SALMOAK 43 - Elizen Arteko Biblia (Biblia en Euskara Traducción Interconfesional)

43. (42.) SALMOA

¹ Egidazu justizia, ene Jainko, defenda nire auzia sinesgabeen aurka. Libra nazazu maltzur-gaiztoaren eskutik.

² Ene Jainko babesle horrek, zergatik baztertu nauzu? Zergatik behar dut goibel ibili, etsaiak estuturik?

³ Bidali zure argia eta zure egia: gida nazatela, eraman nazatela zure mendi santura, zure bizilekura.

⁴ Eta zure aldarera iritsiko naiz, oi Jainko, nire poz betea zaren Jainko horrengana. Zitara joz goretsiko zaitut, Jainko, ene Jainko.

⁵ Zergatik zaude, ene barrena, hain goibel? Zergatik hain urduri? Itxaron Jainkoarengan! Goretsiko dut, bai, berriz ere, haren presentzia salbatzailea.