Zhan 15 - Ɛmɛẅi ankà ankrànkràn 2003

Zhezü dú ɛkɛ̀tɛ̀ annànwɔrɛ

¹ “Mɛ̀n dú ɛkɛ̀tɛ̀ annanwɔrɛ kɩ Dade dú ɛkɛ̀tɛ̀ nɛ́n zi.

² Nɛ ẅiɛ antɛ̀da hɔ̀n léyi dú mɛ̀n ɛmɛ̀n hɩ ke sɩ́ shi ɛẅì, kɩ nɛ hán anda hɔ̀n léyi ɛẅì dú ɛwú nɔn ɛci, ô yɔ sàn shi ɛẅì kè vru kɛ̀ cüɛn.

³ Ankà hɔ̀n léyi mɛ̀n yé nyɛ̀n nɔn, gɔ́ srɔ nyɛ̀n anwrɔn fifi.

⁴ Nyɛ́n cɔ́ mɛ̀n mɛhi bɔ̀ bɔ́sɔ̀, hán ɔmu le mɛ́n bɔ́sɔ̀ mɛ̀n dú nyɛ̀n ɛmɛ̀n nɔn. Ɛtɛ̀da zri ke sɩ̀ shi ɛẅì rɔ́, ke dú kɛ nɛ̀n sɩ̀ dù ɛtɛ̀ domɛ̀n; ɔmu zri lɔ, ke dú kɛ nyɛ́n sɩ̀ cɔ̀ mɛ̀n mɛhi bɔ̀ bɔ̀sɔ̀a hô, nyɛ́n sɩ̀ shi ɛẅì rɔ́.

⁵ Mɛ̀n dú ɛtɛ̀, nyɛ́n dú antɛ̀da. Ɔwrɔn léyi kɛ cɔ́ mɛ̀n mɛhi bɔ́ bɔ́sɔ̀, hɩ mɛ̀n mán mɛ̀n dú nɛ̀n ɛmɛ̀n ɔbɔ̀sɔ mɛ̀n nɔn, ne shi ɛẅì bobrebe, ɔmuhi nyɛ́n sɩ̀ hán eci zriɛmɛ́n rɔ́ ke dú kɛ mɛ̀n sɩ̀ dù nyɛ̀n ɛmɛ̀n.

⁶ Ɔwrɔn léyi ke sɩ́ yɛ́ m'ɔbɔ̀sɔ̀ lɔ mɛ̀n nɔn, yɛ lɛ kɔ́n nɛ̀n ze ɛntrɛa kɛ hán ɛtɛ̀da hɔ́, kɩ ne wrú; antɛ̀da wrú hɔ̀n lɔ, yɛ yura yɔ, yɛ kɔ́n yɔ ku ɛnhyà kɩ yɔ biɛ.

⁷ Ke dú kɛ nyɛ́n dú mɛ̀n ɛmɛ̀n kɩ m'ankà-dɔ̀ ke dú nyɛ̀n ɛmɛ̀n hô, nyɛ́n sán eci léyi nye ji nɔn kɩ nyɛ lɛ cɔ̀.

⁸ Nyàn ɔmu le Dade ci-zrɔ lɔ ke yé n'edòmɛ̀n nɔn: ɛnvra léyi nye shi ɛẅì bobrebe kɩ nye yé le nyɛ́n dú m'ɛsɛnkɛn-bɔ̀ nɔn.

⁹ Mɛ cüɛn nyɛ̀n ke hán ɔmu le Dade kɛ cüɛn mɛ̀n nɔn hɔ́. Nyɛ́n yɛ́ m'ɛcüɛ̀n lɔ mɛ̀n.

¹⁰ Ke dú kɛ nyɛ ẅɛn m'ɛnyànmàn hɔ̀n lɔ nyɛ hɛ́n hô, nyɛ lɛ yɛ́ m'ɛcüɛ̀n lɔ mɛ̀n, ke le dù kɛ lɛ hán mɛ̀n léyi mɛ̀n ẅɛn Dade nyànmàn hɔ̀n lɔ mɛ̀n hɛ́n kɩ mɛ̀n yɛ́ n'ɛcƐɛ̀n lɔ mɛ̀n nɔn.”

¹¹ “Mɛ̀n dɔ́ nyɛ̀n ankà ndɔ lɔ ô, mɛ́n pɔpüɛ̀-brà lɔ kè dú nyɛ̀n ɛmɛ̀n, ô nyɛ́n pɔpüɛ̀-brà lɔ kɛ sá nmù.

¹² Nyàn m'ɛnyanmàn lɔ: nyɛ́n cüɛn ny'edomɛ̀n kɛ hán ɔmu le mɛ cüɛn nyɛ̀n nɔn.

¹³ Ɛcüɛ̀n vri léyi ɔwrɔn ke le yé nɔn, dú hɩ le ne le wú nɛ́n nyran hɔ̀n kruhú.

¹⁴ Nyɛ́n dú m'annyran anvrɛn hɔ̀n, ke dú kɛ nyɛ hán eci léyi mɛ wá tán nyɛ̀n nɔn.

