SOFONIAS 3 - Elizen Arteko Biblia (Biblia en Euskara Traducción Interconfesional)

SALAKETA ETA SALBAMEN AGINTZARIA (3,1-20) Jerusalemek Jaunaren ahotsa entzun ez

¹ Zoritxarrekoa Jerusalem, hiri errebelde, kutsatu eta zapaltzailea!

² Ez du entzun Jaunaren ahotsa, ez du onartu haren zentzaldia, ez du harengan uste ona ipini, ez du bere Jainkoarengana jo.

³ Hango nagusiak, lehoi orrolari; hango epaileak, gauean ehizatuari goizerako hezurrik ere uzten ez dioten otso.

⁴ Hango profetak, ahobero eta engainatzaile. Jaunarentzat sagaratua kutsatzen eta legea hausten dute apaizek.

⁵ Hiri erdian dago, ordea, Jaun zintzoa, ez du gaiztakeriarik egiten. Goizero agertzen du zuzenbidea, egunsentiz, huts egin gabe. Gaiztoak, ordea, berean jarraitzen, lotsarik gabe.

⁶ Honela dio Jaunak: «Ezereztu ditut herriak, hauts egin haien gotor-dorreak. Hondatu ditut haien kaleak: ez da gehiago han dabilenik. Erraustu ditut haien hiriak: ez da gehiago bizilagunik, ezta bat bakarrik ere.

⁷ “Horrela behintzat begirune izango dit Jerusalemek —pentsatzen nuen—, onartuko du nire zentzaldia, eta ez dut haien bizilekua ezereztu beharrik izango, kontuak eskatuko dizkiodanean”. Baina haiek are eta lehia handiagoz aritu ziren beren egintza okerretan.

⁸ Beraz, honela diot nik, Jaunak: Egon, egon, salaketa egitera jaikiko naizen eguna arte. Erabakia dut herriak eta erresumak biltzea, nire haserre-sumina haien gainera isurtzeko. Nire grinaren sugarrak lur osoa irentsiko du.

Herriak Jaunaren zerbitzari

⁹ «Orduan, herrien ezpainak garbi bihurtuko ditut, denek niri, Jaun honi, dei egin diezadaten eta denek bat eginik zerbitza nazaten.

¹⁰ Nire gurtzaileek, sakabanatu nituen guztiek, eskaintzak ekarriko dizkidate, Etiopiako ibaiez beste aldetik.

Israel bihozberritu

¹¹ «Egun hartan ez duzu gehiago lotsatu beharrik izango nire aurka egin dituzun errebeldiengatik. Izan ere, erronka harroak ahotik kenduko dizkizut, eta ez zara harrezkero harropuztuko nire mendi santuan.

¹² Eta jende apal eta behartsua utziko dut zurean: niregan izango dute babes.

¹³ Israelen bizirik geldituek ez dute aurrerantzean bidegaberik egingo, ez gezurrik esango, ez beren ahotan engainu-hitzik izango. Eta inoren beldurrik gabe jango dute eta atseden hartuko».

Alaitu, Jerusalem!

¹⁴ Egin kantu, Sion hiri! Egin poz-irrintzi, Israel! Poztu, Jerusalem, alaitu bihotz-bihotzez!

¹⁵ Alde batera utzi baitu Jaunak zure aurkako epaia, uxatu ditu zure etsaiak. Jauna, Israelgo erregea, zurekin dago: ez zara gehiago ezeren beldur izango.

¹⁶ Egun hartan, honela esango zaio Jerusalemi: «Ez izan beldurrik, Sion, ez egon bihotz-eroria.

¹⁷ Zure Jainko Jauna zurekin dago, salbatzeko ahaltsu! Pozik bai pozik dago zurekin. Bere maitasunez biziberritzen zaitu. Pozez jauzika eta kantari dago zuregatik».

¹⁸ Honela dio Jaunak: «Nik bilduko ditut, Jerusalem, zuregandik urruti, jairik gabe triste zeudenak. Bai astuna zure lotsa!

¹⁹ Hara, aldi hartan, zapaltzen zaituzten guztiak suntsituko ditut. Zaurituak sendatuko ditut, erbesteratuak etxeratuko. Eta ospez eta aipuz beteko ditut lehen lotsa jasan zuten lurralde guztietan.

²⁰ Aldi hartan herriratuko zaituztet eta bilduko. Zeuen begiz ikusiko duzue: zuen zoria aldatuko dut, aipagarri eta ospetsu egingo zaituztet lurreko herri guztien artean. Hala diot nik, Jaunak».