ZAKARIAS 5 - Elizen Arteko Biblia (Biblia en Euskara Traducción Interconfesional)

Seigarren ikuskaria: liburua

¹ Berriro jaso nituen begiak eta liburu bat ikusi nuen hegan.

² Aingeruak galdetu zidan: —Zer ikusten duzu? Nik erantzun: —Liburu bat ikusten dut hegan, hamar metro luze eta bost zabal dena.

³ Orduan, azaldu zidan: —Lurbira osoaren gainera zabaltzeko dagoen madarikazioa dakar liburuak. Liburuaren alde batean «Lapur guztiak garbituko dituzte» zegoen idatzia, eta bestean «Gezur-zinegile guztiak garbituko dituzte».

⁴ Honela dio Jaun ahalguztidunak: «Neuk bidaltzen dut madarikazio hori, lapurraren etxera eta nire izenean gezur-zinak egiten dituenaren etxera sar dadin; bertan geratuko da, etxe osoa, harri eta habe, ezereztu arte».

Zazpigarren ikuskaria: ontzia eta emakumea

⁵ Adierazpenak ematen zizkidan aingeruak, hurbildurik, esan zidan: —Jaso begiak eta begiratu agertzen ari denari.

⁶ —Zer da? —galdetu nion. Hark erantzun zidan: —Ontzi handi bat da: lurralde guztiaren bekatua adierazten du.

⁷ Ontzia berunezko estalkiz itxia zegoen. Estalkia jaso zutenean, emakume bat agertu zen ontzi barruan jesarria.

⁸ Aingeruak adierazi zidan: —Gaiztakeria da. Ontzi barrura bultza egin zion emakumeari eta berunezko estalkia ezarri gainean.

⁹ Begiak jaso eta bi emakume ikusi nituen, airean hegaz. Hegoak zikoinaren gisakoak zituzten. Ontzia hartu eta zerurantz jaso zuten.

¹⁰ Adierazpenak ematen zizkidan aingeruari galdetu nion: —Nora daramate ontzia?

¹¹ Eta hark erantzun: —Babiloniara; han santutegia eraikiko diote, eta prest dagokeenean, oin-aulki gainean jarriko dute.