Zhan 6 - Ɛmɛẅi ankà ankrànkràn 2003

Zhezü tán anwrɔn tɛbrú-kru-ɛnrì ɛci-zî

¹ Ndɔ lɔ mɛẅi lɔ, Zhezü hɔ́n Galile nɛnbà cɛ mɛẅi (Nɛnbà cɛ léyi ye bi Tiberiadɛ̀n nɛnbà nɔn).

² Fɛcüè vri tɔ̀n kɛ kɛ́n nɛ̀n ɛsɛ̀n, ɔmuhi anwrɔn kɛ kán anvɛmɛ̀n-frɛ́n-ci léyi nɛ hán kɩ ɛnlɔẅiɛ-bɔ̀ kɛ kɔrɛ̀ nɔn.

³ Zhezü hɔ́n ɛnkpò cɛ tɔ̀n wú yɛ́, nɛ́n mán n'ɛsɛnkɛn-bɔ̀ mɛhi.

⁴ Abùtùkumɛ́n-kɔ́ nyanmán-bì, léyi dú Zhüifɛ̀n-bɔ̀ koran-bì nɔn, kɛ́n eburi.

⁵ Zhezü nyan, kɩ kán fɛcüè vri tɔ̀n léyi ke ji nɛ̀n nvà nɔn; zɛtɛn nɛ dɔ́ Filipɛ̀n le: “Tɛyri de bɔ́ lɛ cɔ́ ɛci, bɔ̀ wɔ̀ bɔ̀ tán anwrɔn lɔ fɛn kè zî nɛ́n?”

⁶ (Nɛ dɔ́ ɔmu lɔ, ô nɛ̀n kán ankà léyi Filipɛ̀n kɛ lɛ dɔ̀ nɔn, ɔmuhi Zhezü tɛ́n nyri eci léyi nɛ lɛ hán nɔn.)

⁷ Filipɛ̀n mrɛ́n nɛ̀n ɔmùan le: “Ke dú kɛ bɔ̀ ẅɛn kɔprɛ̀ ɛkoẅi-ɛvà mán, bɔ́ sɩ̀ wɔ́ ɛci kɛ̀ cɔ́ anwrɔn lɔ fɛn rɔ́.”

⁸ Zhezü sɛnkɛn-bɔ̀ lɔ, ɔtɔ̀n, ye bi Andre, Simɔn-Piɛrɛ̀n nɛ́n muan-ẅì, kɛ dɔ́ nɛ̀n le:

⁹ “Ɛnu lɔ, ɛncɔnwrɔn-ẅì tɔ̀n ẅɛn abutùkumɛ́n ɛnrì mán ɛcàn anhyrɛ̀. Tɛ́n, ecitan de abutùkumɛ́n ɛnrì mán ɛcàn anhyrɛ̀ lɔ kɛ lɛ hán nɛ́n?”

¹⁰ Zɛtɛn Zhezü kɛ dɔ̀ le: “Nyɛ́n hán anwrɔn lɔ fɛn kè vrìyɛ́.” (Nanvrɛn lɔ ɛfí bobrebe dù.) Zɛtɛn yɔ lɔ fɛn yɔ yɛ́, yɔ dú anwrɔn tɛ̀brú-kru-ɛnrì.

¹¹ Zhezü bɩ́ abutùkumɛ́n hɔ̀n lɔ, kɩ ɛnvra léyi nɛ̀n tán Ɔwɔ ɔkuɛ̀n trɔ nɔn, nɛ̀n dɛ́ abùtùkumɛ́n nɛ̀n tán anwrɔn hɔ̀n léyi yɛ́ nanvrɛn lɔ nɔn. Nɛ̀n vru nɛ̀n tán yɔ ɔmu zri lɔ, ɛcàn mán, hɩ léyi yɔ ji nɔn.

¹² Ɛnvra léyi yɔ lɔ fɛn yɔ zî ɛci fɔ́n yɔ nɔn, Zhezü kɛ dɔ́ n'ɛsɛnkɛn-bɔ̀ lɔ le: “Nyɛ́n jrɔ ɛci sùsù hɔ̀n léyi wɔrɔ nɔn, ô ɛci ẅì zriɛmɛ́n ke bɩ́ zrɛ́n hán.”

¹³ Yɔ jrɔ ɛci hɔ̀n léyi wɔrɔ nɔn, yɩ́ ankɛ́ ɛvà-anhyrɛ̀.

