ᑯᕉᓂᑲ ᓯᕗᓪᓖᑦ 10 - ᐊᒡᓔᑦ ᐃᑦᔪᕐᖕᓁᑦᑐᑦ

ᐊᖓᔪᖅᑳᕐᔪᐊᑉ ᓴᐅᓕᐅᑉ ᑐᖁᓂᖓ

¹ ᐱᓕᔅᑍᓂᒥᐅᑉ ᐅᓇᑕᓚᐅᕐᐳᑦ ᐃᓴᕆᐊᓕᓂᒃ; ᐃᓴᕆᐊᓕᒃᑯᓪᓗ ᕿᒫᕗᑦ ᐱᓕᔅᑎᐊᒥᐅᓂᒃ, ᑐᖁᑕᐅᕗᓪᓗ ᖃᖅᑲᒥ ᒋᐅᓪᐳᐊᒥ.

² ᐱᓕᔅᑍᓂᒥᐅᓪᓕ ᒪᓕᒃᐳᑦ ᐊᔪᐃᓐᓇᕐᓗᑎᒃ ᓴᐅᓕᒥᒃ ᐃᕐᓂᖏᓐᓂᒡᓗ; ᐱᓕᔅᑎᐊᒥᐅᓂᑦ ᓴᐅᓕᐅᑉ ᐃᕐᓂᖏᑦ ᑐᖁᑕᐅᕗᑦ ᐅᑯᐊ ᔫᓇᑕᓂ, ᐊᐱᓇᑕᑉ, ᒪᓪᑭᓱᐊᓗ.

³ ᐅᓇᑕᕐᓂᖅ ᐊᒃᓱᕈᕐᓇᒻᒪᕆᓕᓚᐅᕐᐳᖅ ᓴᐅᓕᒧᑦ, ᐱᓯᒋᐊᕐᑎᓂᓪᓗ ᑕᑯᔭᐅᒐᒥ ᐱᓯᒃᑕᐅᕗᖅ ᐃᑭᓕᕐᑕᐅᓪᓗᓂ.

⁴ ᐅᓇᑕᐅᑎᒥᓂᒡᓗ ᐊᒃᔭᕐᓯᔨᒥᓄᑦ ᐅᖃᕐᐳᖅ, “ᓴᕕᒡᔪᐊᑦ ᐊᒧᓗᒍ, ᑖᑦᓱᒧᖓ ᑲᐱᓚᐅᓐᖓ, ᑭᐱᓯᒪᖏᑦᑐᑦ ᐱᓕᔅᑎᐊᒥᐅᑦ ᕾᓗᑎᒃ ᐱᓐᖑᐊᕆᓗᖓ ᐅᕙᓐᓂᒃ ᑐᖁᑦᓯᖁᓇᒋᑦ.” ᐅᓇᑕᐅᑎᓂᒡᓕ ᐊᒡᔭᕐᓯᔨᖓ ᑍᒤᓕᐅᕈᒪᓐᖏᓚᖅ; ᑲᑉᐱᐊᓱᒻᒪᕆᒃᑲᒥ. ᑍᒤᒻᒪᑦ ᓴᐅᓕ ᓴᕕᒡᔪᐊᓂ ᐊᒧᓪᓗᓂᐅᒃ, ᐹᒻᒪᒡᕕᒋᕚ.

⁵ ᐅᓇᑕᐅᑎᖏᓐᓂ ᐊᒡᔭᕐᓯᔨᖓ ᑕᑯᒐᒥ ᓴᐅᓕᒥᒃ ᑐᖁᔪᒥᒃ, ᐃᒻᒥᓂᒃᑕᐅᖅ ᓴᕕᒡᔪᐊᒥᓄᑦ ᐹᒻᒪᒃᓗᓂ ᑐᖁᒋᕗᖅ.

⁶ ᑍᒫᒃ ᑕᕝᕙ ᓴᐅᓕᑯᑦ ᐃᕐᓂᖏᓪᓗ ᐱᖓᓱᑦ ᑐᖁᓚᐅᕐᐳᑦ; ᓴᐅᓕᐅᓪᓗ ᕿᑐᕐᖓᓕᒫᓂ ᑐᖁᖃᑎᒋᓚᐅᕐᐰᑦ.

⁷ ᐃᓴᕆᐊᓕᒃᑯᓪᓗ ᓇᕐᓴᐅᑉ ᐊᑭᐊᓃᑦᑐᑦ ᑐᓴᕋᒥᒃ ᐃᓴᕆᐊᓕᒥᐅᑦ ᕿᒫᓂᖏᓐᓂᒃ ᓴᐅᓕᒃᑯᓪᓗ ᐃᕐᓂᕇᑦ ᑐᖁᑕᐅᓂᖏᓐᓂᒃ, ᐃᒡᓗᒐᓴᒥᖕᓂᒃ ᕿᒤᓐᓁᓪᓗᑎᒃ ᕿᒪᒃᓯᕗᑦ; ᐱᓕᔅᑍᓂᒥᐅᓪᓕ ᑕᕝᕗᓐᖓᕋᒥᒃ ᑕᕝᕙᓂ ᓄᓇᑖᕐᐳᑦ.

