JOB 40 - Elizen Arteko Biblia (Biblia en Euskara Traducción Interconfesional)

¹ Jaunak jarraitu zuen Jobi esaten:

Jaunaren erronka

² «Ba al da Ahaltsuarekin eztabaidatu nahi duenik? Jainkoa kritikatu nahi duenak, erantzun beza».

Joben lehen erantzuna (40,3-5)

³ Jobek erantzun zion Jaunari:

Jobek erantzunik ez

⁴ «Ni ez naiz inor, zer erantzungo dizut? Eskuaz ahoa itxiko dut.

⁵ Behin eta birritan hitz egin dut, eta ez dut beste erantzunik erantsiko».

Jaunaren bigarren hitzaldia (40,6—41,26)

⁶ Orduan, Jaunak ekaitzaren erditik erantzun zion Jobi:

Non da Joben indarra?

⁷ «Presta zaitez, adorerik baduzu, nire galderei erantzuteko.

⁸ Arrazoia kendu nahi al didazu eta ni gaitzetsi zeure burua zuzenesteko?

⁹ Jainkoak adina indar al duzu eta harena bezain ahots ozena?

¹⁰ Horrela bada, jantzi zeure burua ospe eta handitasunez, estali duintasun eta edertasunez.

¹¹ Utzi zeure suminari lehertzen eta eraitsi harroputza begiratu batez.

¹² Makurrarazi begiratu batez harroputza, jo eta zanpatu bertan gaiztoak.

¹³ Lurpera itzazu guztiak batera, estali guztiei begiak hilobi ilunean.

¹⁴ Orduan, nik neuk goraipatuko zaitut, zeure ahalmenaz lortua zenukeen garaipenagatik.

Hipopotamoa

¹⁵ «Begira hipopotamoari. Neuk egina da zu bezalaxe. Belarra jaten du idiak bezala.

¹⁶ Begira zer sendotasun duen bizkarraldean, nolako indarra sabeleko muskuluetan!

¹⁷ Tente du isatsa, zedroa bezala, artekaturik ditu hanketako tendoiak;

¹⁸ hezurrek, brontzea bezain gogor, burdinazko hagak dirudite.

¹⁹ Nire maisulana da; neuk bakarrik, bere egileak, mendera lezake ezpataz.

²⁰ Mendiek ematen diote janaria, beraren inguruan egiten dute jolas basapiztiek.

²¹ Lotoaren azpian etzaten da, aintzirako kanabera artean ezkutatzen.

²² Lotoaren gerizpean babesten da, errekako sahatsek inguratzen dute.

²³ Ibaiak ur handiak badakartza ere, ez da izutzen, nahiz eta Jordan ibaiak muturrean jo, lasai geratzen da.

²⁴ Nork aurrean jarri eta helduko dio? Nork eutsi eta sudurra zulatuko?

Krokodiloa

²⁵ «Harrapa al dezakezu krokodiloa amuaz edo haren mihia sokaz lotu?

²⁶ Pasatuko ote diozu kanabera sudurretik edo zulatuko ote matrailezurra kakoz?

²⁷ Erreguka eta zurikeriatan ibiliko ote zaizu?

²⁸ Hitzarmena egingo ote du zurekin, betiko esklabo har dezazun?

²⁹ Jolas egingo al duzu berarekin txoritxoarekin bezala edota preso hartuko zeure alaben jostailu bihurtzeko?

³⁰ Enkantean jarriko ote dute arrantzaleek, saltzeko zatikatuko ote merkatariek?

³¹ Larrua zula-zula egingo ote diozu geziz edo burua arpoiz zeharkatuko?

³² Jarriozu eskua gainean, ez duzu berriz egingo, gogoan izango baituzu borroka.