Zhan 2 - Ɛmɛẅi ankà ankrànkràn 2003

Eyri-mùan-wá Kana anmàn

¹ Ɛbi anhyrɛ̀ vacì, kɩ Kana anmàn lɔ, Galile kpɔsɔ wú, eyri-bɔ̀ anhyrɛ̀ kɛ wá ɔmùan. Zhezü nɛ́n muan mán dú nanvrɛn,

² kɩ ye bi Zhezü mán n'ɛsɛnkɛn-bɔ̀ eyri-koran lɔ mɛ̀n.

³ Ɛnvra léyi ɛntàn trɔ yɔ nɔn, Zhezü nɛ́n muan kɛ dɔ́ n'ɛnẅì le: “Ɛntàn trɔ yɔ.”

⁴ Tɛ́n Zhezü mrɛ́n nɛ̀n ɔmùan le: “Nman, vɛ́n de ɛ lɛ dɔ́ mɛ̀n eci léyi ke ji le mɛ̀n hán nɛ́n? M'ɛnvra kɛ vá cɔ̀.”

⁵ Zɛtɛn Zhezü nɛ́n muan kɛ dɔ́ ɛci-bɩtan-bɔ̀ lɔ le: “Nyɛ́n hán eci lɔ fɛn léyi nɛ wá tán nyɛ̀n nɔn.”

⁶ Nanvrɛn lɔ, ɛnsî ɛwole de ndù nɔn, kɩ ɛnsî ndɔ hɔ̀n lɔ de ZhƐifɛ̀n-bɔ̀ ke ku ɛnshi ɛmɛ̀n ke juru edomɛ̀n hán ɔmu le Ɔwɔ-wɔn nyànmàn kɛ wá tán nɔn. Ɛnsî zri lɔ ke le bɩ́ ɛnshi-wɔɛ́n-ci ɛkoẅi-ɛnrì.

⁷ Zhezü kɛ dɔ́ ɛci-bɩtan-bɔ̀ lɔ le: “Nyɛ́n ku ɛnshi kè yɩ́ ɛnsî hɔ̀n lɔ.” Yɔ ku ɛnshi yɩ́ ɛnsî hɔ̀n lɔ.

⁸ Zɛtɛn Zhezü kɛ dɔ́ yɔ le: “Nyɛ́n wúyɛ zɛtɛ lɔ ɛnshi lɔ jan nyɛ́n hɔ̀n sɩ́ ɛkoran-nɛ́n-zi.” Yɔ wúyɛ ɛnshi lɔ yɔ hɔ́n sɩ́ ɛkoran-nɛ́n-zi.

⁹ Ɛkoran-nɛ́n-zi mi ɛnshi léyi srɔ ɛntàn nɔn. Nɛ́n sɩ́ nyri ɛyri léyi ɛntàn ndɔ lɔ dù kɛ và nɔn. Tɛ́n ɛci-bɩtan-bɔ̀ léyi wúyɛ ɛnshi lɔ nɔn nyrì. Ɛkoran-nɛ́n-zi bi ɛnnyɔnwrɔn-nɛ́n-cüì

¹⁰ kɩ kɛ dɔ́ nɛ̀n le: “Anwrɔn lɔ fɛn, eyri-koran lɔ fɛn mɛ̀n, yɛ gɔ́ tán yɔ ɛntàn ankrànkràn ye mì, zɛtɛn, ɛnvra léyi anwrɔn ke mi ɛntàn kɛ fɔ́n yɔ nɔn, ye sɩ́ ɛntàn léyi ecüì bàda ɛmɛ̀n nɔn ɛntrɛ. Vɛ tɛn, è bɩ́ ɛntàn anvrɛnvrɛn lɔ ɛ̀ hɛ́n, hàn mán cɔ́ zɛtɛ̀ lɔ!”

¹¹ Nyàn ɔmu lɔ de Zhezü hán nɛ́n kpàkpà anvɛmɛ̀n-frɛ́n-ci, Kana anmàn, Galile kpɔsɔ wú; nɛ̀n yé n'ecizrɔ, kɩ n'ɛsɛnkɛn-bɔ̀ bú n'ankà lɔ tán ankaẅì.

¹² Ndɔ lɔ mɛẅi, Zhezü mán nɛ́n muan, nɛ́n muan-ẅì hɔ̀n mán n'ɛsɛnkɛn-bɔ̀ mɛhi hɔ́n kapernahümɛ̀n anmàn. Yɔ yɛ́ nanvrɛn lɔ ɛnvra jan tɛ̀kɩ.

Zhezü dú Ɔwɔ-cice-wɔn lɔ mɛ̀n

¹³ Zhüifɛ̀n-bɔ̀ abutùkumɛ́n-kɔ́ nyanmán-bì lɔ, kɛ́n eburi kɩ Zhezü hɔ́n ZherƐzalɛmɛ̀n anmàn.

