NOMBREAC 26 - Elizen Arteko Biblia (Biblia en Euskara Traducción Interconfesional)

¹ Jaunak esan zien Moisesi eta Aaron apaizaren seme Eleazarri:

² «Egin israeldarren elkarte osoaren izen-bilketa, senitarteka, Israelgo gudarostea osatzeko gai diren hogei urtez gorako gizonezkoak erroldatuz».

³ Hala, Moisesek eta Eleazar apaizak israeldarren izen-bilketa egin zuten Moabeko lautadan, Jordan ondoan, Jeriko parean,

⁴ hogei urtez gorako gizonezkoak erroldatuz, Jaunak Moisesi agindu bezala. Hauek dira Egiptotik irtendako israeldarrak:

⁵ Israelen lehen-seme Rubenen leinua, Rubenen semeengandik sorturiko senitarteek osatzen zuten: Henokengandik henoktarrak, Palurengandik palutarrak,

⁶ Hetzronengandik hetzrondarrak eta Karmirengandik karmitarrak.

⁷ Horiek ziren rubendar senitarteak: 43.730 gizonezko guztira.

⁸ Paluren seme zen Eliab,

⁹ Nemuel, Datan eta Abiramen aita. Datan eta Abiram hauek Moises eta Aaronen aurka altxatutako elkarte-ordezkariak ziren; Koreren taldearekin bat egin zuten, hau Jaunaren aurka altxatu zenean.

¹⁰ Lurrak, zabaldurik, irentsi egin zituen Korerekin batera, honen taldea hil eta suak berrehun eta berrogeita hamar gizon suntsitu zituenean; herriaren eskarmenturako izan zen hori.

¹¹ Koreren semeak, ordea, ez ziren hil.

¹² Simeonen leinuko senitarteak: Nemuelengandik nemueldarrak, Jaminengandik jamindarrak, Jakinengandik jakindarrak,

¹³ Zerahengandik zerahtarrak eta Saulengandik sauldarrak.

¹⁴ Horiek ziren simeondar senitarteak: 22.200 gizonezko guztira.

¹⁵ Gaden leinuko senitarteak: Tzefonengandik tzefondarrak, Hagirengandik hagitarrak, Xunirengandik xunitarrak,

¹⁶ Oznirengandik oznitarrak, Erirengandik eritarrak,

¹⁷ Arodengandik arodtarrak eta Arelirengandik arelitarrak.

¹⁸ Horiek ziren Gaden leinuko senitarteak: 40.500 gizonezko guztira.

^19-21 Judaren leinuko senitarteak: Xelarengandik xelatarrak, Peretzengandik pereztarrak eta Zerahengandik zerahtarrak. Peretzengandik sorturiko senitarteak: Hetzronengandik hetzrondarrak eta Hamulengandik hamuldarrak. Judaren bi seme, Er eta Onan, Kanaanen hil ziren.

²² Horiek ziren Judaren leinuko senitarteak: 76.500 gizonezko guztira.

²³ Isakarren leinuko senitarteak: Tolarengandik tolatarrak, Pubarengandik pubatarrak,

²⁴ Jaxubengandik jaxubtarrak eta Ximronengandik ximrondarrak.

²⁵ Horiek ziren Isakarren leinuko senitarteak: 64.300 gizonezko guztira.

²⁶ Zabulonen leinuko senitarteak: Seredengandik seredtarrak, Elonengandik elondarrak eta Jahleelengandik jahleeldarrak.

²⁷ Horiek ziren zabulondar senitarteak: 60.500 gizonezko guztira.

²⁸ Joseren semeak Manases eta Efraim izan ziren.

²⁹ Manasesen leinuko senitarteak: Makirrengandik makirtarrak, eta Makirren seme zen Galaadengandik galaadtarrak.

³⁰ Galaaden leinuko senitarteak: Jezerrengandik jezertarrak, Helekengandik helektarrak,

³¹ Asrielengandik asrieldarrak, Sikemengandik sikemdarrak,

³² Xemidarengandik xemidatarrak eta Heferrengandik hefertarrak.

³³ Heferren seme Tzelofhadek ez zuen semerik izan, alabak baizik; alaben izenak Mahla, Noa, Hogla, Milka eta Tirtza ziren.

³⁴ Horiek ziren Manasesen senitarteak: 52.700 gizonezko guztira.

³⁵ Efraimen leinuko senitarteak: Xutelahengandik xutelahtarrak, Bekerrengandik bekertarrak, Tahanengandik tahandarrak,

³⁶ eta Xutelahen seme Eranengandik erandarrak.

