NAHUM 2 - Elizen Arteko Biblia (Biblia en Euskara Traducción Interconfesional)

Judari

¹ Hona non datorren mendi gainetan bakearen berri ona dakarren albistaria. Ospatu zeure jaiak, Juda, bete zeure promesak. Gaizkilea ez da gehiago zuregana etorriko, zeharo ezereztua gelditu baita.

Niniveri

² Ninive, badator zure aurka hondatzailea; zaindu dorreak, egin guardia bideetan! Egon prest gudurako, bildu zeure indar guztiak!

Judari

³ Jaunak berriro jasotzen du Jakoben ondorengoen handitasuna, Israelen ospea; mahastia bezala larrutu zuten harrapariek, mahats-aihenak soilduz.

Ninive eroriko

⁴ Ezkutu gorriak dituzte etsaien gudariek, purpurazko jantziak gerlariek. Suaren distira dute guda-gurdiek gerrarako prest daudenean. Dar-dar dagite lantzek.

⁵ Guda-gurdiak arrapaladan doaz kale eta plazetan barrena, zuzi piztuak bezala, tximista bezain bizkor.

⁶ Niniveko erregea gudalburuei mintzo zaie, beren lasterrean behaztopaka doaz hauek. Etsaiak korrika doaz harresien aurka, beren ezkutuez babesturik.

⁷ Ibai aldeko ateak indarrez behartzen dituzte, eta errege-jauregia menpean hartzen.

⁸ Jainkosaren irudia hartu eta atzerrira daramate; haren zerbitzariak usoak bezala dabiltza urrumaka eta bular-joka.

⁹ Urez beteriko putzua zen Ninive; orain ihesi doazkio ur guztiak. «Geldi, geldi zaitezte!» Baina ez dira itzultzen.

¹⁰ «Harrapa zilarra, harrapa urrea!» Neurrigabeak dira hango ondasun eta gauza baliotsuak.

¹¹ Dena larrutua, erraustua, porrokatua! Adore galdurik bihotzak, koloka belaunak, dardaraz gerriak, zurbil aurpegiak.

Ninive, lehoi menderatua

¹² Non da lehoiaren haitzulo zen hiria? Han hartzen zuten lehoikumeek beren jana. Lehoia janari bila joaten zenean, inoren beldurrik ez lehoikumeek.

¹³ Lehoiak harrapatzen eta zatitzen zuen ehizakia lehoi eme eta kumeentzat, harrapakinez betetzen zuen bere haitzuloa.

¹⁴ Honela dio Jaun ahalguztidunak: «Ninive, hona ni zure aurka: errauts eta ke bihurtuko ditut zure lehoikumeak. Erauzi egingo ditut lurretik zure harrapaketak eta ez da gehiago entzungo zure mandatarien ahotsik».