᔨᕼᐅᐃᐊᑕᐅᑉ ᐃᕐᓂᖓ, ᐊᔪᖏᑦᑐᕐᔪᐊᒧᑦ ᑲᑉᔨᐅᓪᒥᐅᑕᒧᑦ ᐃᕐᓂᕆᔭᐅᔪᖅ, ᐱᓂᐊᕐᓂᖃᓚᐅᕐᐳᖅ ᐊᖏᔪᕐᔪᐊᒥᒃ; ᑐᖁᑦᓯᓚᐅᕐᒪᑦ ᐊᖑᑏᖕᓂᒃ ᒪᕐᕉᖕᓂᒃ ᓛᔭᑎᑑᕐᑐᖕᓂᒃ ᒧᐊᐱᒥᐅᑖᖕᓂᒃ. ᑐᖁᑦᓯᓚᐅᕐᓯᒪᖕᒥᔪᖅ ᓛᔭᒥᒃ ᐃᑎᕐᓴᒦᑦᑐᒥᒃ ᖃᓐᓂᕐᑐᐊᓘᑎᓪᓗᒍ.

²³ ᐄᑦᔨᑉᑎᒥᐅᑕᒥᒡᓗ ᑐᖁᑦᓯᓚᐅᕆᕗᖅ, ᐊᖑᒻᒥᒃ ᐊᖏᔪᕐᔪᐊᕌᓗᖕᒥᒃ, ᐊᖏᓂᖃᕐᑐᒥᒃ 7ᓂᒃ ᐊᕝᕙᕐᒥᒡᓗ ᐃᑎᒐᖕᓂᒃ. ᑖᓐᓇ ᐄᑦᔨᑉᑎᒥᐅᑕᖅ ᖃᓗᒋᐊᖃᓚᐅᕐᐳᖅ ᓯᓕᒃᑐᐊᓗᖕᒥᒃ ᓄᕕᕐᓴᕐᑎᐅᑉ ᓴᓐᓂᖓᔪᖁᑎᖓᑐᑦ ᑍᒤᑦᑐᒥᒃ; ᐱᓁᐊᐅᓪᓕ ᐅᐸᓚᐅᕐᐹ ᐊᔭᐅᑉᐱᐊᓕᔭᕐᓗᓂ, ᐅᓇᑕᕐᓗᒍ ᐄᑦᔨᑉᑎᒥᐅᑕᖅ ᐅᓈᖓᓂᒃ ᐊᕐᓵᓚᐅᕐᐹ, ᑲᐱᓪᓗᓂᐅᒡᓗ ᓇᖕᒥᓂᖅ ᐅᓈᖓᓄᑦ.

²⁴ ᑕᒪᒃᑯᐊ ᐱᓁᐊᐅᑉ ᔨᕼᐅᐃᐊᑕᐅᑉ ᐃᕐᓂᖓᑕ ᐱᓂᐊᕐᓂᕆᓚᐅᕐᐰᑦ, ᑖᓐᓇᑦᑕᐅᖅ ᖃᐅᔨᒪᔭᐅᑦᓯᐊᓕᓚᐅᕐᐳᖅ ᑖᒃᑯᑎᑐᓇᖅ ᐊᔪᖏᑦᑐᕐᔪᐊᑎᑐᑦ ᐱᖓᓱᑎᑐᑦ.

²⁵ ᐅᐱᒋᔭᐅᓂᕐᓴᐅᓚᐅᕐᐳᖅ ᐅᓇᑕᕐᑎᓂᑦ 30ᓂᑦ, ᐱᖓᓱᓄᓪᓕ ᐊᔪᖏᕐᑐᕐᔪᐊᓄᑦ ᑍᔭᐅᓯᒪᖃᑕᐅᓚᐅᓐᖏᓚᖅ. ᑍᕕᑎᐅᓪᓗ ᓴᐳᓐᓂᐊᕐᑎᒥᓄᑦ ᐊᖓᔪᖅᑳᓐᖑᕐᑎᓚᐅᕐᐹ.

