SALMOAK 64 - Elizen Arteko Biblia (Biblia en Euskara Traducción Interconfesional)

64. (63.) SALMOA Jainkoak iraintzaileak zigortu

¹ Koru-zuzendariarentzat. Daviden salmoa.

² Entzun, ene Jainko, nire kexa, zaindu nire bizia etsai beldurgarriongandik.

³ Gorde nazazu makurren azpilanetik, elkar hartu duten gaizkileengandik;

⁴ ezpata bezain zorrotza dute mihia, geziak bailiran botatzen hitz pozoitsuak:

⁵ ezkututik jaurtitzen diote errugabeari, bat-batean eta ezeren beldurrik gabe.

⁶ Gaitz egiteko elkar berotzen dute, tranpa ezkutuak nola jarriko dabiltza, esanez: «Nor konturatuko da?

⁷ Nork ikertuko gure makurkeria biribilak?» Ikertzen ditu, bai, gizakiaren barrena bihotz-hondoraino ikertzen duenak.

⁸ Jainkoak geziak jaurti eta zauriz beteak dira bat-batean.

⁹ Beren mihia bihurtzen zaie erorbide, eta begira daudenek irri dagite buru-keinuka.

¹⁰ Jende guztia beldurrak hartu du, Jainkoaren egintzak iragartzen dituzte, hark egina hausnartzen.

¹¹ Alai bedi zintzoa Jaunarekin, babes bedi harengan eta harro bitez horretaz bihotz zuzenekoak.