Zhan 19 - Ɛmɛẅi ankà ankrànkràn 2003

¹ Zɛtɛn Pilatɛ̀n wá tán le ye bɩ́ Zhezü yɔ hɔ̀n, ô yɛ cüran ngbrè.

² Gɔliɛ-bɔ̀ hán ɛwi kplo wá Zhezü ɛnkru; yɔ cɔ́ nɛ̀n ɛceci she wɔnsɛn.

³ Yɔ sɔnba nɛ̀n ɛtɛsɛ̀n kɩ yɔ dɔ́ nɛ̀n le: “Bɔ bi mɛ́n nyan, Zhüifɛ̀n-bɔ̀ nɛncüi!” Kɩ yɔ cüran nɛ̀n ansá anvɛmɛ̀n.

⁴ Pilatɛ̀n vru srɔ ɛntrɛ kɩ kɛ dɔ́ fɛcüè le: “Nyɛ́n die nukùɛ, me le sɩ́ nɛ̀n ɛnu ɛntrɛ, ô nyɛ́n nyrì le mɛ́n sɩ́ cɔ́ nwùbɔ́ ankà zriɛmɛ́n ɔwrɔn ndɔ lɔ wú.”

⁵ Zhezü srɔ ɛntrɛ zɛtɛn; ɛwi kplo dú nɛ̀n ɛnkru kɩ nɛ̀n cɔ́ ɛceci she wɔnsɛn. Pilatɛ̀n kɛ dɔ́ yɔ le: “Nyàn ɔwrɔn lɔ!”

⁶ Tɛ́n ɛnvra léyi Ɔwɔ-cice-bɔ̀ cüìcüì hɔ̀n mán ɛyri-nan-bɔ̀ kán nɛ̀n nɔn, yɔ di bobo yɔ dɔ̀ le: “Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n! Gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n!” Pilatɛ̀n ke dɔ́ yɔ le: “Nyɛ́n bɩ́ nɛ̀n, ô nyɛ́n mumù nyɛ́n gɔ́n nɛ̀n brɛ́ ɛgbàn-hán-tɛ̀ tɔ̀n domɛ̀n, ɔmuhi, mɛ tɛn mɛ́n sɩ́ cɔ́ nwùbɔ́ ankà zriɛmɛ́n n'ɛwú nɔn.”

⁷ Zhüifɛ̀n-bɔ̀ mrɛ́n nɛ̀n ɔmùan le: “Bɔ̀ ẅɛn ɛnyanmàn, kɩ ɛnyanmàn lɔ wú, ke ji le nɛ̀n wù, ɔmuhi nɛ́n dɔ̀ le, nɛ̀n dú Ɔwɔ Ẅì nɔn.”

⁸ Ɛnvra léyi Pilatɛ̀n yá ankà léyi yɔ dɔ̀ nɔn, ɛnjansù vru ẅɛn nɛ̀n.

⁹ Pilatɛ̀n bru n'ebɩ́ lɔ mɛ̀n kɩ ne yrɛ Zhezü le: “Tɛyri e dù ɛ và?” Tɛ́n Zhezü ke sɩ́ mrɛ́n nɛ̀n ɔmùan.

¹⁰ Zɛtɛn, Pilatɛ̀n kɛ dɔ́ nɛ̀n le: “E sɩ́ ji ɛ dɔ́ mɛ̀n ankà hà? È sɩ̀ nyrì ɔmu le mɛ̀n ẅɛn ɛkɔrɛ̀srɔn mɛ lɛ teze mɛ́n, kɩ mɛ̀n vru mɛ̀n ẅɛn ɛkɔrɛ̀srɔn mɛ lɛ hán yɔ, yɛ gɔ́n mɛ́n brɛ́ ɛgbàn-hán-tɛ̀ tɔ̀n domɛ̀n hàn?”

¹¹ Zhezü mrɛ́n nɛ̀n ɔmùan le: “È sɩ̀ ẅɛ̀n ɛkɔrɛ̀srɔn zriɛmɛ́n m'ɛwú, ke dú kɛ kè sì dù hɩ le Ɔwɔ tán mɛ́n nɔn. Hɩ le kruhú de ɔwrɔn léyi ẅɛn mɛ̀n tán mɛ́n nɔn dú ɛgbàn mɛ̀n vrán vɛ́n.”