¹⁴ Anwrɔn hɔ̀n léyi kán anvɛmɛ̀n-frɛ́n-ci léyi Zhezü hán nɔn, kɛ dɔ̀ le: “Ɔwrɔn ndɔ lɔ, nɛ̀n dú Ɔwɔ-mùanwú-ankà-dɔ́-wrɔn annanwɔrɛ léyi, ke ji le kɛ̀ vá ɛnhibù wú nɔn!”

¹⁵ Zhezü ke nyri ɔmu le, yɔ lɛ và yɔ ẅɛ̀n nɛ̀n ecüemɛ̀n, ô yɔ srɔ nɛ̀n ɛnnɛ̀ncüì. Kɩ nɛ̀n vru nɛ̀n mrɛ́n n'edomɛ̀n nɛ̀n hɔ́n ɛnkpò cɛ wú nɛ́n zri.

Zhezü kɛ nán esù nɛnbà cɛ wú

¹⁶ Ɛnvra léyi ɔwɔɛmɛ̀n ncɔ̀ nɔn, Zhezü sɛnkɛn-bɔ̀ hɔ́n nɛnbà cɛ gbàtà mùan,

¹⁷ yɔ bru anhàka tɔ̀n mɛ̀n kɩ yɔ vɔ́n nɛnbà cɛ shi lɔ yɔ hɔ́n Kapɛrnahümɛ̀n anmàn. Ɛnnyran mán gɔ́n hán, kɩ Zhezü kɛ vá cɔ́ yɔ.

¹⁸ Nɛnbà cɛ shi lɔ ke fù, ɔmuhi ɛndɔnwrɔn kɛ cüɛ́n ɛcüemɛ̀n nɔn.

¹⁹ Ɛsɛ̀nkɛn-bɔ̀ lɔ wɔ́ ɛvrà anhɛ́-kɔrɛ̀ tɛ̀buri-kru-ɛnrì kɛ hɔ́n ɛwole, ɛnvra léyi yɔ kán Zhezü kɛ sɔnba anhàka tɛsɛ̀n, kɛ nán esù ɛnshi wú; kɩ ɛnjansù bru yɔ.

²⁰ Tɛ́n Zhezü kɛ dɔ́ yɔ le: “Mɛ̀n Zhezü, ɛnjansù ke bɩ́ ẅɛn nyɛ̀n!”

²¹ Ɛsɛ̀nkɛn-bɔ̀ lɔ ke ji kè bɩ́ nɛ̀n kè di anhàka mɛ̀n, kɩ ɛnvra zri lɔ anhàka ẅɛn ɛnhi ɛyri léyi yɔ hɔ̀n nɔn.

Fɛcüè ke ji Zhezü

²² Ɛnvra léyi ɛcɛ̀n cüe nɔn, fɛcüè léyi nyɔn nɛnbà cɛ mɛẅi nɔn, kán ɔmu le anhàka zri kɩ wɔrɔ dú nɛnbà gbàtà mùan; anwrɔn nyri ɔmu le Zhezü kè sɩ̀ brù anhaka lɔ mɛ̀n nɛ́n mán n'ɛsɛ̀nkɛn-bɔ̀ mɛhi tɛ́n yɔ zri kɩ yɔ hɔ̀n.

²³ Tɛ́n anhàka ndɔ hɔ̀n léyi dú Tiberiadɛ̀n anmàn nvà nɔn, cɔ́ ɛyri léyi Ɛẅɛnwrɔn tán Ɔwɔ ɔkuɛ̀n n'ɛtɛ̀sɛ̀n, yakɛ yɔ rá abutùkumɛ́n lɔ nɔn.

²⁴ Ɛnvra léyi anwrɔn kán ɔmu le, Zhezü mán n'ɛsɛ̀nkɛn-bɔ̀, yɔ d'anhyrɛ̀ lɔ, nzri mán bàdà nɛnbà gbatà mùan, kɩ yɔ ku anhàka ndɔ hɔ̀n lɔ mɛ̀n ye ji Zhezü hɔ́n Kapɛrnahümɛ̀n anmàn.

Zhezü, ɛwúvà ci-zî

²⁵ Yɔ cɔ́ Zhezü nɛnbà cɛ mɛẅi, kɩ yɔ dɔ́ nɛ̀n le: “Ankà-yé-wrɔn, ɛnvra tán de è bru ɛnu lɔ nɛ́n?”

