SALMOAK 8 - Elizen Arteko Biblia (Biblia en Euskara Traducción Interconfesional)

8. SALMOA Jainkoaren handitasuna eta gizakiaren duintasuna

¹ Koru-zuzendariarentzat. «Dolareak» doinuan Daviden salmoa.

² Jauna, gure Jauna, bai harrigarria zure izena mundu osoan! Zeruak baino garaiago den zure ospea kantatuko dut

³ umetxoen eta bularreko haurtxoen hizkeraz. Sendo oinarritu duzu zeure gaztelua etsaien aurka, etsai mendekuzaleak isilarazteko.

⁴ Zeure behatzez eratu duzun ortzia eta ezarri dituzun ilargi-izarrak ikusita,

⁵ zer da gizona, zu hartaz oroitzeko? Zer gizakia, zu hartaz arduratzeko?

⁶ Ia jainko baten pareko egin duzu, ohorez eta aintzaz koroatu;

⁷ zeure eskulan guztien buru egin duzu, denak haren menpean jarri:

⁸ ardi eta idiak, baita basapiztiak ere;

⁹ zeruko hegaztiak eta itsasoko arrainak, itsasoan zehar dabilen guztia.

¹⁰ Jauna, gure Jauna, bai harrigarria zure izena mundu osoan!