SALMOAK 3 - Elizen Arteko Biblia (Biblia en Euskara Traducción Interconfesional)

3. SALMOA Fededun erasotuaren oihua

¹ Daviden salmoa. Bere seme Absalomengandik ihesi zebilenekoa.

² Zein ugari, Jauna, nire etsaiak! Zein ugari aurka altxa zaizkidanak!

³ Zein ugari nitaz esaka ari direnak: «Jainkoak ere ez du salbatzen!»

⁴ Baina zu zara, Jauna, nire babeski, zu nire ohore. Zuk didazu burua jasotzen.

⁵ Oihuka egiten diot dei Jaunari, eta erantzuten dit bere mendi santutik.

⁶ Oheratzen naiz eta lokartzen, eta berriro esnatzen, Jauna baitut euskarri.

⁷ Milaka etsaik inguratzen banau ere, nik beldurrik ez.

⁸ Jaiki zaitez, Jauna! Salba nazazu, ene Jainko! Nire etsaiak masailean jotzen dituzu, gaizkileei hortzak hausten dizkiezu.

⁹ Zuregandik, Jauna, salbamena, zure herriarentzat bedeinkapena.