Zhan 18 - Ɛmɛẅi ankà ankrànkràn 2003

Zhezü ẅɛn vra

¹ Ɛnvra léyi Zhezü dɔ́ ankà ndɔ lɔ trɔ nɔn, nɛ̀n mán n'ɛsɛnkɛn-bɔ̀ mɛhi yɔ hɔ́n Sedrɔn shigbɛ́-shi mɛẅi. Nanvrɛn lɔ ɛkɛ̀tɛ̀ cɛ tɔ̀n ndù kɩ nɛ́n mán n'ɛsɛnkɛn-bɔ̀ mɛhi yɔ bru ɛkɛ̀tɛ̀ cɛ lɔ mɛ̀n.

² Zhüda léyi kɛ hɛ́ nɛ̀n nɔn mán nyri ɛyri lɔ, ɔmuhi Zhezü mán n'ɛsɛnkɛn-bɔ̀ kɛ vá nanvrɛn lɔ ɛburi-buri nɔn.

³ Zhüda hɔ́n ɛkɛ̀tɛ̀ cɛ lɔ mɛ̀n, nɛ̀n sɩ́ gɔliɛ-bɔ̀ fɛcüè mán anwrɔn hɔ̀n léyi Ɔwɔ-cice-bɔ̀ cüìcüì mán Ɔwɔ-nyanmàn-sùva-wá-bɔ̀ tán nɛ̀n nɔn; anhà-kɔ́n ci, kɛniɛn mán ɛnhyà-lakà dú yɔ antamɛ̀n.

⁴ Zɛtɛn Zhezü léyi nyri eci léyi kɛ lɛ wɔɛ̀n nɔn, nán esù hɔ́n y'ɛtɛ̀sɛ̀n kɩ ke yrɛ yɔ le: “Antɔn nye jiɛ?”

⁵ Yɔ dɔ̀ le: “Nazàrɛtɛ̀n-wrɔn Zhezü.” Zhezü kɛ dɔ́ yɔ le: “Nyàn mɛ̀n.” Kɩ Zhüda léyi kɛ hɛ́ nɛ̀n nɔn, nyɔn nanvrɛn yɔ mɛhi.

⁶ Ɛnvra léyi Zhezü dɔ́ yɔ le: “Nyàn mɛ̀n”, yɔ nán esù ɛmɛẅi kɩ yɔ bore ɛnhibɩ́ɛ.

⁷ Zhezü vru ke yrɛ yɔ le: “Antɔn nye jiɛ?” Yɔ dɔ̀ le: “Nazàrɛtɛ̀n-wrɔn Zhezü.”

⁸ Zhezü mrɛ́n yɔ ɔmùan le: “Mɛ́n gɔ̀ dɔ́ nyɛ̀n le mɛ̀n. Ke dú kɛ mɛ̀n de nye ji mɛ̀n nɔn hô, nyɛ́n teze anwrɔn ndɔ hɔ̀n lɔ kɛ̀ hɔ̀n.”

⁹ Ɔmu lɔ de ankà léyi nɛ́n dɔ̀ nɔn kɛ lɛ sá nmù nɔn: “Anwrɔn hɔ̀n léyi vɛ́n, Dade, ɛ̀ tán mɛ̀n nɔn, mɛ̀n sɩ̀ hán ɛnzri mán kɛ̀ zrɛ̀n hàn.”

¹⁰ Simɔn Piɛrɛ̀n ẅɛn ɛnyan-she; nɛ̀n bɩ́ ɛnyan lɔ nɛ̀n wí Ɔwɔ-cice-wrɔn cüìcüì ci-bɩtan-wrɔn lɔ ezì-kɔrɛ̀ nukù. (Eci-bɩ̀tan-wrɔn ndɔ lɔ ye bi nɛ̀n Malküsɛ̀n)

¹¹ Tɛ́n Zhezü kɛ dɔ́ Piɛrɛ̀n le: “Bɩ v'ɛnyan-she lɔ hɛ̀n n'ɛhɛ́n-yriɛ. E tro le mɛ́n sɩ̀ mi ɛgbànkàn shi grashɛ̀n léyi Dade tán mɛ̀n nɛ́n?”

Ye sɩ́ Zhezü Hanɛ̀n zìwú

¹² Gɔliɛ-bɔ̀ fɛcüè, y'ɔwrɔn cüìcüì mán Zhüifɛ̀n-bɔ̀ yrí-nan-bɔ̀ ẅɛn Zhezü kɩ zɛtɛn kora nɛ̀n.

