Zhüdɛ̀n 1 - Ɛmɛẅi ankà ankrànkràn 2003

Ebinyan

¹ Ebinyan ndɔ lɔ dú Zhüdɛ̀n yri kɛ và, nɛ́n léyi nɛ̀n dú Zhezü Krisì ci-bɩ̀tan-wrɔn mán Zhakɛ̀n nɛ́n muanẅì nɔn. Ebinyan zri lɔ dú anwrɔn hɔ̀n léyi Ɔwɔ bi, hɩ nɛ́n Ɔwɔ Zi nɛ cüɛ̀n, kɩ Zhezü-Krisì kɛ wá yɔ esùva nɔn tɛn:

² Ɛgbanbɩce, anwɔwɔ mán ɛcüɛ̀n bobrebe kɛ và dú nyɛ̀n ɛmɛ̀n.

Ɛyɔ̀n ankà-yé-bɔ̀

³ Annyran anvrɛn hɔ̀n, mɛ̀n ẅɛn ny'owrú merɛ́n ankà dú mɛ̀n ɛnkruemɛ̀n kpankpan, ô mɛ̀n dɔ́ nyɛ̀n ɛnkrukɔrɛ̀ ankà léyi dú bɔ́ tɛn nɔn. Tɛ́n, mɛ kàn le, ke ji le mɛ̀n hán kèkrèmɛ̀n mɛ̀n yüre nyɛ̀n owrú ndɔ lɔ, ô mɛ̀n yɩ́ nyɛ̀n edù, nyɛ́n kɔ́n anhà nyɛ́n tán ankaẅìbùtan léyi Ɔwɔ tán n'anwrɔn hɔ̀n léyi nɛ̀n mrɛ́n nɛ̀n bɩ́ brɛzri nɔn.

⁴ Annanwɔrɛ mɛ̀n lɔ, anwrɔn gbàngbàn ndɔ hɔ̀n bru nyɛ̀n ɛmɛ̀n anbanmɛ̀n; yɔ jrɛ́ b'Ɔwɔ nboafɔ̀n, kɩ yɔ bɩ́ nɛ̀n yɔ wá y'ɛwúvà gbàngbàn ẅɛ̀n wú, kɩ ɔmu lɔ yɔ kɔ́n Zhezü-Krisì ze, nɛ́n léyi nɛ̀n dú b'Ankà-yé-wrɔn zri mán Ɛẅɛnwrɔn nɔn. Ɛnvra sheshe mɛ̀n de Ɛwrú Prɔnprɔn hɔ̀n kɛ dɔ́ nwù-bɔ̀ léyi ke le dú yɔ ɛwú nɔn yi ankà.

⁵ Hán ɔmu le nyɛ́n gɔ̀ nyri ankà ndɔ lɔ anvrɛnvrɛn mɛ̀n nɔn; me ji mɛ̀n sàn kro nyɛ̀n ɔmu le Ɛẅɛnwrɔn bɩ́ Izraɛlɛ̀n fɛcüè die ɛdɛ̀n zri Ezhiptɛ̀n-hi wú anmàn, tɛ́n nɛ̀n di owúemɛ̀n anwrɔn hɔ̀n léyi kè sɩ̀ ẅɛ̀n esɛ́ n'ɛwú nɔn.

⁶ Ɔwɔ kùyüre-bɔ̀ léyi Ɔwɔ tán ɛkɔrɛ̀srɔn, kɩ ndɔ lɔ kè sɩ̀ cüɛ̀n yɔ ɛvɛ̀, yɔ teze yɔ dùku y'edúyri, y'ankà kè bru nyɛ̀n: Ɔwɔ hɛ́n yɔ ɛnhi, ɛyri yɔwɔ mɛ̀n, gbràka mɛ̀n ɛnvra lɔ fɛn, yɔ vrá ɛmrɛ̀nci bì vri lɔ.

⁷ Sodɔmɛ̀n, Gomɔrɛ̀n mán anmàn hɔ̀n léyi dú yɔ ɛtɛ̀sɛ̀n nɔn, y'ankà ke bru nyɛ̀n: y'anmàn-bɔ̀ ẅɛn esùnàn gbàngbàn hán Ɔwɔ-kùyüre-bɔ̀ ndɔ hɔ̀n lɔ hɔ́, kɩ yɔ hán ɛnbrá mɛ̀n ci léyi kè sɩ̀ dù eci-hán-ci nɔn; yɔ cɔ́ ɛgbàn-wɔɛ̀n-dì léyi dú ɛnhyá léyi ke sɩ́ trɔa nɔn mɛ̀n, kɩ ndɔ lɔ de dú ankà-bi-dɔ̀ léyi yɛ tán anwrɔn lɔ fɛn nɔn.

