SALMOAK 121 - Elizen Arteko Biblia (Biblia en Euskara Traducción Interconfesional)

121. (120.) SALMOA Israelen zaintzailea

¹ Erromes-kanta. Begiak mendietara ditut jasotzen: nondik etorriko ote zait laguntza?

² Jaunarengandik datorkit laguntza, zeru-lurrak egin zituenagandik.

³ Jaunak ez zaitu erortzen utziko, zure zaintzailea ez dago lo.

⁴ Ez, ez du sekula lorik egiten Israelen zaintzaileak.

⁵ Jauna duzu zaintzaile, Jauna gerizpe: alboan duzu beti.

⁶ Ez dizu kalterik egingo eguzkiak egunez, ez ilargiak ere gauez.

⁷ Jaunak zainduko zaitu gaitz orotatik, berak zuri bizia zainduko.

⁸ Jaunak zainduko ditu zure ibilera guztiak oraindanik eta betiko.