Zhakɛ̀n 5 - Ɛmɛẅi ankà ankrànkràn 2003

Ɛnnɛncüì hɔ̀n ankà-bi-dɔ̀

¹ Zɛtɛn nyɛ́n die mɛ̀n nukù anvrɛnvrɛn, nyɛ́n, ɛnnɛncüì hɔ̀n! Nyɛ́n wú eyú ô nyɛ́n dú nwànsrɔn mɛ̀n, ɔmuhi muzhie kɛ lɛ vá ny'ɛwú nɔn.

² Ny'ɛnnɛ̀ncüì-dì-ci hɔ̀n lɔ srɔ eci nyɛ́n, kɩ ny'ɛceci hɔ̀n lɔ ɛnnɛ̀n rá.

³ Ny'ansɩ̀kɛ mán ny'ɔkùa hɔ̀n bɔ́ andàgra; andàgra ndɔ lɔ de ke le dú nyɛ́n dalɛfuɛ-dì kɛ kɛ́n nyɛ̀n ezì, kɩ kɛ lɛ biɛ ny'anẅia lɔ kɛ lɛ hán ɛnhyà hɔ́. Nyɛ́n borɛ ɛnnɛ̀ncüì-di-ci ɛkru ɛnbì ndɔ hɔ̀n léyi dú ny'ɛmɛẅi trɔ vra nɔn.

⁴ Nyɛ́n krɔ nyɛ́n sɩ̀ dì ɔkɔ̀hɔ̀n-hán-bɔ̀ léyi dú nyɛ̀n ankɛ̀tɛ mɛ̀n nɔn ɔwɔɛ̀n. Ndɔ lɔ dú ɛnyrɔnnan gbàngbàn ci-hán. Anwrɔn hɔ̀n léyi ke bɩ́ ny'antɛ̀-ẅì sɩ́ ɛbemɛ̀n nɔn, yɔ bobo-dì bru Ɔwɔ nukùemɛ̀n, ɛnhi mumù Ẅɛnwrɔn.

⁵ Ny'ɛnhibù wú wúvà lɔ fɛn dú eci-zrɔ mɛ̀n mán pɔ̀püɛ̀ mɛ̀n. Nyɛ̀n wá ɛnzhì hán annɔ̀n hɔ̀n hɔ́, nyɛ vrá owú bì.

⁶ Anwrɔn kora hɔ̀n léyi kè sɩ̀ hàn eci zriɛmɛ́n nɔn, nyɛ́n di yɔ owúemɛ̀n, kɩ yɔ sɩ̀ cɔ̀ nyɛ̀n ecüìwrɔn.

Ɛnbɔrɛ-ẅɛ̀n-hɛ́n mán Ɔwɔ-sɛ̀n

⁷ Nyɛ́n ẅɛn ɛnbɔrɛ nyɛ́n hɛ́n anwrɔn-nɛ́n-muan-ẅì hɔ̀n, hàn kɩ kɛ̀ cɔ́ ɛnvra léyi Ɛẅɛnwrɔn kɛ lɛ và nɔn. Nyɛ́n kán ɔmu le ovú kɔ̀hɔ̀n-hán-wrɔn kɛ ẅɛn ɛnbɔrɛ kɛ hɛ́n kɩ kɛ vrá ɛnhi kɛ̀ hán ɛci kɛ̀ sɔ́, ke shi ɛẅì anvrɛvrɛn: nɛ̀n nyri ɔmu le ke ji le ɛbanshi mán ɔkùan kɛ̀ nàn kɛ̀ trɔ.

⁸ Nyɛ́n mán nyɛ́n ẅɛn ɛnbɔrɛ nyɛ́n hɛ́n, nyɛ́n bɩ́ edùyì, ɔmuhi Ɛẅɛnwrɔn vá bì lɔ bá ɛtɛ̀sɛ̀n nɔn.

⁹ Anwrɔn-nɛ́n-muan-ẅì hɔ̀n, nyɛ́n bɩ́ bɩ́ ny'edomɛ̀n ɛmɛ̀nhyì, ke dú ɔmu lɔ hô, Ɔwɔ ke le ci nyɛ̀n ɛmrɛ̀n. Ɛmrɛ̀n-ci-wrɔn bá ɛtɛ̀sɛ̀n, nɛ́n krɔn pkehɛ́n, ô nɛ̀n bru anwɔn mɛ̀n!

¹⁰ Anwrɔn-nɛ́n-muan-ẅì hɔ̀n, Ɔwɔ-mùanwú-ankà-dɔ́-bɔ̀ léyi Ɛẅɛnwrɔn bɩmɛ̀n dɔ́ ankà nɔn, y'ankà kè bru nyɛ̀n: nyɛ́n bɩ́ yɔ, kè dú ny'ɛbɔrɛ-ẅɛ̀n-hɛ́n sɛnpò mán ny'ɔmùan-zri-dì ɛgbànkan mɛ̀n.

