SALMOAK 114 - Elizen Arteko Biblia (Biblia en Euskara Traducción Interconfesional)

114. (113 A) SALMOA Jaunaren agerraldi ospetsua, herria lurraldean sartzean

¹ Israel Egiptotik irten ondoren, Jakoben herria erbestetik,

² Jaunaren santutegi bihurtu zen Juda, haren jabetza Israel.

³ Jainkoa ikustean, itsasoak ihes, Jordanek atzera egin zuen;

⁴ mendiek salto, ahariek bezala, eta muinoek, arkumeek bezala.

⁵ Zer zenuen, itsaso, ihesi? Eta zuk, Jordan, atzeraka?

⁶ Zer zenuten saltoka, mendiok, ahariak bezala, eta zuek, muinook, arkumeak bezala?

⁷ Egizu poz-ikara, oi lur, Jabearen aurrean, Jakoben Jainkoaren aurrean!

⁸ Haitza urtegi bihurtu zuen, suharria iturburu.