⁸ Annanwɔrɛ mɛ̀n, anwrɔn ndɔ hɔ̀n lɔ kɛ hán eci zri lɔ: y'ɛẅià-kɔ̀n kɛ kɛ́n yɔ wá, yɔ hán ɛgbàn ku yɔ dùku y'edùwrú wú, yɔ gbri Ɔwɔ kɔrɛ̀levri-ci, yɔ wora eci-zrɔ hɛ́n hɔ̀n léyi dú anhobɩ́ nɔn.

⁹ Ɔwɔ kùyüre-bɔ̀ wrɔn cüìcüì, Mishɛlɛ̀n mán kè sɩ̀ hán eci ndɔ lɔ. N'ɛdrɛ̀ hán mɛ̀n, nɛ́n mán anwawrɔn mɛhi, ɛnvra léyi yi mɛhi yɔ wrɔ́n Mohizì dùwru lɔ nɔn, Mishɛlɛ̀n kè sɩ̀ dá nɛ̀n ɔwɔra ẅiɛ̀-dà; nɛ̀n dɔ́ yi le: “Ke ji le Ɛẅɛnwrɔn kɛ̀ hán mɛ́n ɛgbàn!”

¹⁰ Tɛ́n anwrɔn ndɔ hɔ̀n lɔ yɔ wɔra eci léyi yɔ sɩ̀ nyrìɛn nɔn; kɩ eci léyi yɔ nyri anvɛmɛ̀n hán ovú nɔ̀n hɔ́ nɔn, ndɔ lɔ mán ke sɩ́ yɔ ɛzrɛ́n mɛ̀n.

¹¹ Muzhie dú yɔ tɛn! Yɔ ci Kahɛ́n levri; yɔ di y'edomɛ̀n ɛzɛ́n mɛ̀n ɔkùa kruhú, hán Balamɛ̀n hɔ́; yɔ wù, ɔmuhi yɔ sɩ́ y'edomɛ̀n ɛwú hán Kore hɔ́ nɔn.

¹² Y'ɛtɛ̀sɛ̀n nyɔn kɛ tán ɛnkruemɛ̀n jrɛ́ anwrɔn nɛ́n-muan-ẅì hɔ̀n ci-zîemɛ̀n; nanvrɛn lɔ de, yɔ koran kɩ anvɛvrà zriɛmɛ́n ke sɩ́ ẅɛn yɔ, kɩ yɔ wá yɔ dùku y'ankà esùva. Yɔ dù hán ɛwì-gbú hɔ̀n léyi ɛndɔ̀nwrɔ̀n kɛ kɛ́n wá, kɩ ke sɩ́ nán ɛnhsi nɔn. Yɔ dú yɔ cá antɛ̀ hɔ̀n léyi ke sɩ́ shi ɛẅì zriɛmɛ́n, odùcɛ̀n vra mán, kɩ ɛnvra léyi annyràn ke frɛ yɔ nɔn, yɔ wú owù d'anhyrɛ̀.

¹³ Yɔ dù yɔ cá ecüe mù ɛvrivri hɔ̀n, yɔ cüe y'ezìwú y'anvɛvrà ci-hán dàfù. Yɔ dù hán okùcànkrò hɔ̀n léyi ke sɩ́ yɛ́ ɛyri zri, kɩ Ɔwɔ wá ɛnnyran yri yɔwɔ pipi hɛ́n yɔ ɛnvra lɔ fɛn.

¹⁴ Enɔkɛ̀n, Adamɛ̀n mɛẅi, ɔbɔ̀ɛn mɛ̀n ẅì kprɔ̀hɔ́, de ɛnvra sheshe mɛ̀n dɔ́ y'ɛwú ankà, kɩ nɛ́n dɔ̀ le: “Nyɛ́n die nukùɛ, Ɛẅɛnwrɔn kɛ lɛ và nɛ́n mán n'ɛkùyüre-bɔ̀ prɔnprɔn hɔ̀n bobrebe mɛhi,

¹⁵ ô yɔ ci anwrɔnẅì lɔ fɛn ɛmrɛ̀n. Ne le bɔ́ ɛgbàn-hán-bɔ̀ nwù, y'eci-gbangbàn hɔ̀n hán wú, y'Ɔwɔ ezì kɛ̀n mán y'ankà-gbàngbàn-dɔ̀ ku nɛ̀n ɛwú.”

