SALMOAK 46 - Elizen Arteko Biblia (Biblia en Euskara Traducción Interconfesional)

46. (45.) SALMOA Munduaren gain dagoen eta Jerusalemen bizi den Jainkoari laudorioa

¹ Koru-zuzendariarentzat. Koreren semeena. Oboez . Kanta.

² Jainkoa dugu babesleku eta indar, larrialdian laguntzaile seguru.

³ Ez dugu, beraz, beldurrik, nahiz eta lurrak dardara egin edota mendiak itsas hondora amildu,

⁴ nahiz eta olatuek apar-bitsetan orro egin edota mendiak itsasoaren oldarrez ikaratu.

⁵ Ibai baten adarrek alaitzen dute Jainkoaren hiria. Goi-goikoak bere bizilekua sagaratu du.

⁶ Jainkoa erdian duela, ez du koloka egiten, goiz-goizetik laguntzen dio Jainkoak.

⁷ Nazioek ikara, erreinuek koloka: Jainkoa mintzatu eta lurra irauli.

⁸ Jaun ahalguztiduna gurekin! Jakoben Jainkoa gure gotorleku!

⁹ Zatozte, ikus Jaunaren egintzak, lurrean egin duen iraulketa:

¹⁰ mundu osoan guduak geldiarazi, uztaiak puskatu, lantzak apurtu, babeskiak sutan erre.

¹¹ «Utzi armak! Aitor ezazue Jainkoa naizela, herrien gain eta lurraren gain nagoela».

¹² Jaun ahalguztiduna gurekin! Jakoben Jainkoa gure gotorleku!