¹³ Yɔ gɔ́ sɩ́ nɛ̀n Hanɛ̀n nanvrɛn. Hanɛ̀n dú Kahifɛ̀n nɛ́n nɛ́ncrɛ̀ léyi dú Ɔwɔ-cice-wrɔn cüìcƐì ɛnnanwàn ndɔ lɔ mɛ̀n nɔn.

¹⁴ Tɛ́n, Kahifɛ̀n de kran ankà yé Zhüifɛ̀n-bɔ̀ cüìcüì hɔ̀n le: “Zrɔ tán ɔmu le ɔwrɔn zri ke wú fɛcüè mumù lɔ kruhú.”

Piɛrɛn kɛ wrɔ́n anmanta le nɛ̀n sɩ̀ dù Zhezü sɛnkɛn-wrɔn

¹⁵ Simɔn Piɛrɛ̀n mán nɛ́n nyran ɛsɛnkɛn-wrɔn tɔ̀n mɛhi dú Zhezü ɛmɛẅi. Zhezü sɛnkɛn-wrɔn ndɔ lɔ Ɔwɔ-cice-wrɔn cüìcüì lɔ gɔ́ nyri nɛ̀n, hán tán kɩ nɛ́n mán Zhezü mɛhi yɔ bru envra zri lɔ Ɔwɔ-cice-wrɔn cüìcüì wɔn-sɛ̀n bɩ́ lɔ mɛ̀n.

¹⁶ Tɛ́n Piɛrɛ̀n nyɔn ɛntrɛ angbàtà tɛ̀sɛ̀n. Zɛtɛn Zhezü sɛnkɛn-wrɔn ndɔ léyi Ɔwɔ-cice-wrɔn cüìcüì lɔ nyrì nɔn srɔ ɛntrɛ kɩ dɔ́ ɛnnyɔnwrɔn léyi kɛ nán esù-gbàtà nɔn ankà, kɩ nɛ̀n hán Piɛrɛ̀n bru ebɩ́ vriemɛ̀n.

¹⁷ Eci-bɩ̀tan-hi léyi kɛ nán angbàtà nɔn, kɛ dɔ́ Piɛrɛ̀n le: “Vɛ́n mán è sì dù Ɔwrɔn ndɔ lɔ n'ɛsɛnkɛn-wrɔn tɔ̀n hàn?” Piɛrɛ̀n mrɛ́n ɔmùan kɛ dɔ̀ le: “Hɔ̂, mɛ̀n sɩ̀ dù n'ɔwrɔn zriɛmɛ́n.”

¹⁸ Ɔmuhi ɔwrɔ̀ ke cüe nɔn, eci-bɩtan-bɔ̀ mán ɛyri-nan-bɔ̀ kɛ́n ɛnhyà kɩ bɔrɛkru ɛtɛ̀sɛ̀n. Piɛrɛ̀n mán nyɔn yɔ ɛtɛsɛ̀n kɩ kɛ yɩ́ ɛnhyà.

Ɔwɔ-cice-wrɔn cüìcüì ke yrɛ Zhezü ankà

¹⁹ Ɔwɔ-cice-wrɔn cüìcüì ke yrɛ Zhezü ankà, n'ɛsɛnkɛn-bɔ̀ mán n'ankà-yé wú.

²⁰ Zhezü mrɛ́n nɛ̀n ɔmùan le: “Mɛ̀n dɔ́ ankà fɛcüè mɛ̀n anwrɔn lɔ fɛn zìwú; me yé ankà ɛnvra lɔ fɛn Ɔwɔ-sɛ́n-wɔn hɔ̀n mán Ɔwɔ-cice-wɔn lɔ mɛ̀n, ɛyri léyi Zhüifɛ̀n-bɔ̀ lɔ fɛn kɛ bɔrɛkru nɔn; mɛ́n sɩ́ dɔ́ ankà zriɛmɛ́n ɛbán mɛ̀n.

²¹ Ecitan Kruhù kɛ e yrɛ mɛ̀n ankà hà? È yrɛ anwrɔn hɔ̀n léyi yá ankà léyi mɛ̀n dɔ́ yɔ nɔn; yɔ tɛn yɔ nyri anvrɛnvrɛn mɛ̀n ankà léyi mɛ́n dɔ̀ nɔn.”