²⁶ Zhezü mrɛ́n yɔ ɔmùan le: “Mɛ dɔ́ nyɛ̀n annanwɔrɛmɛ̀n le: nye ji mɛ̀n ɔmuhi nyɛ́n cɔ́ abutùkumɛ́n nyɛ́n rá fɔ́n nyɛ̀n, kɩ kè sɩ̀ dù anvɛmɛ̀n-frɛ́n-ci hɔ̀n léyi mɛ hán nɔn, hɩ mɛ̀n de nyɛ́n cɔ̀ nyɛ́n nyrì nɔn kruhú.

²⁷ Nyɛ́n bɩ́ hán ɛci-zî léyi kɛ jrɛ́ nɔn, n'ɔkɔhɔ̀n, tɛ́n nyɛ́n ji ɛci-zî léyi dú ɛnvra lɔ fɛn, hɩ kɛ tán ɛwúvà léyi ke sɩ́ trɔa nɔn. Ɛci-zî ndɔ lɔ, ɔwrɔnẅì Ẅì kɛ lɛ tán nyɛ̀n nɛ́n, ɔmuhi Ɔwɔ Zi di nɛ̀n n'ɛkorɛ̀srɔn nrɛ̀n edomɛ̀n nɔn.”

²⁸ Zɛtɛn yɔ yrɛ nɛ̀n le: “Ecitan de bɔ́ lɛ hán, ô kè dú Ɔwɔ kɔrɛzì ci-hán nɛ́n?”

²⁹ Zhezü mrɛ́n yɔ ɔmùan le: “Eci-hán-ci léyi Ɔwɔ ke ji ny'ɛmɛ̀n nɔn, dú hɩ le ɔwrɔn léyi nɛ̀n wá ɔkɔhɔ̀n nɔn, nyɛ́n bú n'ankà nyɛ́n tán ankàẅì.”

³⁰ Yɔ dɔ́ nɛ̀n le: “Anvɛmɛ̀n-frɛ́n-ci tán de ɛ lɛ hán ɛ̀ tán bɔ̀, bɔ̀ kàn, ô bɔ̀ bú v'ankà bɔ̀ tán ankaẅì nɛ́n? Ɔkɔhɔ̀n tán de ɛ lɛ hán nɛ́n?

³¹ Bɔ́ nancüì hɔ̀n zî ɛci léyi dú anhobɩ́ cüe ɛnnuẅì, Mohizì vra lɔ, hán ɔmu le Owrú Prɔprɔn ndɔ nɔn: ‘Nɛ̀n tán yɔ ɛci-zî léyi dú anhobɩ́ và nɔn.’ ”

³² Zhezü mrɛ́m yɔ ɔmùan le: “Mɛ dɔ́ nyɛ̀n, annanwɔrɛ mɛ̀n le: Ke sɩ̀ dù Mohizì de kɛ̀ tán nyɛ̀n ɛci-zî léyi dú anhobɩ́ và nɔn, tɛ́n Dade de kɛ tán nyɛ̀n anhobɩ́ ci-zî annanwɔrɛ nɔn.

³³ Ɔmuhi ɛci-zî léyi Ɔwɔ kɛ tán nɔn, dú ɛci léyi dú anhobɩ́ kakɛ hɩ kɛ tán ɛnhibù ɛwúvà kɔrɛ̀ nɔn.”

³⁴ Zɛtɛn yɔ dɔ́ Zhezü le: “Ankà-yé-wrɔn ɛ̀ tán bɔ̀ ɛnvra lɔ fɛn ɛci-zî ndɔ lɔ.”

³⁵ Zhezü kɛ dɔ́ yɔ le: “Mɛ̀n dú ɛwúvà ci-zî. Ɔwrɔn léyi kɛ vá m'eyri nɔn, ɔmùanwù kè sɩ̀ vru ẅɛn nɛ̀n mrìmrì, kɩ ɔwrɔn léyi ke bú m'ankà kɛ tán ankaẅì nɔn ɛnshi mùanwù mán kè sɩ̀ vru ẅɛn nɛ̀n mrìmrì.

³⁶ Tɛ́n mɛ̀n dɔ́ nyɛ̀n: nyɛ́n kán mɛ̀n, ɔmu tɛ̀kɩ nyɛ́n sɩ̀ bùtan ankàẅì.

