ZAKARIAS 9 - Elizen Arteko Biblia (Biblia en Euskara Traducción Interconfesional)

ISRAEL ETA ATZERRIKO NAZIOAK (9,1—14,21) Jaunak atzerriak zigortu eta salbatuko

¹ Jaunaren hitza Hadrak lurraldera dator, eta Damaskon gelditzen da; Jaunarena baita Siriako hiriburua, Israelgo leinuak bezala;

² baita Damasko aldameneko Hamat eta hain trebe diren Tiro eta Sidon ere.

³ Tirok gotorlekua jaso du, hautsa adina zilar pilatu du, kaleetako lokatza adina urre;

⁴ baina Jaunak biluztu egingo du, itsasora jaurtiko ditu haren ondasunak eta hiria bera suak irentsiko.

⁵ Hori ikustean, Axkelon dardaraz jarriko da, Gaza min gorritan; baita Ekron ere, bere itxaropenak huts egin baitio. Gazak erregea galduko du, Axkelonek bizilagun oro;

⁶ Axdod jende arrotzez beteko da. Honela dio Jaunak: «Horrela ezereztuko dut filistearren harrokeria;

⁷ kendu egingo diet ahotik odola darion okela, haginetatik idoloei eskainitako jakiak; hala ere, geldituko dira batzuk bizirik eta neure-neureak izango ditut, Judako leinuak bezala; Ekrongoak jebustarrak bezala izango dira.

⁸ Neure lurraldearen jagole izango naiz inguruan dabiltzan gudari-taldeen aurka; zapaltzailea ez da gehiago lurralde honetan sartuko, orain neure begiz zaintzen dut eta».

Errege apal eta bakegilea

⁹ Poztu biziro, Sion hiri eder! Egin irrintzi, Jerusalem hiriburu! Hara, badatorkizu zeure erregea: zuzen eta garaile dator, apal eta asto baten gainean, astakume baten gainean.

¹⁰ Berak hondatuko ditu Efraimgo guda-gurdiak eta Jerusalemgo zaldiak; hautsiko ditu guda-uztaiak, eta bakea iragarriko die nazioei; itsasotik itsasora aginduko du, Eufrates ibaitik lurraren bazterreraino.

Jaunak gatibuak askatu

¹¹ Honela dio Jaunak: «Zurekin odolez baietsi nuen itunarengatik, askatuko ditut zure gatibuak espetxetik, erbestetik, ur gabeko putzu horretatik.

¹² Itzuli gotorlekura, itxaropena gorde duzuen gatibuok! Hala nik gaur agindu: Ordain ugaria itzuliko dizuet.

¹³ Juda gezi-uztaia bezala tenkatuko dut eta Efraim izanen da gezi; Sion gudari-ezpata bihurtuko dut, eta haren semeak greziarren aurka jaikiaraziko ditut».

¹⁴ Jauna agertuko zaie geziak tximistak bezala jaurtiz; Jainko Jaunak turuta jo eta hego-haize beltzen artean aurrera egingo du.

¹⁵ Jaun ahalguztidunak babestuko ditu: habaila-harriz hondatuko dituzte etsaiak, ardoa bezala isuriko dute etsaien odola, isipu-ontzi beteetatik aldare-ertzetan behera jaisten den opari-odola bezala.

¹⁶ Egun hartan Jaunak, beren Jainkoak, salbatuko du bere herria, artzainak artaldea bezala; distira egingo dute herritarrek beren lurraldean, diadema bateko harribitxiek bezala.

¹⁷ Hura bai zoriona! Hura bai edertasuna! Gariak eta ardoak biziberrituko dituzte neska-mutil gazteak.