¹⁵ Mɛ́n sɩ̀ vru bi nyɛ̀n eci-bɩ̀tan-bɔ̀a, ɔmuhi eci-bɩ̀tan-wrɔn lɔ nɛ̀n sɩ̀ nyrɩ̀ eci léyi n'ɛẅɛnwrɔn kɛ hán nɔn. Me bi nyɛ̀n annyran hɔ̀n, ɔmuhi mɛ̀n hán nyɛ̀n nyɛ́n nyri eci lɔ fɛn léyi Dade yé mɛ̀n nɔn.

¹⁶ Nyɛ́n sɩ̀ mrɛ́n mɛ̀n nyɛ́n bɩɛ; tɛ́n mɛ̀n, mɛ̀n mrɛ́n nyɛ̀n mɛ́n bɩ, mɛ̀n wá tán nyɛ̀n nyɛ́n hɔ̀n nyɛ́n shi ɛẅì, ɛẅì léyi kɛ ẅɛn vɔ̀nshɛ́ nɔn. Ɔmu lɔ de Dade kɛ lɛ tán nyɛ̀n eci lɔ fɛn léyi nye ji nɔn m'ebɩ́mɛ̀n.

¹⁷ Eci léyi mɛ wá tán nyɛ̀n nɔn, dú hɩ le ke ji le nyɛ́n cüɛn ny'edomɛ̀n.”

Ɛnhibù ke gbri Zhezü mán n'anwrɔn hɔ̀n

¹⁸ “Ke dú kɛ ɛnhibù ke gbri nyɛ̀n hô, nyɛ́n cɔ̀ nyɛ́n nyrì le, nɛ̀n gbri mɛ̀n yakɛ kɛ́n nyɛ̀n.

¹⁹ Ke dú kɛ nyɛ́n dú ɛnhibù wú bɔ̀ hô, ɛnhibù kɛ lɛ cüɛn nyɛ̀n ɔmuhi nye le dú nɛ tɛn nɔn. Tɛ́n, mɛ̀n mrɛ́n nyɛ̀n mɛ̀n bɩ́ ɛnhibù tamɛ̀n, kɩ nyɛ́n sɩ̀ dù ɛnhibù tɛ́n: hɩ le kruhú de ɛnhibù ke gbri nyɛ̀n nɔn.

²⁰ Ke bru nyɛ̀n, ankà léyi mɛ̀n dɔ́ nyɛ̀n nɔn: ‘Eci-bɩtan-wrɔn zriɛmɛ́n ke sɩ̀ sevri kɛ̀ vrán n'ankà-yé-wrɔn.’ Ke dú kɛ yɔ kɔ́n mɛ̀n anhà hô, nyɛ́n mán yɔ lɛ kɔ́n nyɛ̀n anhà; ke dú kɛ yɔ ẅɛn m'ankà-yé lɔ yɔ hɛ́n hô, yɔ lɛ ẅɛn nyɛ tɛn lɔ mán yɔ hɛ́n.

²¹ Tɛ́n yɔ lɛ hán nyɛ̀n eci ndɔ lɔ fɛn m'ɛkruhú, ɔmuhi yɔ sɩ̀ nyrɩ̀ ɔwrɔn léyi wá mɛ̀n ɔkɔhɔ̀n nɔn.

²² Yɔ sɩ̀ cɔ́ ɛgbàn ke dú kɛ mɛ̀n sɩ̀ và mɛ̀n dɔ̀ yɔ ankà. Tɛ́n zɛtɛ̀ lɔ, yɔ sɩ̀ cɔ́ ɛnhyɔ̀bɔ̀nyrì y'ɛgbàn lɔ wú.

²³ Ɔwrɔn léyi ke gbri mɛ̀n nɔn, ne gbri Dade mán.

²⁴ Yɔ sɩ̀ cɔ́ ɛgbàn ke dú kɛ mɛ̀n sɩ̀ hán y'anwanzi lɔ ɛci hɔ̀n léyi ɔwrɔn zriɛmɛ́n kɛ vá hán nɔn. Tɛ́n zɛtɛ̀ lɔ, yɔ kán m'ɔkɔ̀hɔ̀n-hán-kɔ̀hɔ̀n, kɩ yɔ gbri mɛ̀n, mɛ̀n mán Dade mɛhi.

²⁵ Tɛ́n eci-hán ndɔ lɔ kɛ và, ô y'ɛnyamàn ankà-dɔ̀ léyi ye mrɛ́n nɔn, kɛ̀ sá nmù: ‘Yɔ gbri mɛ̀n ankora.’ ”

²⁶ “Ɔwrɔn léyi kɛ lɛ wá nyɛ̀n ɛkɔrɛ̀ nɔn kɛ lɛ và: nɛ́n de nɛ̀n dú annanwɔrɛ Hɛ́n léyi dú Dade yri kɛ và nɔn. Me le yüre nyɛ̀n nɛ́n, Dade bɩmɛ̀n, kɩ ne le di mɛ̀n dalɛfuɛ.

²⁷ Kɩ nyɛ́n mán, nye le di mɛ̀n dalɛfuɛ, ɔmuhi nyɛ́n mɛhi bɔ́ dú ɛnkrubɔmɛ̀n hàn hɛ́n nɔn.”