SALMOAK 67 - Elizen Arteko Biblia (Biblia en Euskara Traducción Interconfesional)

67. (66.) SALMOA Jainkoari bedeinkazio-eskaria

¹ Koru-zuzendariarentzat. Harizko musika-tresnaz. Salmoa. Kanta.

² Erruki gutaz, oi Jainko, bedeinka gaitzazu, erakutsi guri aurpegi argia,

³ ezagut dezan munduak zure nagusitza, jentil-herriek zure garaipena.

⁴ Goraipa zaitzatela herriek, oi Jainko, goraipa zaitzatela herri guztiek!

⁵ Kanta bezate nazioek pozaren pozez, herriak justiziaz gobernatzen baitituzu, nazioak munduan zuk gidatzen.

⁶ Goraipa zaitzatela herriek, oi Jainko, goraipa zaitzatela herri guztiek!

⁷ Eman beza lurrak bere fruitua, bedeinka gaitzala Jainkoak, gure Jainkoak.

⁸ Bedeinka gaitzala Jainkoak, izan biezaio begirune mundu osoak!