ISAIAS 18 - Elizen Arteko Biblia (Biblia en Euskara Traducción Interconfesional)

Etiopiaren aurka

¹ Ai Etiopiako ibaiez beste aldean dagoen lurraldea, eltxo-burrunbadaz beteriko lurraldea!

² Mandatariak bidaltzen ditu Nilon barrena, ihizko txalupetan, uretan zehar. Zoazte, mandatari bizkorrak, itzuli herri lerden eta beltzaran horretara, edonon beldurra sortzen duen jendearengana, ibaiz ureztaturiko lurraldean bizi den herri gogor eta menderatzailera!

³ Zuek, munduan bizi zareten guztiok, begiratu, mendien gainean bandera altxatuko denean; entzun, turutak joko duenean.

⁴ Honela mintzatu baitzait Jauna: «Lasai egongo naiz, neure lekutik begira, geldi-geldi, eguerdiko sargoria bezala, uztaroko sargoritan ihintz-lainoa bezala.

⁵ Bai, mahatsa bildu baino lehen, loraldia igaro eta mahats-alea heltzen hastean, kimu berriak moztu egin ohi dira inauskaiaz, moztu eta bazterrera bota;

⁶ mendiko hegazti harraparientzat eta basapiztientzat uzten dira, hegazti harrapariek uda eta basapiztiek negua bertan igaro dezaten. Halaxe gertatuko da etiopiarrekin ere».

⁷ Egun hartan, Jaun ahalguztidunari opariak ekarriko dizkio herri lerden eta beltzaranak, edonon beldurra sortzen duen jendeak, ibaiz ureztaturiko lurraldean bizi den herri gogor eta menderatzaileak. Opariak ekarriko ditu Sion mendira, Jaun ahalguztidunaren bizilekura.