SALMOAK 20 - Elizen Arteko Biblia (Biblia en Euskara Traducción Interconfesional)

20. (19.) SALMOA Erregearen garaipenerako eskaria

¹ Koru-zuzendariarentzat. Daviden Salmoa.

² Entzun zaitzala Jaunak arrisku-egunean, jar zaitzala toki seguruan Jakoben Jainkoak!

³ Bidal diezazula laguntza bere santutegitik, eutsi zuri Sion menditik!

⁴ Gogora bitza zure eskaintza guztiak eta onar atseginez zure erre-oparia!

⁵ Eman diezazula nahi duzuna, bete ditzala zure egitasmo guztiak!

⁶ Ospatu ahal dezagula poz-oihuz zure garaipena, banderak zabalduz gure Jainkoaren izenean! Bete ditzala Jaunak zure eskari guztiak!

⁷ Orain bai, badakit: Jaunak garaipena ematen dio berak gantzuturiko erregeari; bere zeru santutik erantzuten dio, bere ahalmen handiaz garaipena ematen.

⁸ Batzuk bizkor guda-gurdiekin, beste batzuk zaldiekin; gu, berriz, Jaunarekin, geure Jainkoarekin.

⁹ Haiek okertu, erori egiten dira; guk, berriz, zutik eta sendo irauten.

¹⁰ Jauna, emaiozu erregeari garaipena! Erantzun, dei egiten dizugunean!