³⁷ Horiek ziren Efraimen leinuko senitarteak: 32.500 gizonezko guztira. Horiek ziren Joseren ondorengoak, senitarteka erroldaturik.

³⁸ Benjaminen leinuko senitarteak: Belarengandik belatarrak, Axbelengandik axbeldarrak, Ahiramengandik ahiramdarrak,

³⁹ Xufamengandik xufamdarrak, Hufamengandik hufamdarrak,

⁴⁰ eta Belaren seme ziren Ard eta Naamanengandik ardtarrak eta naamandarrak.

⁴¹ Horiek ziren Benjaminen ondorengoak, senitarteka erroldaturik: 45.600 gizonezko guztira.

⁴² Danen leinuak senitarte bakarra zuen, Xuhamengandik sortutako xuhamdarrena.

⁴³ Xuhamdar senitarteak 64.400 gizonezko zituen guztira.

⁴⁴ Axerren leinuko senitarteak: Jimnarengandik jimnatarrak, Ixbirengandik ixbitarrak eta Beriarengandik beriatarrak.

⁴⁵ Beriaren ondorengoen senitarteak: Heberrengandik hebrearrak eta Malkielengandik malkieldarrak.

⁴⁶ Axerrek alaba bat izan zuen, Serah izenekoa.

⁴⁷ Horiek izan ziren Axerren ondorengoak senitarteka: 53.400 gizonezko guztira.

⁴⁸ Neftaliren leinuko senitarteak: Jahtzeelengandik jahtzeeldarrak, Gunirengandik gunitarrak,

⁴⁹ Jezerrengandik jezertarrak eta Xilemengandik xilemdarrak.

⁵⁰ Horiek ziren Neftaliren ondorengoak, senitarteka erroldaturik: 45.400 gizonezko guztira.

⁵¹ Izen-bilketan erroldaturiko israeldarrak 601.730 izan ziren guztira.

Aginduriko lurraldea banatzeko argibideak

⁵² Jaunak esan zion Moisesi:

⁵³ «Senitarte hauen artean banatuko duzu lurraldea, talde bakoitzaren lagun-kopurua kontuan harturik:

⁵⁴ senitartea ugaria bada, ondare-zatia ere handiagoa emango zaio; urria bada, txikiagoa; bakoitzari izen-bilketan eman duen kopuruaren arabera.

⁵⁵ Lurraldearen banaketa zozketaz bakarrik egingo da, leinu bakoitzeko senitarteen ondare-zatia lagun-kopuruaren araberakoa izango bada ere.

⁵⁶ Zozketak erabakiko du bakoitzaren zatia, ugaria nahiz urria izan senitartea».

Lebitarren bigarren izen-bilketa

⁵⁷ Lebiren leinuaren izen-bilketa senitarteka: Gerxonengandik gerxondarrak, Kehatengandik kehatarrak eta Merarirengandik meraritarrak.

⁵⁸ Hauek ziren Lebirengandiko senitarteak: libnitarrak, hebrondarrak, mahlitarrak, muxitarrak eta koretarrak. Kehatek Amram sortu zuen.

⁵⁹ Amram Lebiren alaba batekin, Lebik Egipton izan zuenarekin, ezkondu zen; Jokebed zuen izena. Honek hiru seme-alaba sortu zizkion Amrami: Aaron, Moises eta hauen arreba Miriam.

⁶⁰ Aaronengandik Nadab, Abihu, Eleazar eta Itamar sortu ziren.

⁶¹ Baina Nadab eta Abihu hil egin ziren, Jaunaren aurrean honek agindu gabeko intsentsu-eskaintza egin zutelako.

⁶² Lebitarrak 23.000 ziren guztira, hilabetez gorako gizonezkoak erroldan sartuz. Lebitarrak ez zituzten gainerako israeldarrekin batera erroldatu, ez baitzegokien ondare-zatirik beste israeldarrei bezala.

Izen-bilketaren bukaera

⁶³ Hori izan zen Moisesek eta Eleazar apaizak Moabeko lautadan, Jordan ondoan, Jeriko parean, eginiko israeldarren izen-bilketaren emaitza.

⁶⁴ Hauen artean ez zen gelditzen Moisesek eta Aaron apaizak Sinai basamortuan erroldaturiko israeldarrik.

⁶⁵ Izan ere, Jaunak esana zien basamortuan hilko zirela; beraz, ez zen haietariko inor gelditzen, Jefuneren seme Kaleb eta Nunen seme Josue izan ezik.