NAHUM 3 - Elizen Arteko Biblia (Biblia en Euskara Traducción Interconfesional)

Ninive hondatua

¹ Zoritxarrekoa zu, hiri odolzalea, maltzurkeriaz eta indarkeriaz betea, beti harrapakin bila zabiltzana!

² Horra hor zigor-zartadak, gurpilen zarata-hotsa, zaldien zalaparta, guda-gurdien trinki-tranka!

³ Zaldizkoen oldarra, ezpaten distira, lantzen tximistak! Zaurituak pilaka, hilak metaka, hilotzak ezin konta ahala! Hilotzetan estropezu egiten da.

Ninive emagaldua lotsagarri

⁴ Ninive, gehiegikeriez beteriko emagaldua, sobera ederra eta sorginkeriatan iaioa! Bere lohikeriez nazioak menderatzen zituen, bere sorginkeriez herrialdeak.

⁵ Horregatik, honela dio Jaun ahalguztidunak: «Hona ni zure aurka: gonak aurpegiraino jasoko dizkizut, biluzik agerraraziko zaitut herrien aurrean, lotsagarri erreinuen aurrean.

⁶ Zikinez estaliko zaitut, eta laidoz beteko denen begi aurrean.

⁷ Ikusiko zaituzten guztiak aldendu egingo zaizkizu, esanez: “Xehatua gelditu da Ninive; nor errukituko zaio? Non aurkituko kontsolatuko duenik?”»

Ninive Tebas bezala hondatua

⁸ Tebas baino gehiago zarela uste al duzu? Nilo ibaiaren adarren erdian zegoen, erabat urez inguratua; ibaia zuen harresi.

⁹ Nubia eta Egiptoko indar neurtezinak zituen euskarri, Put eta Libiako herriak laguntzaile.

¹⁰ Baina Tebas ere erbestera gatibu eraman zuten, haren haurrak kale-bazter guztietan sarraskitu, handikiak menderatzaileen artean banatu eta buruzagiak katez lotu.

¹¹ Ninive, zu ere edari saminez aseko zara, zeure burua gorde egin beharko duzu; babes bila ibiliko zara, etsaiengandik ihesi.

Ninivek zer eginik ez

¹² Piku helduen antzeko dira zure gotorleku guztiak: pikondoa astindu orduko behera datoz, jango dituztenen ahora.

¹³ Begira, zure gudariek emajende dirudite; zure lurraldeko ateak zabal-zabalik daude etsaien aurrean, suak irentsi ditu sarrailak.

¹⁴ Pilatu behar adina ur setiatuko zaituztenerako; sendotu gotorlekuak; ekarri lokatza, oratu buztina, eta prestatu adreilu-moldeak.

¹⁵ Han irentsiko zaitu suak, han galduko ezpatak; erabat irentsiko zaituzte, matxinsaltoak hostoa bezala. Matxinsaltoak bezala ugaldu zarete.

Erremediorik gabeko hondamendia

¹⁶ Zeruko izarrak hainbat ugaritu dituzu zeure merkatariak. Baina orain desagertu dira, hegoak zabaldu eta hegaz doazen matxinsaltoak bezala.

¹⁷ Zure buruzagiak matxinsaltoak bezala dira, zure gobernariak zomorroak bezala: egun hotzean hormetan kokatzen dira eta eguzkiak berotzean ihesi doaz, aztarnarik ere utzi gabe.

¹⁸ Asiriako errege, zure gobernariak loak hartu ditu, zure gudalburuak ez dira gehiago mugitzen, zure gudarostea mendietan sakabanatua dabil, eta ez da hura bilduko duenik.

¹⁹ Zure hondamendiak ez du erremediorik, ez zure zauriak sendabiderik. Zure zoriaren berri entzuten duten guztiak txaloka ari dira pozez. Izan ere, ba ote da inor munduan zure gaiztakeria jasan ez duenik?