¹⁴ Ɔwɔ-cice-wɔn lɔ mɛ̀n, nɛ̀n cɔ́ anwrɔn kɛ hɛ́ ɛnnanmán, kɔkɔsɛ̀ mán brɛndre; nɛ̀n vru nɛ̀n cɔ́ ɔkùa-crɔn-bɔ̀ yɛ́ yɔ tɛbrɛ̀ lɔ wú.

¹⁵ Zɛtɛn Zhezü bɩ́ anhɛ́ hán ngbele wrɔ́ yɔ lɔ fɛn Ɔwɔ-cice-wɔn lɔ mɛ̀n cüe ɛntrɛa, yɔ mán yɔ kɔ̀kɔ̀sɛ̀ hɔ̀n, mán yɔ ɛnnanmán hɔ̀n; nɛ̀n taká ɔkùa-crɔn-bɔ̀ tɛbrɛ̀ mán y'ɔkùa nɛ̀n cüe;

¹⁶ kɩ nɛ dɔ́ brɛndre-hɛ́-bɔ̀ le: “Nyɛ́n bɩ́ ndɔ lɔ fɛn nyɛ́n sɔhɔ́ ɛnu lɔ! Nyɛ́n bɩ́ bɩ́ Dade wɔn lɔ, nyɛ́n srɔ anhàn-zhrɛ-wɔn!”

¹⁷ Owrú Prɔnprɔn ankà-dɔ̀ ndɔ lɔ bru n'ɛsɛnkɛn-bɔ̀ lɔ: “Ɛcüɛ̀n léyi mɛ̀n ẅɛ́n v'ɔwɔn lɔ wú nɔn, ô Ɔwɔ, ke le wrú mɛ̀n edomɛ̀n kɛ lɛ hán ɛnhyà hɔ́.”

¹⁸ Zɛtɛn, Zhüifɛ̀n-bɔ̀ cüìcüì hɔ̀n kɛ yrɛ Zhezü le: “Anvɛmɛ̀n-frɛ́n-ci tán de ɛ lɛ hán ɛ̀ tán bɔ̀, ô bɔ̀ nyrì le, ɛ̀ ẅɛ́n ɛkɔrɛ̀levri eci ndɔ léyi ɛ hán nɔn wú nɛ́n?”

¹⁹ Zhezü mrɛ́n yɔ ɔmùan le: “Nyɛ́n gbe Ɔwɔ-cice-wɔn ndɔ lɔ, kɩ ɛbi-anhɔ̀n granmɛ̀n, mɛ lɛ sàn ku nɛ̀n.”

²⁰ Yɔ dɔ́ nɛ̀n le: “Ye bɩ́ ɛnnanwàn ɛkoẅi-anhyrɛ̀ mán ɛẅì ɔwolɛ de ye ku Ɔwɔ-cice-wɔn ndɔ lɔ nɔn, tɛ́n vɛ́n, ɛ dɔ̀ le, e le ku nɛ̀n ɛbi-anhɔ̀n granmɛ̀n hàn?”

²¹ Tɛ́n Ɔwɔ-cice-wɔn léyi Zhezü kɛ dɔ́ n'ankà nɔn, dú n'edùwrú lɔ.

²² Ɛnvra léyi Zhezü dú owúemɛ̀n frɔ́ nɔn, bru n'ɛsɛ̀nkɛn-bɔ̀ le Zhezü dɔ́ ankà ndɔ lɔ; kɩ yɔ bú Owrú Prɔnprɔn mán Zhezü ankà tán ankaẅì.

Zhezü nyri ɔwrɔnẅì bɔrɛ lɔ anvrɛnvrɛn

²³ Ɛnvra léyi Zhezü dú Zherüzalɛmɛ̀n anmàn nɔn, abutùkumɛ́n-kɔ́ nyanmán-bì vra lɔ, anwrɔn bobrebe bú n'ankà tán ankaẅì, ɔmuhi yɔ kán anvɛmɛ̀n-frɛ́n-ci léyi nɛ hán nɔn.

²⁴ Tɛ́n Zhezü kè sɩ̀ ẅɛ̀n esɛ́ zriɛmɛ́n y'ɛwú, ɔmuhi nɛ̀n nyri yɔ lɔ fɛn anvrenvrɛn nɔn.

²⁵ Nɛ́n sɩ́ ji yɛ dɔ́ nɛ̀n anwrɔnẅì domɛ̀n ankà, ɔmuhi nɛ́n mumù nɛ̀n nyri y'ɛnbɔrɛ mɛ̀n ankà nɔn.