³⁷ Anwrɔn hɔ̀n léyi Dade kɛ tán mɛ̀n nɔn, ɔwrɔnwrɔn kɛ lɛ vá m'eyri, kɩ mɛ́n sɩ̀ wrɔ́ ɔwrɔn léyi kɛ vá m'eyri nɔn mrìmrì;

³⁸ ɔmuhi mɛ̀n dú anhobɩ́ mɛ́n kàkɛ, ô mɛ̀n hán ɔwrɔn léyi wá mɛ̀n ɔkɔhɔ̀n mɛ́n và nɔn, n'ɛkɔrɛzì-ci, tɛ́n kè sɩ̀ dù mɛ tɛn léyi me ji nɔn.

³⁹ Nyàn eci léyi ɔwrɔn léyi wá mɛ̀n ɔkɔhɔ̀n, ke jɩ nɔn: Ke sɩ́ ji le, anwrɔn hɔ̀n léyi nɛ̀n tán mɛ̀n nɔn ɛnzriemɛ́n kɛ̀ zrɛ́n, tɛ́n ke ji le, yɔ lɔ fɛn, mɛ̀n hán yɔ, yɔ dú owú-bɔ̀ mɛ̀n yɔ vá ɔkɔrɛ-bɔ̀ mɛ̀n ɛmɛẅi trɔ bì lɔ.

⁴⁰ Hɛ̀ɛ̀, nyàn eci léyi Dade ke ji nɔn: ke ji le anwrɔn hɔ̀n léyi kɛ kán ɔwrɔnẅì Ẅì, kɩ ke bú n'ankà kɛ tán ankaẅì nɔn, kɛ̀ cɔ́ ɛwúvà léyi ke sɩ́ trɔa, ô mɛ̀n bɩ́ yɔ lɔ fɛn owú-bɔ̀ mɛ̀n mɛ́n sɩ́ ɔkɔrɛ-bɔ̀ mɛ̀n ɛmɛẅi trɔ bì lɔ.”

⁴¹ Zhüifɛ̀n-bɔ̀ ke bɩ́ ɛmɛnhyì ku Zhezü ɛwú ɔmuhi nɛ́n dɔ̀ le: “Mɛ̀n dú ɛci-zî léyi dú anhobɩ́ kakɛ nɔn.”

⁴² Zhüifɛ̀n-bɔ̀ ke yrɛ y'edomɛ̀n le: “Kè sì dù nɛ́n Zhezü, Zhozɛfɛ̀n ẅì lɔa? Bɔ́ nyri nɛ́n zi mán nɛ́n muan. Anhɔntan de zɛtɛ̀ lɔ, nɛ dɔ̀ le, nɛ̀n dú anhobɩ́ nɛ́n kakɛ nɛ́n?”

⁴³ Zhezü mrɛ́n yɔ ɔmùan le: “Nyɛ́n bɩ́ bɩ́ ɛmɛnhyì nyɛ́n ku ny'edomɛ̀n ɛwú.

⁴⁴ Ɔwrɔn zriɛmɛ̀n ke sɩ̀ vá m'eyri ke dú kɛ Dade léyi wá mɛ̀n ɔkɔhɔ̀n nɔn ke sɩ̀ yé nɛ̀n ɛnlevri, kɩ mɛ tɛn, me le bɩ́ nɛ̀n mɛ̀n sɔhɔ́ owú-bɔ̀ mɛ̀n, ô mɛ̀n sɩ́ nɛ̀n ɔkɔrɛ-bɔ̀ mɛ̀n ɛmɛẅi trɔ bì lɔ.

⁴⁵ Ɔwɔ-mùanwú-ankà-dɔ́-bɔ̀ merɛ́n ankà ndɔ lɔ: ‘Yɔ lɔ fɛn Ɔwɔ kɛ lɛ tán yɔ ɛnkruemɛ̀n-ẅɛ̀n’. Ɔwrɔn totɔtɔ̀n léyi ke die Dade nukùɛ hɩ kɛ cɔ́ n'ankà-yé lɔ nɔn, kɛ vá m'eyri.

⁴⁶ Ndɔ lɔ hɩ mɛ̀n ke sɩ́ dɔ́ le ɔwrɔn tɔ̀n kán Dade, nɛ́n zri léyi nɛ̀n dú Ɔwɔ yri nɛ́n và nɔn, nɛ̀n kán Dade.

