Zhakɛ̀n 4 - Ɛmɛẅi ankà ankrànkràn 2003

Ɛnhibù wú cüɛ̀n

¹ Tɛyri de ecüìwrɔn mán ɛdrɛ̀ hɔ̀n lɔ ke dù kɛ vá cɔ́ nyɛ̀n nɛ́n? Yɔ dú ny'afùya hɔ̀n léyi kɛ kɔ́n anhà ɛnvra lɔ fɛn ny'ɛnbɔrɛ lɔ mɛ̀n nɔn.

² Nye ji eci tɔ̀n, kɩ eci léyi nye ji nɔn, nyɛ́n sɩ̀ cɔ́ nɛ̀n rɔ́, kɩ zɛtɛn nye ji ɛyri ô nyɛ́n wri ɔwrɔn; nye ji eci tɔ̀n, kɩ eci lɔ nyɛ́n sɩ̀ cɔ́ nɛ̀n rɔ́, kɩ zɛtɛn ecüìwrɔn mán ankà-sɩ̀ ke bru nyɛ̀n ɛmɛ̀n. Nyɛ́n sɩ̀ ẅɛ̀n eci léyi nye ji nɔn, ɔmuhi nyɛ́n sɩ́ nyri sán Ɔwɔ eci lɔ nɔn.

³ Kɩ ke dú kɛ nyɛ sán, nyɛ́n sɩ́ cɔa, ɔmuhi ny'ankà-tro hɔ̀n lɔ kè sɩ̀ zrɔ̀a nɔn: nye ji nyɛ́n jrɛ́ ɛci hɔ̀n lɔ fɛn nyɛ́n pɔ̀püɛ̀ ci-hán mɛ̀n.

⁴ Anmùan-anhyrɛ̀-bɔ̀ léyi de dú nyɛ̀n nɔn! Nyɛ́n sɩ̀ nyrì ɔmu le, e dú ɛnhibù nɛ́n nyran hô, è dú Ɔwɔ gbri-wrɔn hàn? Ɔwrɔn léyi ke ji ke dú ɛnhibù nɛ́n nyran nɔn, nɛ srɔ Ɔwɔ gbri-wrɔn.

⁵ Nyɛ́n bɩ́ tro le ankora de Owrú Prɔnprɔn ndɔ̀ le: “Ɔwɔ kɛ kɔ́n ecüìhi, kɩ ne ji ɛnhɛ́n léyi nɛ́n tán bɔ̀ nɔn.”

⁶ Ɔmu tɛ̀kɩ ɛboafɔ̀n léyi Ɔwɔ kɛ tán bɔ̀ nɔn sevri, ɔmuhi Owrú Prɔnprɔn ndɔ̀ le: “Ɔwɔ kɛ kɛ́n tùtre-bɔ̀ ezì, kɩ nɛ cüɛ́n ɛnhyɔ̀bɔ̀-di-bɔ̀.”

⁷ Nyɛ́n sɩ́ ny'edomɛ̀n ɛnhi nyɛ́n tán Ɔwɔ, ô nyɛ́n kɛ́n anwa-wrɔn ezì, kɩ nɛ lɛ srɛ́ cɔhɔ́ esùshe ny'ɛtɛ̀sɛ̀n.

⁸ Nyɛ́n sɔ̀nba Ɔwɔ ɛtɛ̀sɛ̀n kɩ nɛ́n mán nɛ lɛ sɔ̀nba nyɛ̀n ɛtɛ̀sɛ̀n. Nyɛ́n juru ny'ankɔrɛ̀ lɔ, ɛgbàn-hán-bɔ̀; nyɛ́n fi ny'ɛnbɔrɛ hɔ̀n lɔ anbra-di-bɔ̀!

⁹ Nyɛ́n nyri ny'ɛmìan lɔ, nyɛ́n wú eyú, ô nyɛ́n wú ɛnhyɔ̀bɔ̀, nyɛ́n hán ny'ɛnhyürɛ̀ lɔ kɛ̀ srɔ eyú, ô nyɛ̀n pɔpüɛ̀ lɔ kɛ̀ srɔ obòtò.

¹⁰ Nyɛ́n sɩ́ ny'edomɛ̀n ɛnhi Ɛẅɛnwrɔn zìwú, kɩ ne le sɩ́ nyɛ̀n ɛwú.

E bɩ́ ci ɔmuan-ẅì ɛmrɛ̀n

¹¹ Anwrɔn-nɛ́n-muan-ẅì hɔ̀n nyɛ́n bɩ́ dɔ́ ny'edomɛ̀n ankà gbàngbàn. Ɔwrɔn léyi kɛ dɔ́ nɛ́n muan-ẅì ankà gbàngbàn, hɩ ke ci nɛ̀n ɛmrɛ̀n nɔn, nɛ dɔ́ Ɔwɔ nyànmàn ankà-gbàn kɩ ne ci ɛnyanmàn ɛmrɛ̀n. Ke dú ɔmu lɔ hô, ɛ srɔ v'edòmɛ̀n ɛnyanmàn mrɛ̀n-ci-wrɔn, kɩ è sɩ̀ dù ɔwrɔn léyi kɛ ẅɛn ɛnyanmàn-wá nɔn.

¹² Tɛ́n Ɔwɔ zri de kɛ tán ɛnyanmàn kɩ ke ci ɛmrɛ̀n mán; nɛ́n zri kɩ ne le bɩ́ ɔwrɔn nɛ̀n die, kɩ ne le vru nɛ̀n zrɛ́n ɔwrɔn mán. Ecitan de e bú v'edòmɛ̀n ɛ hán, vɛ́n léyi e ci ɛnyran ɛmrɛ̀n nɛ́n?

E bɩ́ di tùtre

¹³ Zɛtɛn nyɛ́n die mɛ̀n nukùɛ, nyɛ́n léyi nyɛ dɔ̀ le: “Ɛnyɔncì lɔ mán ɛnɛ́n, bɔ́ lɛ hɔ́n anmàn ndɔ lɔ, bɔ́ lɛ di ɛnnànwàn nanvrɛn, kɩ bɔ́ lɛ zhrɛ anhàn, bɔ́ lɛ cɔ́ ɔkùa.”

¹⁴ Zɛtɛn nyɛ́n sɩ̀ nyrì eci léyi ke le dú ny'ɛwúvà ɛnɛ́n lɔ nɔn! Nyɛ́n dù nyɛ́n hán ɛnzàn léyi kɛ bɔ̀ hɩ kɛ vacì nɔn.

¹⁵ Nyàn ankà léyi ke ji le nyɛ́n dɔ̀ nɔn: “Ke dú kɛ Ɛẅɛnwrɔn ke ji hô, bɔ́ le dú ɔkɔrɛ-bɔ̀ mɛ̀n kɩ bɔ́ lɛ hán eci ndɔ lɔ.”

¹⁶ Tɛ́n annànwɔrɛ mɛ̀n lɔ, nye di tùtre, kɩ nyɛ́n ẅɛn ɛvrivri. Tùtre totɔtɔ̀n lɔ fɛn dú eci gbàngbàn.

¹⁷ Zɛtɛn, ke dú kɛ ɔwrɔn tɔ̀n léyi nyri anvrɛn léyi nɛ lɛ hán, hɩ ke sɩ́ hán nɔn, nɛ hán ɛgbàn.