ERRAN-ÇAHARRAC 8 - Elizen Arteko Biblia (Biblia en Euskara Traducción Interconfesional)

Jakinduriaren deia

¹ Jakinduria deika ari da, zuhurtziak oihu egiten du;

² bide gaineko muinoetan, bidegurutzeetan zutik,

³ hiriaren sarrerako plazan, pasaguneetan, aldarrikatzen du:

⁴ «Zuei, jaunoi, egiten dizuet dei; zuentzat, gizasemeontzat, nire hitza.

⁵ Heldugabeok, ikasi zuhurrak izaten; zentzubakook, ikasi burutsuak izaten.

⁶ Entzun, oso garrantzitsua da nire mezua eta benetan zuzena esaten dizuedana.

⁷ Bai, egia da diotsuedana, higuingarri zait maltzurki hitz egitea.

⁸ Zuzenak dira nire hitz guztiak, bat ere ez oker edo maltzurrik.

⁹ Argiak dira guztiak, ulertzen dakienarentzat eta errazak, jakitun denarentzat.

¹⁰ Onar ezazue nire heziketa, eta ez zilarra; ezaguera urre garbia baino lehen».

¹¹ —Koralak baino hobea da jakinduria, gauzarik baliotsuena ere ez da haren pareko—.

Jakinduriak bere burua aurkeztu

¹² «Nik, Jakinduriak, zuhurtasuna dut lagun, ezagumen eta bereizmen egokiak ditut neurekin.

¹³ Gaiztakeria gorrotatzen duenak errespetatzen du Jauna. Harrokeria eta handikeria, jokabide gaiztoa eta hizkera maltzurra gorrotatzen ditut.

¹⁴ Neuk sortzen ditut egitasmoak eta arrakastaz burutzen, neureak ditut adimena eta indarra.

¹⁵ Niri esker dira erregeak errege eta agintariak legegile zuzen.

¹⁶ Niri esker gobernatzen dute gobernariek eta epai zuzenak ematen handikiek.

¹⁷ Maite nautenak ditut maite, nire bila saiatzen direnek aurkituko naute.

¹⁸ Neuk ematen ditut aberastasuna eta ohorea, oparotasuna eta justizia.

¹⁹ Urre garbia baino hobea da nire fruitua, zilarra baino hobea ene emaitza.

²⁰ Justiziaren bidetik nabil ni, zuzenbidearen erdi-erditik.

²¹ Aberats egiten ditut maite nautenak, beraien altxortegiak betetzen.

²² «Jaunak bere jardueraren hasieran sortu ninduen, bere lehen egintzen aurretik.

²³ Betidanik izan naiz eratua, hasiera-hasieratik, lurra izan baino lehenagotik.

²⁴ Ur-leizerik ez zenean izan nintzen sortua, iturbururik ere ez zegoenean.

²⁵ Mendiak landatuak izan aurretik, muinoak baino lehen izan nintzen sortua;

²⁶ artean ez zituen Jainkoak mundu hau eta kanpokoak eginak, ezta lurraren lehen hautsa ere.

²⁷ Zeruak ezarri zituenean, han nengoen ni, ur-leizearen gainetik zeru-sabaia jarri zuenean,

²⁸ hodeiak goian bildu eta leize-iturriak tinko ezarri zituenean,

²⁹ itsasoari mugak finkatu —eta urek ez dituzte muga horiek gainditzen—, eta lurrari oinarriak jarri zizkionean;

³⁰ haren ondoan nengoen ni, obra-maisu bezala; beraren gozamena nintzen egunero, beraren aurrean jolastuz aldioro:

³¹ beraren ludiaz jolasten nuen eta gizakiekin nuen neure gozamena.

Zoriontsua Jakinduriari entzuten diona

³² «Beraz, semeok, entzun: Zoriontsuak nire bideetatik dabiltzanak!

³³ Onartu heziketa zuhurrak izateko, ez baztertu.

³⁴ Zoriontsua entzuten didan gizona, egunero nire etxe aurrean zain eta atalondoan jagole dagoena.

³⁵ Aurkitzen nauenak bizia aurkitu du eta Jaunaren onespena izango.

³⁶ Iraintzen nauenak, ordea, bere burua hondatzen du, gorrotatzen nautenek heriotza dute maite».