¹¹ Bɔ̀ krɛ́ yɔ ɛnbɔrɛ-bru-bɔ̀, ɔmuhi yɔ ẅɛn nɛ̀n ɛshishiemɛ̀n yɔ hɛ́n nɔn. Nyɛ́n yá yɛ dɔ́ Zhɔbɛ̀n bɔrɛ-ẅɛ̀n-hɛ́n ankà, kɩ nyɛ́n nyri eci léyi Ɔwɔ tán nɛ̀n ɛmɛẅi trɔ vra lɔ nɔn. Annànwɔrɛ mɛ̀n, ɛnhyɔ̀bɔ̀-nyrì mán ɛnbɔrɛ-wɔ̀ yɩ́ Ɛẅɛnwrɔn ɛmɛ̀n.

¹² Anwrɔn-nɛ́n-muan-ẅì hɔ̀n, annànnàn le, ke sɩ́ ji le nyɛ́n wá ɔmùan: Ɔwɔ yri, ɛnhibù wú, eci totɔtɔ̀n léyi dú eci nɔn yri. Nyɛ́n dɔ̀ le “hɛ̀ɛ̀” ke dú kɛ dú “hɛ̀ɛ̀”; “hɔ̂” ke dú kɛ dú “hɔ̂”, ô nyɛ́n bɩ́ bore Ɔwɔ mrɛ̀n-cì lɔ wú.

¹³ Ny'ɛmɛ̀n lɔ ɔwrɔn tɔ̀n dú ejüeziemɛ̀n hàn? Ke ji le nɛ̀n sɛ́n Ɔwɔ. Ɔwrɔn tɔ̀n dú ɛnbɔrɛ-bruemɛ̀n hàn? Ke ji le nɛ̀n krɛ́ Ɔwɔ-mrɛ́n-cɔ̀.

¹⁴ Ny'ɛmɛ̀n lɔ ɔwrɔn tɔ̀n ɛnlɔẅiɛ kɛ dàà? Nɛ̀n bi Ɔwɔ fɛcüè-cuìcuì-bɔ̀; yɔ lɛ sɛ̀n tán nɛ̀n, kɩ yɔ lɛ ku nɛ̀n ɛnzhì ɛnkru Ɛẅɛnwrɔn bɩmɛ̀n.

¹⁵ Ɔwɔ-sɛ̀n ndɔ lɔ, yɔ hán ankaẅì-bùtan mɛ̀n nɔn, ke le bɩ́ ɛnlɔẅiɛ-wrɔn lɔ kè die: Ɛẅɛnwrɔn kɛ lɛ tán nɛ̀n ecüì, kɩ n'ɛgbàn lɔ fɛn léyi nɛ̀n hán nɔn ke le bɩ ce nɛ̀n.

¹⁶ Nyɛ́n krɛ́ ny'ɛgbàn nyɛ́n tán ny'edomɛ̀n, ô nyɛ́n sɛ̀n nyɛ́n tán ny'edomɛ̀n ô nyɛ́n cɔ́ ɔkɔrɛ̀. Ɛnyrɔnnan-wrɔn wɔ-sɛ̀n ẅɛn vɔnshɛ́ vri.

¹⁷ Eli dú ɔwrɔnẅì hán bɔ́ hɔ́: nɛ̀n sɛ́n Ɔwɔ edùyiemɛ̀n ô ɛnshi ke bɩ́ nán, kɩ ɛnshi ẅì zriɛmɛ́n kè sɩ̀ nàn ɛnnanwàn kru anhɔ̀n mán ɛcá.

¹⁸ Zɛtɛn, nɛ̀n vru nɛ̀n sɛ́n Ɔwɔ; kɩ anhobɩ́ nán ɛnshi kɩ ɛnhi tán ɛci-zî.

¹⁹ Anwrɔn-nɛ́n-muan-ẅì hɔ̀n, ke dú kɛ ny'ɛmɛ̀n lɔ ɔwrɔn tɔ̀n kɛ cɔhɔ́ annanwɔrɛ levri wú, kɩ ɔwrɔn nyantɛn kɛ hán nɛ̀n ne vru nɛ và,

²⁰ ke bru nyɛ̀n le: ɔwrɔn léyi kɛ hán ɛgbàn-hán-wrɔn ke vru kɛ vá ɛnlevri anvrɛnvrɛn wú nɔn, nɛ lɛ mrɛ́n ɛgbàn-hán-wrɔn hɛ́n lɔ owúemɛ̀n nɛ̀n sɔhɔ́ kɩ ɛgbàn bobrebe wú yɛ lɛ cɔ́ ebɩ̀ce.