¹² Bukru hɩ vra lɔ, Pilatɛ̀n ke ji ɛyri ô kè teze Zhezü. Tɛ́n Zhüifɛ̀n-bɔ̀ bukru ke di bobo le: “Ke dú kɛ e teze ɔwrɔn ndɔ lɔ hô, è sɩ̀ dù bɔ́ ɛnnɛ̀ncüì lɔ nɛ́n nyran anvrɛn tɔ̀n! Ɔwrɔn totɔtɔ̀n léyi ke bɩ́ n'edomɛ̀n kɛ hán ɛnnɛ̀ncüì hɔ́ nɔn, nɛ̀n dú bɔ́ ɛnnɛ̀ncüì lɔ n'egbri wrɔn!”

¹³ Ɛnvra léyi Pilatɛ̀n yá ankà lɔ nɔn, nɛ̀n hán yɔ bɩ́ Zhezü ye sɩ́ ɛntrɛ; nɛ̀n yɛ́ ɛmrɛ̀n ci tobù wùɛ, ɛyri léyi ci ɛwú hɩ ɛmrɛ̀n-ci-wrɔn kɛ yɛ́ ke ci anwrɔn ɛmrɛ̀n nɔn (hɩ ye bi Gabàta, ebre mɛ̀n nɔn).

¹⁴ Nbì lɔ dú, abutùkumɛ́n-kɔ́ nyanmán-bì vra bì, ɛnbrishɛn mùan mɛ̀n. Pilatɛ̀n kɛ dɔ́ Zhüifɛ̀n-bɔ̀ le: “Nyàn ny'ɛnnɛ̀ncüì lɔ!”

¹⁵ Tɛ́n yɔ bukru yɔ di bobo le: “Ye wri nɛ̀n, ye wri nɛ̀n! Gɔ́n nɛ̀n brɛ́ ɛgbàn-hán-tɛ̀ tɔ̀n dòmɛ̀n!” Pilatɛ̀n kɛ dɔ́ yɔ le: “Ke ji le mɛ̀n gɔ́n ny'ɛnnɛ̀ncüì lɔ mɛ̀n brɛ́ ɛgbàn-hán-tɛ̀ tɔ̀n dòmɛ̀n hàn?” Ɔwɔ-cice-bɔ̀ cüìcüì hɔ̀n mrɛ́n ɔmùan le: “Bɔ́ ɛnnɛ̀ncüì zri lɔ de dú Sezarɛ̀n nɔn.”

¹⁶ Zɛtɛn Pilatɛ̀n tán yɔ Zhezü ô yɔ gɔ́n nɛ̀n brɛ́ ɛgbàn-hán-tɛ̀ tɔ̀n dòmɛ̀n. Zɛtɛn yɔ ẅɛn Zhezü.

Yɛ gɔ́n Zhezü yɛ brɛ́ ɛgbàn-hán-tɛ̀ tɔ̀n dòmɛ̀n

¹⁷ Zhezü srɔ anmàn kru, nɛ́n mumù nɛ̀n di n'ɛgbàn-hán-tɛ̀ lɔ anbɔ̀n, nɛ hɔ́n ɛyri léyi ye bi lokrozì nɔn (hɩ ye bi Golgota).

¹⁸ Nanvrɛn lɔ, gɔliɛ-bɔ̀ gɔ́n Zhezü brɛ́ ɛgbàn-hán-tɛ̀ tɔ̀n domɛ̀n. Ɛnvra zri lɔ, yɔ gɔ́n anwrɔn anhyrɛ̀ mán yɛ brɛ́ ɛgbàn-hán-tɛ̀ domɛ̀n kɩ Zhezü dú yɔ anwanzi.

¹⁹ Pilatɛ̀n wá tán ye merɛ́n owrú yɛ wá Zhezü gbàn-hán-tɛ̀ lɔ domɛ̀n; owrú lɔ kɛ dɔ̀ le: “Nazarɛtɛ̀n wrɔn Zhezü, Zhüifɛ̀n-bɔ̀ nɛncüì.”

²⁰ Zhüifɛ̀n-bɔ̀ bobrebe krɛ́ eci léyi ye merɛ́n nɔn, ɔmuhi ɛyri léyi yɛ gɔ́n Zhezü brɛ́ ɛgbàn-hán-tɛ̀ domɛ̀n dú anmàn tɛsɛ̀n kɩ ye merɛ́n owru lɔ Hebre, Latɛn mán grɛkɛ̀n mɛ̀n.

²¹ Zɛtɛn Zhüifɛ̀n-bɔ̀ Wɔ-cice-bɔ̀ cüìcüì hɔ̀n kɛ dɔ́ Pilatɛn le: “Ke sɩ́ ji le è teze owrú ndɔ lɔ hɩ ye merɛ́n le: ‘Zhüifɛ̀n-bɔ̀ nɛ̀ncüi’, tɛ́n ke ji le ɛ̀ wá le: ‘Ɔwrɔn ndɔ lɔ ndɔ̀ le: Mɛ̀n dú Zhüifɛ̀n-bɔ̀ nɛncüì’.”

