KANTARIK EDERRENA 3 - Elizen Arteko Biblia (Biblia en Euskara Traducción Interconfesional)

Bilatu eta aurkitu Emakumeak

¹ Gauez, ohean, neure bihotzeko kutunaren bila nenbilen. Bila ibili, bai, baina aurkitu, ez.

² Jaiki eta hirian zehar abiatu nintzen, kale eta plazetan zehar, neure bihotzeko kutunaren bila. Bila ibili, bai, baina aurkitu, ez.

³ Hirian zehar dabiltzan zaindariek aurkitu ninduten. —Ikusi al duzue nire bihotzeko kutuna?— galdetu nien.

⁴ Haiengandik aldendu nintzeneko, aurkitu nuen neure bihotzeko kutuna. Gogor heldu nion, ez diot berriz jaregingo, neure amaren etxean sartu arte, sortu ninduenaren logelan sartu arte.

Gizasemeak

⁵ Jerusalemgo neskatxok, basoetako orein eta gazelen izenean, otoi, ez iratzarri ene maitea, utzi lo egiten, nahi duen arte.

Eztei-segizioa Koruak

⁶ Zer da basamortuan gora datorren hori? Intsentsu, mirra eta beste hainbat usaingarrizko ke-zutabea dirudi.

Ahots batek

⁷ Horra Salomonen esku-aulkia. Hirurogei gudari ditu inguruan, Israelgo ausartenak;

⁸ ezpata erabiltzen ikasiak denak, guduan trebatuak. Aldean daramate ezpata gaueko erasoen beldur.

Koruak

⁹ Salomon erregeak Libanoko egurrez egin zuen esku-aulkia.

¹⁰ Zutabeak zilarrezkoak ditu, bizkarraldea urrezkoa, eserlekua purpurazkoa; barrualdea, dena, Jerusalemgo neskatxek maitekiro apaindua.

Ahotsak

¹¹ Siongo alabok, atera zaitezte Salomon erregea ikustera. Koroa eta guzti dator, eztei-egunean, bihotza beteko poza zuen egun hartan, amak ezarri zion koroaz.