ZAKARIAS 6 - Elizen Arteko Biblia (Biblia en Euskara Traducción Interconfesional)

Zortzigarren ikuskaria: lau gurdiak

¹ Begiak berriro jaso eta lau gurdi ikusi nituen bi mendiren artetik agertzen; mendiak brontzezkoak ziren.

² Lehenengo gurdiko zaldiak gorriak ziren, bigarrengoak beltzak,

³ hirugarrengoak zuriak, eta laugarrengoak nabarrak.

⁴ Adierazpenak ematen zizkidan aingeruari galdetu nion: —Zer esan gura dute, jauna?

⁵ Aingeruak erantzun zidan: —Zeruko lau haizeak dira: mundu osoaren Jabearen zerbitzuan daude, eta orain badoaz.

⁶ Zaldi beltzen gurdia iparraldeko lurralderantz, zaldi zuriena haien atzetik, eta nabarrena hegoaldeko lurralderantz.

⁷ Zaldiak bizi-bizi atera ziren, lurra arakatzeko prest. Jaunak agindu zien: —Joan eta zeharkatu lurbira osoa. Horixe egin zuten.

⁸ Eta Jaunak dei egin eta esan zidan: —Hara, iparralderantz atera direnek baretu dute nik iparraldeko lurraldearen aurka dudan haserrea.

Josue koroatua

⁹ Honela mintzatu zitzaidan Jauna:

¹⁰ «Zoaz gaur berton Sofoniasen seme Josiasen etxera eta hartu Heldai, Tobias eta Jedaiasen, Babiloniatik itzuli diren erbestetu horien, emaitzak.

¹¹ Har itzazu urrea eta zilarra, egizu koroa eta ezarri buruan Jotzadaken seme Josue apaiz nagusiari.

¹² Eta adierazi berari Jaun ahalguztidunak dioena: «Hona “Ernamuin” deitua den gizona; horren etorreran dena erneberrituko da; berriro jasoko du Jaunaren tenplua.

¹³ Bera da Jaunaren tenplua jasoko duena; ohorez betea izango da eta errege-aulkian jesarriko gobernatzeko; apaiza ere bere aulkian jesarriko da, eta zeharo bat etorriko dira biak.

¹⁴ Koroa Jaunaren tenpluan geratuko da, Heldaik, Tobiasek eta Jedaiasek egindakoaren eta Sofoniasen seme Josiasen bihotz-zabalaren oroigarritzat.

¹⁵ Jaunaren, zeuen Jainkoaren, esana benetan betetzen baduzue, urruti daudenak ere etorriko dira Jaunaren tenplua jasotzera». Orduan jakingo duzue Jaun ahalguztidunak bidali nauela zuengana.