²² Pilatɛ̀n mrɛ́n ɔmùan le: “Eci léyi mɛ̀n merɛ́n nɔn, ke ji le kè merɛ́n kɛ hɛ́n ɔmu lɔa.”

²³ Ɛnvra léyi Gɔliɛ-bɔ̀ lɔ gɔ́n Zhezü brɛ́ ɛgbàn-hán-tɛ̀ domɛ̀n trɔ nɔn, yɔ dɛ́ n'ɛceci hɔ̀n lɔ andɛ̀n-anzɔ̀, gɔliɛ-bɔ̀ anzɔ̀ lɔ ɔwrɔn zri zri bɩ́ nɛ tɛn.

²⁴ Gɔliɛ-bɔ̀ lɔ kɛ dɔ́ y'edomɛ̀n le: “Bɔ́ bɩ́ sha ɛceci-she ndɔ lɔ, tɛn bɔ̀ wá ɛnsànse ô bɔ́ nyri ɔwrɔn léyi ke le bɩ́ nɛ̀n nɔn.” Ɔmu lɔ de Owrú Prɔnprɔn ankà-dɔ̀ lɔ sá nmù nɔn. Ye merɛ́n yɛ dɔ̀ le: “Yɔ dɛ́ m'ɛceci hɔ̀n lɔ yɔ bɩ kɩ yɔ bɩ́ m'ɛceci-she lɔ yɔ wá ɛnsànse.” Nyàn eci léyi gɔliɛ-bɔ̀ lɔ hán nɔn.

²⁵ Zhezü gbàn-hán-tɛ̀ tɛsɛ̀n lɔ, Zhezü nɛ́n muan, nɛ́n muan nɛ́n kɔ̀, Mari, Klopasɛ̀n hi mán Mari, Magdala anmàn nyɔnwrɔn lɔ nyɔn nanvrɛn.

²⁶ Zhezü kán nɛ́n muan kɩ nɛ́n muan tɛsɛ̀n lɔ, n'ɛsɛnkɛn-wrɔn léyi nɛ cüɛ̀n nɔn nyɔn. Zhezü kɛ dɔ́ nɛ́n muan le: “Nmàn, nyàn v'ɛnẅì.”

²⁷ Zɛtɛn nɛ dɔ́ n'ɛsɛnkɛn-wrɔn lɔ le: “Nyàn ɔmuan.” Kɩ ɛnvra lɔ mɛ̀n, Zhezü sɛnkɛn-wrɔn lɔ bɩ́ Mari sɩ́ ebemɛ̀n.

Zhezü wú vra

²⁸ Ndɔ lɔ mɛẅi lɔ, ɔmuhi Zhezü nyri ɔmu le zɛtɛ̀ lɔ, ɛci lɔ fɛn lɔ trɔa nɔn, nɛ dɔ́ ankà ndɔ lɔ ô Owrú Prɔnprɔn ankà-dɔ̀ lɔ kɛ sá nmù: Nɛ́n dɔ̀ le: “Ɛnshi mùanwù kɛ ẅɛn mɛ̀n.”

²⁹ Nanvrɛn lɔ ɛntàn-drɔ dú tùgbúshìemɛ̀n hɛ́n. Zɛtɛn gɔliɛ-bɔ̀ bɩ́ ɛnbrà wá ɛntàn-drɔ lɔ mɛ̀n kɛ́n efise mùan, kɩ sɩ́ Zhezü ɔmùan tɛsɛ̀n.

³⁰ Ɛnvra léyi Zhezü sɔ́n ɛntàn-drɔ lɔ ɔmùan nɔn, nɛ dɔ̀ le: “Eci lɔ fɛn lɔ trɔa!” Zɛtɛn nɛ̀n sɩ́ ɛnkru ɛnhi, kɩ nɛ́n wù.

Gɔliɛ-wrɔn tɔ̀n sɔ́n Zhezü ebisɛn ɛgbroẅiè

³¹ Ɛnbì lɔ ɛjobì kɩ, Zhüifɛ̀n-bɔ̀ cüìcüì hɔ̀n ke sɩ́ ji le ɛgbàn-hán-bɔ̀ dùwrú lɔ kè dú ɛgbàn-hán-tɛ̀ dòmɛ̀n ɛnyanmán-bì lɔ, ɔmuhi ɛnyanmán-bì ndɔ lɔ dú ɛnbì vri nɔn; yɔ sán Pilatɛ̀n ɛkɔrɛ̀levri, ô yɛ bɔyɛ ɛgbàn-hán-bɔ̀ lɔ annan, ô yɛ mrɛ́n y'edùwrú lɔ yɛ sɔhɔ́.