⁴⁷ Mɛ dɔ́ nyɛ̀n annanwɔrɛ mɛ̀n le: Ɔwrɔn léyi kɛ ẅɛn ankaẅì-bùtan nɔn, ɛwúvà léyi ke sɩ́ trɔa nɔn dú nɛ tɛn.

⁴⁸ Mɛ̀n dú ɛwúvà ci-zî.

⁴⁹ Nyɛ́n nancüì hɔ̀n zî ɛci léyi dú anhobɩ́ cüe ɛnnuwì kɩ yɔ wù.

⁵⁰ Tɛ́n, ɛci-zî léyi dú anhobɩ kakɛ nɔn, dú ɛci léyi, ke dú kɛ̂, ɔwrɔn ke zî nɛ̀n hô, nɛ́n sɩ̀ wù.

⁵¹ Mɛ̀n dú ɛci-zî kɔrɛkɔrɛ léyi dú anhobɩ́ kakɛ nɔn. Ke dú kɛ, ɔwrɔn ke zî ɛci ndɔ lɔ, ne le dú ɔkɔrɛ mɛ̀n ɛnvra lɔ fɛn. Ɛci-zî léyi mɛ lɛ tán nɔn dú m'edùwrú; mɛ tán ɛci-zî ndɔ lɔ hô, ɛnhibù ke dú ɔkɔrɛ mɛ̀n.”

⁵² Ankà ndɔ lɔ wú, Zhüifɛ̀n-bɔ̀ kɛ wrɔ́n ecüì ɛshishiemɛ̀n y'angranmɛ̀n. Yɔ yrɛ y'edomɛ̀n le: “Anwɔntan de ɔwrɔn ndɔ lɔ kɛ lɛ tán bɔ̀ n'anẅia bɔ̀ rá nɛ́n?”

⁵³ Zhezü kɛ dɔ́ yɔ le: “Mɛ dɔ́ nyɛ̀n annanwɔrɛmɛ̀n le: ke dú kɛ nyɛ́n sɩ̀ rà ɔwrɔnẅì Ẅì ẅia, kɩ nyɛ́n sɩ̀ mì n'ɛnkrɛ̀, ɛwúvà-kɔrɛ̀ ke sɩ̀ dú nyɛ̀n ɛmɛ̀n.

⁵⁴ Ɔwrɔn léyi kɛ rá m'anẅia hɩ ke mi m'ɛnkrɛ̀ nɔn, nɛ cɔ́ ɛwúvà-kɔrɛ̀ léyi ke sɩ̀ trɔa nɔn, kɩ me le bɩ́ nɛ̀n owú-bɔ̀ mɛ̀n mɛ̀n sɔhɔ́, ô mɛ̀n sɩ́ nɛ̀n ɔkɔrɛ-bɔ̀ mɛ̀n ɛmɛẅi trɔ bì lɔ.

⁵⁵ Ɔmuhi m'anẅia dú ɛci-zî annanwɔrɛ̀, kɩ m'ɛnkrɛ̀ dú ɛnshi mì annanwɔrɛ nɔn.

⁵⁶ Ɔwrɔn léyi kɛ rá m'anẅia, hɩ ke mi m'ɛnkrɛ̀ nɔn, n'ɛwúvà dú mɛ̀n ɛmɛ̀n, kɩ mɛ̀n dú nɛ̀n ɛmɛ̀n.

⁵⁷ Dade léyi wá mɛ̀n ɔkɔhɔ̀n nɔn, dú ɔkɔrɛ mɛ̀n kɩ mɛ́n kɔrɛ̀ mɛ̀n dú nɛ̀n ɛmɛ̀n; hɩ zri lɔ, ɔwrɔn léyi kɛ rá mɛ̀n nɔn, nɛ́n kɔrɛ̀ nɛ̀n dú mɛ̀n ɛmɛ̀n.

⁵⁸ Nyàn ɛci-zî léyi dú anhobɩ́ kakɛ nɔn: nɛ̀n sɩ̀ dù nɛ̀n hàn hɩ le nyɛ́n nancüì hɔ̀n rá, kɩ nwù nɔn. Ɔwrɔn léyi ke zî ɛci ndɔ lɔ nɔn, ne le dú ɔkɔrɛ mɛ̀n ɛnvra lɔ fɛn.”

⁵⁹ Ankà-dɔ̀ ndɔ lɔ de dú Zhezü anmùan mɛ̀n ɛnvra léyi ne yé yɔ ankà kapernahümɛ̀n Wɔ-sɛ́n-wɔn lɔ mɛ̀n nɔn.