²⁶ ᐅᓇᑕᕐᑎᓂ ᐊᔪᖏᑦᑐᕐᔪᐊᑦ ᐅᑯᐊᖑᕗᑦ ᐊᓴᕼᐃᐅᓪ ᔪᐊᐱᐅᑉ ᓄᑲᖓ, ᐃᐅᓪᕼᐊᓇᓐ ᑐᑑᑉ ᐃᕐᓂᖓ ᐱᑦᓕᐊᒻᒥᐅᑕᐅᑉ,

²⁷ ᓴᒻᒧᑎ ᕼᐊᕌᑦᒥᐅᑕᖅ, ᕼᐃᓕᔾ ᐱᓗᓁᑎᒥᐅᑕᖅ,

²⁸ ᐂᕋ ᐃᒃᑭᔅᓯᐅᑉ ᑎᑯᐊᒥᐅᑕᐅᑉ ᐃᕐᓂᖓ, ᐊᐰᔨᕆ ᐊᓇᑑᑎᒥᐅᑕᖅ,

²⁹ ᓯᐱᑬ ᕼᐅᓴᑍᑎᒥᐅᑕᖅ, ᓔ ᐊᕼᐅᕼᐂᒥᐅᑕᖅ,

³⁰ ᒪᕼᐊᕅ ᓂᑐᐸᕼᐊᒥᐅᑕᖅ, ᕼᐃᓕᑦ ᐹᓇᐅᑉ ᐃᕐᓂᖓ ᓂᑐᐸᒥᐅᑕᖅ,

³¹ ᐃᑍ ᕆᐰᑉ ᐃᕐᓂᖓ ᒋᐱᐊᒥᐅᑕᖅ ᐱᓐᔭᒥᓂᐅᑉ ᑭᖑᕚᖏᓐᓂᑦ, ᐱᓁᐊ ᐱᕋᑐᓁᒥᐅᑕᖅ,

³² ᕼᐅᕅ ᒑᔅ ᑰᖓᓂᒥᐅᑕᖅ, ᐊᐰᓕ ᐋᕐᐸᑍᑎᒥᐅᑕᖅ,

³³ ᐊᔾᒪᕕᑎ ᐸᕼᐊᕈᒥᐅᑕᖅ, ᐃᓔᕼᐊᐸ ᓵ-ᐊᓪᐳᓐᒥᐅᑕᖅ,

³⁴ ᕼᐊᓯᒻ ᒋᔪᓁᒥᐅᑕᖅ, ᔫᓇᑕᓂ ᓴᒋᐅᑉ ᐃᕐᓂᖓ ᕼᐊᕋᕅᑎᒥᐅᑕᐅᑉ,

³⁵ ᐊᕼᐂᐊᒻ ᓴᑲᕆᐅᑉ ᐃᕐᓂᖓ ᕼᐊᕋᕅᑎᒥᐅᑕᖅ, ᐃᓕᐸᐅᓪ ᐅᕐᕆᐅᑉ ᐃᕐᓂᖓ,

³⁶ ᕼᐃᕙᕆ ᒥᑬᕋᑍᑎᒥᐅᑕᖅ, ᐊᕼᐂᔭ ᐱᓗᓁᑎᒥᐅᑕᖅ,

³⁷ ᕼᐃᔾᕉ ᑳᕐᒥᐅᓪᒥᐅᑕᖅ, ᓈᕅ ᐃᔅᐰᑉ ᐃᕐᓂᖓ,

³⁸ ᔪᐃᓕ ᓁᑕᓂᐅᑉ ᖃᑕᓐᖑᑖ, ᒤᑉᕼᐊᕆ ᕼᐊᒐᕅᑉ ᐃᕐᓂᖓ,

³⁹ ᔨᓕᒃ ᐊᒧᓁᑎᒥᐅᑕᖅ, ᓇᕼᐊᕅ ᐱ-ᐃᕈᒥᐅᑕᖅ, ᔪᐊᐱᐅᑉ ᐅᓇᑕᐅᑎᖏᓐᓂᒃ ᑎᒍᒥᐊᕐᑎᖓ ᔨᕈᐃᐊᐅᑉ ᐃᕐᓂᖓ,

⁴⁰ ᐂᕋ ᐃᑕᕅᑎᒥᐅᑕᖅ, ᒐᕆᑉ ᐃᑕᕅᑎᒥᐅᑕᖅ,

⁴¹ ᔪᕅᐊ ᕼᐃᑍᑎᒥᐅᑕᖅ, ᔧᐹᑦ ᐊᕼᐊᓔᑉ ᐃᕐᓂᖓ,

⁴² ᐊᑍᓇ ᓰᔭᐅᑉ ᐃᕐᓂᖓ ᕉᐱᓂᒥᐅᑕᖅ, ᐊᖓᔪᖅᑳᖑᔪᖅ ᕉᐱᓂᒥᐅᑕᓄᑦ, ᐃᓚᒋᔭᐅᓪᓗᓂ 30ᓄᑦ,

⁴³ ᕼᐊᓇᓐ ᒫᑲᐅᑉ ᐃᕐᓂᖓ, ᔫᓴᐸᑦᓗ ᒥᑦᓁᒥᐅᑕᖅ,

⁴⁴ ᐅᔨᐊ ᐋᔅᑎᕌᑍᑎᒥᐅᑕᖅ, ᓵᒪ ᔨ-ᐂᓕᓗ ᕼᐅᑕᒥᐅᑉ ᐃᕐᓂᖏᒃ ᐊᕈᐃᕅᑎᒥᐅᑕᐅᑉ,

⁴⁵ ᔨᑎᐊ-ᐃᐅᓪ ᓯᒻᕆᐅᑉ ᐃᕐᓂᖓ, ᔫᕼᐊᓗ ᖃᑕᓐᖑᑎᖓ, ᑎᔧᑎᒥᐅᑖᒃ,

⁴⁶ ᐃᓔᐅᓪ ᒪᕼᐊᕔᑎᒥᐅᑕᖅ, ᔨᕆᐰᓗ, ᔫᓴᕔᐊᓗ, ᐃᐅᓪᓇᒻ ᐃᕐᓂᖏᑦ, ᐃᑦᕼᐊᒪᓗ ᒧᐊᐱᒥᐅᑕᖅ,

⁴⁷ ᐃᓔᐅᓪ, ᐅᐱᑎᓗ, ᔭ-ᐊᓯᐅᓗ ᒪᔪᐰᒥᐅᑍᑦ.