KOHELET 4 - Elizen Arteko Biblia (Biblia en Euskara Traducción Interconfesional)

Bidegabekeria ugari

¹ Hausnartzen ari izan nintzen eguzkipean zenbat bidegabekeria egiten den. Ikusi nituen zapalduen malkoak, eta kontsolatzailerik ez; zapaltzaileen eskua gogor ari zitzaien, eta kontsolatzailerik ez.

² Zori hobekotzat jotzen ditut hilak biziak baino,

³ eta biok baino zoriontsuago jaio ez dena eta eguzkipean egin ohi diren okerrak ikusi ez dituena.

Lana

⁴ Ikusi ditut, orobat, jendearen lan guztiak eta eginahalen emaitzak: elkarrentzako bekaizkeriaz eginak denak. Hau ere huskeria da eta haizea atzeman nahia bezalakoa.

⁵ Ergela, eskuak tolestatu eta goseak hiltzen da.

⁶ Hala ere, hobe da esku-hutsik lasai bizi, esku beterik neketan baino.

⁷ Beste zentzugabekeria hau ere ikusi dut eguzkipean:

⁸ Demagun bakarrik bizi dela gizon bat; ez du lagunik, ez seme-alabarik, ez anai-arrebarik, eta, hala ere, etengabe dihardu lanean, ez da asetzen aberasteaz, galdetu ere ez du egiten bere baitan: «Norentzat ari ote naiz lanean, neure buruari atseginak ukatuz?» Horra beste zentzugabekeria eta lanbide txarra.

Elkartasuna

⁹ Hobe, bi elkarrekin ari izatea bakarka baino, elkartze horretatik etekin hobea aterako baitute.

¹⁰ Bietarik bat eroriko balitz, besteak jasoko luke; baina urrikalgarri bakarrik dagoena; eroriko balitz, ez bailuke izango nork jaso.

¹¹ Orobat, bik, batera lotaratuz, elkar dute berotuko; bakarrik dagoena nola berotu?

¹² Bati erasotzen diotelarik, biek eginen dute aurre. Hiru hariko soka etetea gaitz.

Gaztea eta zaharra

¹³ Hobe, gazte behartsu baina zuhurra, aholkurik nahi ez duen errege zahar eta zoroa baino.

¹⁴ Zeren gaztea, noizbait presondegian egona eta bere herrian behartsu jaioa izanik ere, errege-aulkira igo baita,

¹⁵ eta zaharraren tokian altxatzen den gaztearen alde jartzen ikusi dut eguzkipean dabilen jende guztia ere.

¹⁶ Ezin zenbatu ahalako herri baten buruzagi izan arren, gerokoak ez dira harekin ere pozik izanen. Hau ere huskeria da, haizea atzeman nahi izatea.

Otoitz egitean

¹⁷ Zabiltza arretaz Jainkoaren etxera sartzean, hobe duzu entzutera hurbildu, ergelek egin ohi duten oparia eskaintzera baino; ergelek ez baitakite gaiztakeria baizik egiten.