⁸ ᑲᐅᑎᓪᓗᒍ, ᐱᓕᔅᑍᓂᒥᐅᑉ ᑐᖁᑕᐅᓯᒪᔪᓂᒃ ᐊᓐᓄᕅᔧᔭᕐᑐᕐᐳᑦ, ᓇᓂᓯᕗᓪᓗ ᓴᐅᓕᒥᒃ ᐃᕐᓂᖏᓐᓂᒡᓗ ᑐᖁᖓᔪᓂᒃ ᖃᖅᑲᒥ ᒋᐅᓪᐳᐊᒥ.

⁹ ᐊᓐᓄᕅᔭᕐᐹᓪᓗ ᓂᐊᖁᐃᕐᓗᒍᓗ ᓴᐴᓗᑕᖓᓗ ᐱᕚᑦ, ᐅᖃᕆᐊᕐᑐᕐᑎᑦᓯᕗᓪᓗ ᐱᓕᔅᑍᓂᒥᐅᓕᒫᓄᑦ, ᑐᓴᕈᒥᓇᕆᔭᒥᖕᓂᒃ ᐅᖃᖁᓪᓗᒋᑦ ᒎᑎᓐᖑᐊᓄᑦ ᐃᓄᖕᓄᓪᓗ.

¹⁰ ᐅᓇᑕᐅᑎᖏᓪᓗ ᑐᒃᓯᐊᕐᕕᖁᑎᒥᓄᐊᕐᐰᑦ ᒎᑎᒥᖕᓄᓪᓗ, ᓂᐊᖁᐊᓗ ᐃᓕᕚᑦ ᑍᒐᓂᒧᑦ ᑐᒃᓯᐊᕐᕕᖕᒧᑦ.

¹¹ ᐃᓄᐃᓪᓕ ᔭᐲᓯ-ᒋᓖᑎᒦᑦᑐᑦ ᑐᓴᕋᒥᒃ ᐱᓕᔅᑍᓂᒥᐅᑦ ᐱᓂᐊᕐᓂᕆᔭᖏᓐᓂᒃ ᓴᐅᓕᒧᑦ,

¹² ᓯᕘᕋᔪᓐᓇᖏᓐᓂᕐᐹᑦ ᐊᖑᑏᑦ ᒪᑭᑉᐳᑦ, ᓴᐅᓕᐅᓪᓗ ᑎᒥᖓ ᐃᕐᓂᖏᑕᓗ ᑎᒥᖏᑦ ᑎᒍᕔᑦ, ᔭᐲᓯᒧᐊᕈᑎᓪᓗᒋᓪᓗ. ᓴᐅᓂᖏᓪᓗ ᐃᓗᕕᕐᐰᑦ ᓇᐹᕐᑑᑉ ᐆᒃ ᐊᑖᓄᑦ ᔭᐲᓯᒦᑦᑐᒧᑦ, ᓂᕆᑦᑍᓕᕗᓪᓗ ᐅᓪᓗᓂᒃ 7ᓂᒃ.

¹³ ᑕᕝᕙ ᓴᐅᓕ ᑍᒫᑦ ᑐᖁᓚᐅᕐᐳᖅ ᒪᓕᒍᓐᓃᓚᐅᕐᓂᕐᒥᓄᑦ ᐊᑕᓂᕐᒥᒃ; ᐊᑕᓂᐅᑉ ᐱᖁᔭᖏᓐᓂᒃ ᓈᓚᓚᐅᖏᓐᓇᒥ, ᑐᖁᖓᔪᓄᓪᓗ ᖃᐅᔨᓇᓱᐊᕐᑎᒧᑦ ᖃᐅᔨᓇᓱᐊᓚᐅᕐᒪᑦ ᖃᓄᐃᓕᐅᕆᐊᖃᕐᒪᖔᕐᒥ,

¹⁴ ᐊᑕᓂᕐᒥᒡᓗ ᖃᓄᐃᓕᐅᕆᐊᖃᕐᒪᖔᕐᒥ ᐊᐱᕐᓱᓚᐅᖏᒻᒪᑦ. ᑍᒤᒻᒪᑦ ᐊᑕᓂᐅᑉ ᑐᖁᑎᑉᐹ, ᐊᖓᔪᖅᑲᐅᕕᖓᓗ ᑐᓂᕚ ᑍᕕᑎᒧᑦ ᔨᓯᐅᑉ ᐃᕐᓂᖓᓄᑦ.