SALMOAK 11 - Elizen Arteko Biblia (Biblia en Euskara Traducción Interconfesional)

11. (10.) SALMOA Jainkoaren justizian uste ona

¹ Koru-zuzendariarentzat. Davidena. Jaunarengan babesten naiz. Nolatan esaten didazue: «Alde mendira, hegaztiak bezala!

² Gaiztoek uztaia tenkatu baitute eta gezia uztai-harian jarri, bihotz zuzenekoak ilunpean jotzeko.

³ Oinarriek huts egitean, zintzoak zer egin?»

⁴ Jauna bere tenplu santuan dago, zeruan du tronua: begira-begira dago munduari, gizakiak ditu aztertzen.

⁵ Jaunak zintzoa du aztertzen, gaiztoa eta gogorkeria-zalea bihotzez gorrotatzen.

⁶ Bidal dezala txingarra eta sufre-euria horien gainera! Izan bedi haize kiskalgarria horien zoria!

⁷ Zintzoa da, izan ere, Jauna; zuzen jokatzea du maite: zuzenek ikusiko dute haren aurpegia.