SALMOAK 58 - Elizen Arteko Biblia (Biblia en Euskara Traducción Interconfesional)

58. (57.) SALMOA Gobernari bidegabeak suntsitzeko Jainkoari eskea

¹ Koru-zuzendariarentzat. «Ez suntsitu» doinuan. Davidena. Miktam.

² Agintariok, epai zuzenak ematen al dituzue? Gizakiok, zuzen gobernatzen ote duzue?

³ Bai zera! Bihotz makurrez jokatzen duzue, zeuen egiteez lurraldean bidegabekeriak zabaltzen.

⁴ Gaiztoak sortzetik oker, maltzurrak jaiotzatik galduak.

⁵ Pozoia dute, sugegorriek bezala; belarriak ixten dituzten suge gorren antzeko dira,

⁶ liluratzaileen, zoratzailerik trebeenaren, soinua entzuten ez dutenen antzeko.

⁷ Oi Jainko, hautsi horiei hortzak ahoan! Jauna, puskatu lehoien haginak!

⁸ Gal bitez ur isuria bezala, zimel bitez belar zapaldua bezala.

⁹ Desager bitez lingirda darion barea bezala, ez bezate eguzki-argirik ikus, haur galduak bezala.

¹⁰ Sasien antzera arantzak bota baino lehen eraman bitza haize-erauntsiak heze daudenean, iharturik baleude bezala.

¹¹ Mendekua ikustean, zintzoak poz hartuko du, gaizkileen odola oinetatik garbituko.

¹² Eta jendeak esango du: «Merezi du, bai, zintzo izateak! Bada benetan mundua gobernatzen duen Jainkoa!»