Ɛwúvà léyi ke sɩ́ trɔa nɔn n'ankà-dɔ̀

⁶⁰ Ɛnvra léyi yɔ yá Zhezü ankà-dɔ̀ lɔ trɔ nɔn, Zhezü sɛnkɛn-bɔ̀ bobrebe kɛ dɔ̀ le: “Ɛnu lɔ nɛ́n dɔ̀ fɛ́ ɛwú! Anhɔntan de ye le shri ankà-dɔ̀ ndɔ lɔ nɛ́n?”

⁶¹ Zhezü ke nyri ɔmu le, n'ɛsɛ̀nkɛn-bɔ̀ lɔ kɛ dɔ́ n'ankà, ankà ndɔ lɔ wú. Hán tán kɩ nɛ dɔ́ yɔ le: “Ankà ndɔ lɔ ke di nyɛ̀n edùɛ?

⁶² Zɛtɛn ecitan de kɛ lɛ wɔɛ̀n ke dú kɛ nyɛ kán ɔwrɔnẅì Ẅì ke vru ɛmɛẅi kɛ hɔ́n ɛyri léyi nɛ́n gɔ́ dù nɛ́n và nɛ́n?

⁶³ Ɛnhɛ́n Prɔnprɔn de kɛ tán ɔkɔrɛ̀; ɔwrɔnẅì zri ke sɩ̀ srɔ eci kru mù. Ankà-dɔ̀ hɔ̀n léyi mɛ̀n tán nyɛ̀n nɔn dú Ɛnhɛ̀n mán Ɔkɔrɛ̀.

⁶⁴ Tɛ́n ny'ɛmɛ̀n lɔ anwrɔn janbɔ̀ ke sɩ́ bútan ankaẅì.” Ɔmuhi Zhezü nyri ɛnkrubɔmɛ̀n hán hɛ́n anwrɔn hɔ̀n léyi ke sɩ́ bútan ankaẅì, kɩ nɛ̀n nyri ɔwrɔn léyi kɛ lɛ hɛ́ nɛ̀n nɔn.

⁶⁵ Zhezü kɛ dɔ̀ le: “Nyàn eci le kruhú léyi mɛ̀n dɔ́ nyɛ̀n le ɔwrɔn zriɛmɛ́n ke sɩ̀ vá m'eyri ke dú kɛ Ɔwɔ kè sɩ̀ tán nɛ̀n ɛkɔrɛ̀-levri.”

⁶⁶ Ɛnvra lɔ mɛ̀n, n'ɛsɛnkɛn-bɔ̀ bobrebe mrɛ́n y'edomɛ̀n sɔhɔ́ kɩ ke sɩ́ vru kɛ́n nɛ̀n ɛsɛ̀n hàn.

⁶⁷ Zhezü kɛ dɔ́ n'ɛsɛnkɛn-bɔ̀ ɛvà-anhyrɛ̀ lɔ le: “Nyɛ́n mán nye ji nyɛ́n hɔ̀n hàn?”

⁶⁸ Simɔn Piɛrɛ̀n mrɛ́n nɛ̀n ɔmùan le: “Ɛẅɛnwrɔn antɔn yri de bɔ́ lɛ hɔ̀n nɛ́n? Ɛ̀ ẅɛn ankà-dɔ̀ léyi kɛ tán ɛwúvà léyi ke sɩ́ trɔa nɔn.

⁶⁹ Zɛtɛ̀ lɔ, bɔ́ bútan ankaẅì kɩ bɔ̀ nyri ɔmu le è dú Prɔnprɔn-Wrɔn léyi dú Ɔwɔ yri và nɔn.”

⁷⁰ Zhezü mrɛ́n yɔ ɔmùan le: “Mɛ̀n sɩ̀ mrɛ́n nyɛ́n, anwrɔn ɛvà-anhyrɛ̀ lɔ mɛ̀n bɩɛ? Ɔmu tɛ̀kɩ ny'ɛmɛ̀n lɔ ɔwrɔn tɔ̀n dú anwa-wrɔn!”

⁷¹ Zhezü kɛ dɔ́ Zhüda ankà, Simɔn Iskariɔtɛ̀n ẅì. Ɔmuhi Zhüda léyi dú n'ɛsɛnkɛn-bɔ̀ lɔ ɔtɔ̀n nɔn de kɛ lɛ hɛ́ nɛ̀n nɔn.