²² Ɛnvra léyi Zhezü dù kɛ dɔ́ ankà nɔn, ɛyri-nan-bɔ̀ lɔ ɔtɔ̀n léyi nyɔn nɛ̀n ɛtɛsɛ̀n nɔn, sɩ́ nɛ̀n nukù kɩ kɛ dɔ̀ le: “Ɔmu de ɛ dɔ́ Ɔwɔ-cice-wrɔn cüìcüì ankà nɛ́n?”

²³ Zhezü mrɛ́n nɛ̀n ɔmùan le: “Ke dú kɛ mɛ̀n dɔ́ ankà gbàn hô, è ye bɔ̀ eci lɔ mɛ̀n léyi mɛ̀n dɔ́ ankà gbàn nɔn; tɛ́n ke dú kɛ mɛ̀n dɔ́ ankà anvrɛnvrɛn hô, cɛci kruhú kɛ ɛ gɔ́n mɛ̀n hàn?”

²⁴ Ankorɛ̀ dú nɛ̀n ɛnvra lɔ fɛn anhɛ́ mɛ̀n, zɛtɛn Hanɛ̀n hán yɔ, yɔ sɩ́ nɛ̀n Ɔwɔ-cice-wrɔn cüìcüì Kahifɛ̀n nanvrɛn.

Piɛrɛ̀n vru wrɔ́n anmanta le nɛ̀n sɩ̀ dù Zhezü sɛnkɛn-wrɔn

²⁵ Ɛnvra lɔ mɛ̀n, Simɔn Piɛrɛ̀n tɛn yɛ́ kɛ yɩ́ ɛnhyà. Ye yrɛ nɛ̀n le: “Vɛ́n mán è sɩ̀ dù ɔwrɔn ndɔ lɔ n'ɛsɛ̀nkɛn-wrɔn tɔ̀n hàn?” Tɛ́n Piɛrɛ̀n kɛ wrɔ́n anmanta kɛ dɔ̀ le: “Hɔ̂, mɛ̀n sì dù n'ɔwrɔn.”

²⁶ Ɔwɔ-cice-wrɔn cüìcüì ci-bɩ̀tan-wrɔn tɔ̀n léyi dú ɔwrɔn léyi Piɛrɛ̀n wi nukù, n'ɛmɛ̀n mɛ̀n wrɔn nɔn, kɛ dɔ́ Piɛrɛ̀n le: “Mɛ̀n sɩ̀ kàn mɛ́n vɛ́n mán Zhezü mɛhi ɛkɛ̀tɛ̀ cɛ lɔ mɛ̀n hàn?”

²⁷ Tɛ́n Piɛrɛ̀n vru mrɛ́n ɔmùan le ndɔ lɔ ɛyɔ̀n. Kɩ ɛnvra zri lɔ mɛ̀n ɔkɔ̀sɔ̀-cüì tɔ̀n dí nkù.

Ye sɩ́ Zhezü Pilatɛ̀n zìwú

²⁸ Zɛtɛn yɔ dú Kahifɛ̀n nanvrɛn ye bɩ́ Zhezü yɔ hɔ́n Pilatɛ̀n léyi dú govran nɔn zìwú. Ye sɩ́ nɛ̀n ɔsɔwrɔ̀ futàn. Tɛ́n Zhüifɛ̀n-bɔ̀ cüìcüì hɔ̀n ke sì bru Pilatɛ̀n bɩ́ lɔ mɛ̀n, ɔmuhi yɔ sɩ́ ji yɔ dú ɛnbrá mɛ̀n yakɛ yɔ zî abutùkumɛ́n-kɔ́ nyanmán-bì ci-zî lɔ nɔn.

²⁹ Hɩ le kruhú de govran Pilatɛ̀n hɔ́n cɔ́ yɔ ɛntrɛ. Ne yrɛ yɔ le: “Ankà tán de yɛ dɔ́ ku Ɔwrɔn ndɔ lɔ ɛwú nɛ́n?”

³⁰ Yɔ mrɛ́n nɛ̀n ɔmùan le: “Ke dú kɛ kè sɩ̀ dù eci-gbangbàn-hán-wrɔn hô, bɔ́ sɩ̀ ẅɛn nɛ̀n bɔ̀ và sɩ́ mɛ́n.”

³¹ Pilatɛ̀n kɛ dɔ́ yɔ le: “Nyɛ́n dùku nyɛ́n bɩ́ nɛ̀n, ô nyɛ́n ci nɛ̀n ɛmrɛ̀n ny'ɛnyanmàn lɔ wú.” Yɔ mrɛ́n ɔmùan le: “Bɔ̀ sì ẅɛ̀n ɛkɔrɛ̀-levri hɩ b'á dí ɔwrɔn owúemɛ̀n nɔn.”

