KOHELET 7 - Elizen Arteko Biblia (Biblia en Euskara Traducción Interconfesional)

Heriotzaz oroitu behar

¹ Hobe izen ona, lurrin gozoa baino. Hobe heriotza-eguna, jaioteguna baino.

² Hobe hiletak jotzen ari diren etxera joan, jai-otordua egiten ari direnera baino; etxe hartan ikusten baita zein den gizon-emakume ororen azkena, han du hausnartzen bizi denak zer datorkion.

³ Hobe negarra, irria baino; begitartea goibel egon arren, bihotza ondu egiten baita.

⁴ Zuhurrak, hiletak jotzen ari diren etxean du bihotza; tentelak, berriz, jaietan dagoen etxean.

⁵ Hobe zuhur baten zentzarazpena, tentel baten goraipamena baino.

⁶ Izan ere, eltzepeko zotzaren txinparta-hotsa bezalakoa ergelaren irria, huskeria hutsa.

⁷ Bortxakeriak zuhurra ere ergel du bihurtzen, eta eskupekoak bihotza usteltzen.

⁸ Hobe arazoa bukatu, hasi baino; hobe eroapena, harrokeria baino.

⁹ Ez zaitez bizkorregi haserretu, ergelena baita haserretzea.

¹⁰ Ez galdegin zergatik ote ziren hobeak aldi joanak oraingoak baino. Zuhurrak ez luke horrelako galderarik egingo.

¹¹ Hoberena, zuhurtasuna ondasunekin batera izatea; hori da onurakorrena lur honetan bizi direnentzat.

¹² Zuhurtziaren itzala aberastasunaren itzala adinakoa da; baina zuhurtzia hobea, biziarazi egiten baitu bere jabea.

¹³ Begira Jainkoak eginari: nork zuzen ote dezake hark okertua?

¹⁴ Aldi onean goza ezazu, eta txarrean pentsa; bata zein bestea Jainkoak egin ditu, gizonak bere etorkizunari igarri ez diezaion.

Gehiegikeriarik ez

¹⁵ Hamaikatxo ikusia naiz neure bizitza itxuragabe honetan: gizaki zuzena, zuzen izanik ere, galdu egiten da; makurra, berriz, makur izanik ere, luzaro bizitzen.

¹⁶ Ez izan zuzenegi, ezta behar baino jakintsuago ere, ea hondatzen duzun zeure burua.

¹⁷ Ez izan makurregi, ezta ergelegi ere, ea garaia baino lehen hiltzen zaren.

¹⁸ Hobe duzu honi heldu, hura eskutik utzi gabe; Jainkoari begirune dionak ez baitu ezertan huts egiten.

¹⁹ Jakinduriak indartsuago egiten du jakintsua, hamar buruzagik hiria baino.

²⁰ Hala ere, ez da lurrean gizaki zuzenik hutsik gabe on dagienik.

²¹ Ez egin jaramonik esamesa guztiei; horrela, ez diozu entzungo zeure morroiari zutaz gaizki-esaka.

²² Ohar zaitez zeu ere maiz ari izana zarela besteez gaizki-esaka.

²³ Arretaz aztertu nuen hau guztia, neure artean esanez: «Jakintsu izan behar dut». Hori, ordea, ez zegoen nire esku.

²⁴ Gertatu zena urruti dago eta sakon-sakona da. Nork aurki lezake?

Emakumeaz

²⁵ Gogotik aztertu nuen dena, hausnartu eta jakitearren, jakinduria eta arrazoia aurkitzearren. Ohartu naiz gaizto izatea zorakeria dela, bihurrikeria eta ergelkeria.

²⁶ Entzun dut heriotza baino garratzagoa dela lakioa bezalakoa den emakumea: horren bihotza xedera, horren besoak lotura. Jainkoaren begiko denak ihes egingo dio; bekataria, aldiz, harrapatu egingo du halako emakumeak.

²⁷ Hona hemen zertaz ohartu naizen ni, Kohelet, argibide bila, denak banan-banan aztertu ditudanean:

²⁸ bila nabilen hori ez dudala aurkitu, alegia. Gizon bakarra aurkitu dut milaren artean; baina emakume bakar bat ere ez, denen artean.

²⁹ Azken batean, honetaz ohartu naiz: Jainkoak zuzena egin duela gizakia; gizakiak, ordea, bere burua mila arazoz nahasi duela.