³² Zɛtɛn gɔliɛ-bɔ̀ nvà kɩ bɔyɛ ɛgbàn-hán-bɔ̀ léyi yɔ mán Zhezü mɛhi dú ɛgbàn-hán-tɛ̀ wú nɔn annan.

³³ Ɛnvra léyi kɛ́n Zhezü nɔn, yɔ kán ɔmu le nɛ́n wùɛ; hɩ le kruhú de yɔ sɩ̀ bɔ̀yɛ nɛ̀n annan nɔn.

³⁴ Tɛ́n Gɔliɛ-wrɔn tɔ̀n bɩ́ ebisɛn sɔ́n nɛ̀n ɛgbroẅiè kɩ ɛnkrɛ̀ mán ɛnshi mɛhi srɔ ɛntrɛ ɛnvra zri lɔ.

³⁵ Ɔwrɔn léyi kɛ dɔ́ ankà ndɔ hɔ̀n lɔ nɔn, kán ankà hɔ̀n lɔ ɛyri, kɩ ankà léyi nɛ́n dɔ̀ nɔn dú annànwɔrɛ. Nɛ tɛn nɛ̀n nyri ɔmu le nɛ dɔ́ ankà annànwɔrɛ, ô nyɛ́n mán nyɛ́n bùtan ankaẅì.

³⁶ Ɔmuhi eci ndɔ lɔ hán tán, ô Owrú Prɔnprɔn ankà-dɔ̀ lɔ kɛ sá nmù nɔn: “Ye sɩ̀ bɔyɛ nɛ̀n ɛnwi zriɛmɛ́n”.

³⁷ Kɩ owrú nyàntɛn tɔ̀n vru kɛ dɔ̀ le: “Yɔ lɛ kán ɔwrɔn léyi yɔ sɔ́n ebisɛn nɔn”.

Yɛ wá Zhezü ezhe nanmàn mɛ̀n

³⁸ Ɛnvra vácì, Zhozɛfɛ̀n, Arimate anmàn wrɔn, sán Pilatɛ̀n ɛkɔrɛ̀-levri ô kè bɩ́ Zhezü dɛ̀wru lɔ kɛ̀ hɔ̀n kè bɩ. (Zhozɛfɛ̀n dú ɔwrɔn léyi ke bɩ́ Zhezü ankà ɛbanmɛ̀n ɔmuhi ne sú Zhüifɛ̀n-bɔ̀ cüìcüì hɔ̀n nɔn). Pilatɛ̀n tán nɛ̀n ɛkɔrɛ̀levri. Kɩ Zhozɛfɛ̀n nvà bɩ́ Zhezü dùwrú lɔ.

³⁹ Nikodɛmɛ̀n léyi ɛnbí tɔ̀n, hɔ́n cɔ́ Zhezü ɛnnyran mɛ̀n nɔn, nɛ́n mán nɛ̀n sɩ́ ɛci banbán kɛ lɛ cɔ́ ɛci boasɛ́ ɛẅia-ɛvà.

⁴⁰ Yɔ anwrɔn anhyrɛ̀ lɔ yɔ bɩ́ Zhezü dùwru lɔ kɩ yɔ bɔsɔ nɛ̀n ɛci wɔsu mɛ̀n, yɔ ku nɛ̀n ɛnzhì banbán, hán ɔmu le dú Zhüifɛ̀n-bɔ̀ dùci ɛnvra léyi yɔ bɩ́ ɔwrɔn nɔn.

⁴¹ Ɛyri léyi yɛ gɔ́n Zhezü brɛ́ ɛgban-hán-tɛ̀ domɛ̀n nɔn, nanvrɛn ɛtɛsɛ̀n lɔ, ɛkɛ̀tɛ̀ cɛ tɔ̀n ndù, kɩ ɛkɛ̀tɛ̀ lɔ mɛ̀n, ezhe nanmàn wrù tɔ̀n yɛ hán kɩ ɔwrɔn zriɛmɛ́n kɛ vá dɛ́ nɛ̀n ɛmɛ̀n mrìmrì.

⁴² Ɔmuhi dú ɛnbì léyi bá Zhüifɛ̀n-bɔ̀ nyanmán-bì lɔ tɛsɛ̀n nɔn, hɩ ezhe nanmàn mán dú ɛtɛsɛ̀n nɔn, yɔ bɩ́ Zhezü dùwrú lɔ yɛ wá nɛ̀n ɛmɛ̀n.