¹⁶ Anwrɔn ndɔ hɔ̀n lɔ dú ezì mú mɛ̀n ɛnvra lɔ fɛn kɩ yɔ boto y'edomɛ̀n; yɔ kɛ́n yɔ dùku y'ankàtro hɔ̀n ci-hán ɛsɛ̀n; yɔ dɔ́ tùtre ankà kɩ yɔ frɛ́n anwrɔn ɛ̀merɛ́n mɛ̀n.

Ankà-bi-dɔ̀ mán ankà-wá-tán

¹⁷ Nyɛ tɛn, annyran anvrɛn hɔ̀n, ankà léyi bɔ́ Ẅɛnwrɔn Zhezü-Krisì kɔ̀hɔ̀n-wá-bɔ̀ dɔ́ bɔ̀ ɛnbiɛhɛ́n vra lɔ nɔn, kè bru nyɛ̀n.

¹⁸ Annanwɔrɛ mɛ̀n lɔ, yɔ dɔ́ nyɛ̀n le: “Ɛnvra trɔ mùan mɛ̀n lɔ, anwrɔn ke le dù kɛ lɛ hán nyɛ̀n ɛnhyürɛ̀ kɩ ke le dú y'ankàtro gbàngbàn wúvà mɛ̀n.”

¹⁹ Nyàn yɔ, yɔ léyi yɔ hán ɛsɔ̀n-vɔyan-ci nɔn! Y'edùwruemɛ̀n ankanyrì di yɔ ɛkɔrɛ̀ ɛwú, kɩ ke sɩ̀ dù Ɔwɔ Hɛ́n.

²⁰ Tɛ́n nyɛ́n, annyran anvrɛn hɔ̀n, ny'ɛwúvà kè dú ɛnvra lɔ fɛn ny'ankaẅìbùtan prɔnprɔn mɛ̀n. Nyɛ́n sɛ́n Ɔwɔ Ɛnhɛ́n Prɔnprɔn korɛ̀srɔn mɛ̀n.

²¹ Nyɛ́n yɛ́ Ɔwɔ cüɛ̀n lɔ mɛ̀n, hàn kɩ kɛ̀ cɔ́ ɛnvra léyi bɔ́ Ɛẅɛnwrɔn Zhezü-Krisì yɔ̀bɔ̀-nyriemɛ̀n lɔ, kɛ lɛ tán nyɛ̀n ɛwúvà léyi ke sɩ́ trɔa nɔn.

²² Nyɛ́n nyri anwrɔn hɔ̀n léyi kɛ wá nyɔn nɔn ɛnhyɔ̀bɔ̀.

²³ Ndɔ hɔ̀n ndù nye le bɩ́ yɔ nyɛ́n die tɛ̀, ke dú kɛ nyɛ mrɛ́n yɔ ɛnhyà mɛ̀n nyɛ sɔhɔ́! Nyɛ́n ẅɛn ɛnhyɔ̀bɔ̀-nyrì nyɛ́n vru nyɛ́n tán anwrɔn ndɔ hɔ̀n, ɛnhyɔ̀bɔ̀-nyri léyi ɛnjansù dú ɛmɛ̀n nɔn: nyɛ́n bɩ́ tɛ́ y'ɛceci hɔ̀n léyi, y'ɔwrɔnẅì ankàtro ci-hán brá dú edomɛ̀n nɔn mán ɛkɔrɛ̀.

Ɛmɛẅi trɔ mrɛ́n

²⁴ Ɔwrɔn léyi kɛ lɛ wá nyɛ̀n ɛkɔrɛ̀ ebore mɛ̀n, ô kɛ̀ hán nyɛ̀n nyɛ́n dú ɛfifiemɛ̀n nyɛ́n srɔ pɔpüɛ̀ vriemɛ̀n n'eci-zrɔ zìwú nɔn,

²⁵ Ɔwɔ zri, bɔ́ bɩdie-wrɔn, Zhezü-Krisì bɔ́ Ẅɛnwrɔn bɩmɛ̀n, eci-zrɔ, evrisì, ɛkɔrɛ̀srɔn mán ɛkɔrɛ̀levri dú nɛ tɛn, ɛnkrubɔmɛ̀n, zɛtɛ̀ mán ɛnvra lɔ fɛn! Kè dú ɔmu lɔ.