SALMOAK 99 - Elizen Arteko Biblia (Biblia en Euskara Traducción Interconfesional)

99. (98.) SALMOA Santua da Jauna: goretsi eta obeditu

¹ Errege da Jauna: dardara bitez herriak! Hegaldun izakien artean du tronua: ikara bedi lurra!

² Handia da Jauna Sionen, herri guztien gainetik garai.

³ Gorets bezate haren izen handi eta ikaragarria! Santua da bera!

⁴ Errege ahaltsu zara, justiziazale: zuk ezarri duzu zuzenbidea munduan, zuk egiten justizia eta zuzenbidea Israelen.

⁵ Goratu Jauna, gure Jainkoa, ahuspeztu haren oin-aulki aurrean! Santua da bera!

⁶ Haren apaizen artean ziren Moises eta Aaron, haren izenari dei zegiotenen artean Samuel: dei egiten zioten Jaunari, eta hark erantzun.

⁷ Laino-adarretik hitz egin zien, eta haiek gorde haren aginduak eta eman zien legea.

⁸ Jauna, gure Jainkoa, zuk erantzuten zenien, bai, Jainko barkabera izan zinen haientzat, beren gaiztakerietatik garbituz.

⁹ Goratu Jauna, gure Jainkoa, ahuspeztu haren mendi santuaren aurrean! Santua da Jauna, gure Jainkoa!