³² Ɔmu lɔ de Zhezü mùan ankà lɔ dɔ̀ nɔn, kɛ lɛ hán tán, ô kè yé owù léyi ne le wù nɔn.

³³ Pilatɛ̀n dú ɛntrɛ bru ɛbemɛ̀n; nɛ̀n bi Zhezü kɩ ne yrɛ yi le: “E dú Zhüifɛ̀n-bɔ̀ nɛncüìɛ?”

³⁴ Zhezü mrɛ́n ɔmùan le: “Ɛ dɔ́ ndɔ lɔ ɔmuhi vɛ́n mumù de è tro, kale anwrɔn de dɔ́ mɛ́n m'ankà nɛ́n?”

³⁵ Pilatɛ̀n mrɛ́n ɔmùan le: “Zhüifɛ̀n-wrɔn dú mɛ̀n hàn? V'anmàn ɛnhiwú bɔ̀ mán Ɔwɔ-cice-bɔ̀ cüìcüì hɔ̀n ẅɛn mɛ́n vá sɩ́ mɛ̀n; ecitan ɛ̀ hán hàn?”

³⁶ Zhezü mrɛ́n ɔmùan le: “M'ɛnnɛ̀ncüì-dúyri ke sɩ̀ dù ɛnu ɛnhibù ndɔ lɔ tɛn; ke dú kɛ m'ɛnnɛ̀ncüì-dúyri kè dú ɛnhibù ndɔ lɔ tɛn hô, m'ɛci-bɩ̀tan-bɔ̀ kɛ lɛ kɔ́n anhà ô ye bɩ́ ẅɛn mɛ̀n yɔ tán Zhüifɛ̀n-bɔ̀ cüìcüì hɔ̀n. Tɛ́n hɔ̂, m'ɛnnɛ̀ncüì-dúyri kè sɩ̀ dù ɛnhibù ndɔ lɔ tɛn.”

³⁷ Zɛtɛn Pilatɛ̀n mrɛ́n nɛ̀n ɔmùan le: “Zɛtɛn e dú ɛnnɛ̀ncüìɛ?” Zhezü mrɛ́n ɔmùan le: “Hɩ de ɛ dɔ̀ nɔn: mɛ̀n dú ɛnnɛ̀ncüì. Ye bî mɛ̀n, kɩ mɛ̀n vá ɛnhibù wú ankà annànwɔrɛ dɔ́-yri. Ɔwrɔn totɔtɔ̀n léyi dú ankà annànwɔrɛ mɛ̀n-wrɔn nɔn, ke die ankà léyi mɛ dɔ́ nɔn nukùɛ.”

³⁸ Pilatɛ̀n ke yrɛ nɛ̀n le: “Cɛci dú ankà annanwɔrɛ hà?” Ɛnvra léyi Pilatɛ̀n dɔ́ ankà ndɔ hɔ̀n lɔ trɔ nɔn, nɛ̀n vru nɛ̀n srɔ ɛntrɛ nɛ̀n hɔ́n Zhüifɛ̀n-bɔ̀ zìwú. Nɛ dɔ́ yɔ le: “Mɛ́n sɩ́ cɔ́ nwùbɔ́ ankà zriɛmɛ́n ɔwrɔn ndɔ lɔ wú.

Ye di Zhezü owúemɛ̀n

³⁹ Tɛ́n ny'edù-ci léyi nyɛ́n ẅɛ̀n nyɛ hán nɔn, ɛnnanwàn lɔ fɛn, abutùkumɛ́n-kɔ́ nyanmán-bì lɔ, me teze anwɔn-mɛ̀n-wá-wrɔn tɔ̀n mɛ tán nyɛ̀n. Nye ji le mɛ̀n teze Zhüifɛ̀n-bɔ̀ nɛncüì lɔ mɛ̀n tán nyɛ̀n hàn?”

⁴⁰ Yɔ mrɛ́n nɛ̀n ɔmùan, yɔ di bobo yɔ dɔ̀ le: “Hɔ̂, ke sɩ̀ dù nɛ́n! Barabasɛ̀n de bɔ́ ji nɔn!” Tɛ́n, Barabasɛ̀n ndɔ lɔ, nɛ̀n dú eci-gbangbàn-hán-wrɔn tɔ̀n.