JEREMIAS 10 - Elizen Arteko Biblia (Biblia en Euskara Traducción Interconfesional)

Idoloak eta egiazko Jainkoa

¹ Entzun, Israel herri, Jaunak iragartzen dizun mezua.

² Hau dio Jaunak: «Ez egokitu jentilen ohituretara, ez izan zeruko seinaleen beldur, atzerritarrek ohi duten bezala.

³ Herri horien erlijioa hutsaren pareko: horien idoloak basoan ebakitako egur-puskak dira, artisauaren eskuak zizelez landuak,

⁴ urre eta zilarrez apainduak eta iltzez eta mailuz josiak, eror ez daitezen.

⁵ Meloi-soroko txorimalo dirudite: ez dakite hitz egiten eta garraiatu egin behar dituzte, ez baitira ibiltzeko gauza. Ez izan horien beldur: ezin dute kalterik egin, ezta onik ere».

⁶ Ez da zu bezalakorik, Jauna! Handia zara zu, handiak zure izena eta indarra.

⁷ Nork ez dizu begirune izango, herrien Errege? Zuri bakarrik zor zaizu hori! Ez duzu parekorik herrietako jakintsu eta erregeen artean.

⁸ Inozoak eta zentzugabeak dira denak: zurezko idoloetara doaz ikasbide hartzera!

⁹ Beraien idoloak artisau eta zilarginen lan dira, Tarsisko zilarrez eta Ufazko urrez estaliak, purpura more eta gorriz jantziak.

¹⁰ Jauna, berriz, egiazko Jainkoa da, Jainko bizia eta betiereko Erregea: hura haserretzean, lurrak dardara; nazioek ezin diote eutsi haren haserre-suminari.

¹¹ Horregatik, esan atzerritarrei: «Zeru-lurrak egin ez dituzten jainkoak desagertu egingo dira mundutik, zerupeko lurralde guztietatik».

Kreatzaileari gorazarrea

¹² Jaunak bere ahalmenaz egin du lurra, bere jakinduriaz ezarri mundua, bere adimenaz zabaldu zerua.

¹³ Haren aginduz urak zeruan pilatzen dira, hodeiak zerumugan gora igotzen, erauntsiak tximistaka lehertzen, haizea bere gordelekuetatik ateratzen.

¹⁴ Orduan, gizaki oro zoraturik gelditzen da, ulertezinik; zilargina idoloez lotsaturik, gezurrezkoak baitira, arnasarik gabeko irudi,

¹⁵ zentzugabeko eta barregarri; Jaunak hondatuko ditu kontuak hartzeko egunean.

¹⁶ Besterik da Jakoben Jainkoa, bera baita gauza guztien egilea eta Israel bere ondaretzat hautatu duena. Jaun ahalguztiduna, hori du izena!

Gure oihal-etxola hondatua

¹⁷ Jerusalemgo bizilagunok, setiaturik zaudete! Bildu zeuen gauzak eta atera lurraldetik.

¹⁸ Honela dio Jaunak: «Begira, oraingo honetan urrutira jaurtiko ditut herrialde honetako bizilagunak. Estu hartuko ditut, ezin izango da inor libratu».

¹⁹ Orduan, herriak oihu: «Ai ene, hau hondamena gurea! Sendagaitza gure zauria! Eta gu, gaitz eramangarria izango zelakoan!

²⁰ Hondatua dago gure oihal-etxola, lokarri guztiak etenda. Seme-alabak kendu dizkigute, ez da bat ere gelditu gure etxola jasotzeko, oihalak zabaltzeko.

²¹ Gure gobernariek burua galdu dute, ez diote Jaunari kontsulta egiten. Horregatik, porrot egiten dute, eta horiek gidaturiko herria sakabanaturik dabil».

²² Entzun mezu hau: Badator herri bat iparraldetik istilu handiz, Judako hiriak basamortu eta txakal-zulo bihurtzera.

Profetaren otoitza

²³ Badakit, Jauna, gizakia ez dela bere jokabidearen jabe, ezin duela aukeratu bere ibilbidea.

²⁴ Zentza gaitzazu neurriz, ez haserrez, ez gaitzazun ezereztu.

²⁵ Hustu zeure sumina aintzat hartzen ez zaituzten eta dei egiten ez dizuten nazioen gain, Jakoben herria irentsi baitute, lurraldea hondatu.