SOFONIAS 2 - Elizen Arteko Biblia (Biblia en Euskara Traducción Interconfesional)

Apalei deia

¹ Bil zaitezte, gogoemazue, jende lotsagabea,

² egun batean galtzen den gari-hautsa bezala sakabanatuak izan baino lehen, Jaunaren haserre-sumina zuen gainera jausi baino lehen, bai, Jaunaren haserre-eguna zuen gainera jausi baino lehen.

³ Eta zuek denok, lurraldeko apalok, Jaunaren aginduak betetzen dituzuenok, bila ezazue Jauna. Bilatu zuzentasuna, bilatu apaltasuna. Eta babesa aurkituko duzue agian Jaunaren haserre-egunean.

ISRAEL INGURUKO HERRIEN AURKA (2,4-15) Filistearrak mendebaldean

⁴ Gaza hiria bertan behera utzia izango da, Axkelon erraustua. Axdodeko bizilagunak egun-argitan jaurtiko dituzte hiritik, Ekrongoak errotik aterako.

⁵ Zoritxarrekoak zuek, itsasaldean bizi zaretenok, Kretatik etorritako herri hori! Hona zer dioen Jaunak zure aurka: «Kanaan, filistearren lurralde hori, erabat galduko zaitut, inor bizirik utzi gabe.

⁶ Zuen itsasaldea larre-toki bihurtuko da, artzainen putzu- eta eskorta-leku.

⁷ Judan bizirik geldituak jabetuko dira itsasaldeaz, han larratuko dituzte beren artaldeak, eta Axkelongo etxeak izango dituzte gauez etzaleku». Izan ere, Jainko Jaunak haien alde jokatuko du eta zoria aldatuko die.

Moabdarrak eta amondarrak ekialdean

⁸ Honela dio Jaun ahalguztidunak, Israelgo Jainkoak: «Entzun ditut moabdarren irainak, amondarren erdeinu-hitzak. Nire herria iraindu dute, nire lurraldea mespretxatu

⁹ Horregatik —ala ni bizi!— Sodomarena bera gertatuko zaio Moabi, eta Gomorrarena amondarrei: sasiarte eta gatzaga eta hondamendi bihurtuko dira. Nire herrian bizirik geldituek harrapaka erasoko diete Moabi eta Amoni eta bertako jabe bihurtuko dira».

¹⁰ Horra beren harrokeriagatik jasoko duten zigorra, Jaun ahalguztidunaren herria iraindu baitute eta gutxietsi.

¹¹ Beldurgarri gertatuko zaie Jauna: lurreko jainko guztiak ezereztuko ditu, eta herri guztiek gurtuko dute, baita urrutienekoek ere, nork bere lurraldean.

Etiopiarrak hegoaldean, asiriarrak iparraldean

¹² Zuek ere, etiopiarrok, Jaunaren ezpatak jo eta hilko zaituzte.

¹³ Iparraldearen aurka luzatuko du eskua Jaunak: Asiria erabat galduko du eta Ninive hondamendi bihurtuko, basamortua bezain gorri.

¹⁴ Haren barruan izango dute etzaleku artalde eta mota guztietako abereek. Hango zutabeburuetan emango dute gaua hontzak eta trikuak. Leiho eta ateburuetan karranka egingo du beleak. Zedrozko oholeria gorri agertuko da.

¹⁵ Horra hor lasai bizi zen hiri harroa, ustez inor baino handiago zena! Horra nola den hondamendi eta piztia-zulo bihurtu! Ondotik igaroko zaizkion guztiek iseka egingo diote txistuka eta esku-keinuka.