Zhakɛ̀n 3 - Ɛmɛẅi ankà ankrànkràn 2003

Ɔwɔɛ̀n

¹ Anwrɔn-nɛ́n-muan-ẅì hɔ̀n, ke sɩ́ ji le bɔ̀ dú anwrɔn bobrebe bɔ̀ yé eci, ɔmuhi nyɛ́n nyri ɔmu le, bɔ́, eci-yé-bɔ̀ lɔ, ye le ci bɔ̀ ɛmrɛ̀n ɛshishiemɛ̀n kɛ lɛ vrán anwrɔn ndɔ hɔ̀n nɔn.

² Bɔ́ hán ɛzɛ́n-ci ɛci bobrebe hán mɛ̀n. Ke dú kɛ ɔwrɔn tɔ̀n ke sɩ́ zɛ́n n'ankà-dɔ́ mɛ̀n hô, nɛ̀n dú ɔwrɔn anvrɛnvrɛn tɔ̀n léyi kɛ lɛ bɔ̀sɔ n'edùwru lɔ tɛ̀ nɔn.

³ Bɔ́ wá annɔ̀n angán ô, bɔ̀ cɔ́ ɛyri bɔ̀ nyrɔn y'edùwrú mumù lɔ fɛn.

⁴ Nyɛ́n vru nyɛ́n tro ɛdrɛn-hɛ̀ hɔ̀n ankà, ke dú kɛ yɔ sevri mán kɩ ɔwràn dɔ̀nwrɔ̀n kɛ kɛ́n yɔ sɩ́ mán, ɛhɛ́sɛ̀n-vrà cɛ de kɛ nyrɔn yɔ sɩ́ ɛyri lɔ fɛn léyi ɛhɛ̀-nyrɔn-wrɔn ke ji nɔn.

⁵ Ɔmu zri lɔ de ɔwɔɛ̀n mán dú edùwruemɛ̀n-ci cɛ kantɛ́nhɛ́n, tɛ́n nɛ lɛ mrɛ́n n'edomɛ̀n le, nɛ hán ɛci vɛnvɛn bobrebe. Nyɛ́n tro ɛnhyà cɛ léyi kɛ hán ovú cüìcüì ke wrì nɔn n'ankà!

⁶ Hɛ̀ɛ̀ ɔwɔɛ̀n ndù cá ɛnhyà cɛ hɔ́. Nɛ̀n dú ɛnhibù wú ci gbàngbàn léyi dú bɔ̀ edomɛ̀n kɩ nɛ jrɛ́ bɔ́ mumù lɔ fɛn. Nɛ wá bɔ́ ɛwúvà mumù lɔ fɛn ɛnhyà léyi dú owú-bɔ̀ anmàn kɛ và nɔn mɛ̀n.

⁷ Ɔwrɔnẅì cüì ká annɔ̀n mɛ̀ntɛ mɛ̀ntɛ hɔ̀n léyi dú ovomɛ̀n mán ɛnshiemɛ̀n nɔn: annrɛn, ɛnhibɩ́-wore-nɔ̀n mán ɛcàn, kɩ yɔ lɔ fɛn, ɔwrɔnẅì cüì ká yɔ.

⁸ Tɛ́n, ɔwrɔnẅì zriɛmɛ́n cüì kɛ vá ká ɔwɔɛ̀n mrimri: Nɛ̀n krɛ ɛgbàn, kɩ ɛnvra lɔ fɛn, nɛ̀n dú ɛcrɛ̀ciemɛ̀n, owù shi dú nɛ̀n ɛmɛ̀n.

⁹ Bɔ́ bɩ́ nɛ̀n bɔ́ mrɛ́n Ɛẅɛnwrɔn bɔ́ Zi, tɛ́n bɔ́ vru bɔ́ bɩ́ nɛ̀n bɔ́ dá anwrɔnẅì léyi Ɔwɔ hán dú cá nɛ̀n nɔn, ɛẅiɛ̀.

¹⁰ Ɔkùɛn tán mán ɛẅiɛ̀-dà ankà-dɔ̀ ke dú ɔmùan zri lɔ mɛ̀n kɛ srɔ ɛntrɛ. Anwrɔn-nɛ́n-muan-ẅì hɔ̀n, ke sɩ́ ji le ke dú ɔmu lɔ.

¹¹ Ɛnshi-gbɛ́-shi zriɛmɛ́n ke sɩ̀ tán n'ɛntrɛ-srɔ-mɛ̀n lɔ, ɛnshi wɔwɔ mán ɛnshi drɔ.

¹² Anwrɔn-nɛ́n-muàn-ẅì hɔ̀n, ancɛngbɛn-tɛ̀ zriɛmɛ́n ke sɩ̀ shí mango-ẅì rɔ́, kɩ mango-tɛ̀ zriɛmɛ́n ke sɩ̀ shi ancɛngbɛn-ẅì rɔ́; ɛnshi-gbɛ́-shi léyi ɛnjüɛ̀ dú ɛmɛ̀n nɔn, ke sɩ̀ tán ɛnshi wɔwɔ rɔ́.

Ankà-nyrì léyi dú anhobɩ́ kɛ và nɔn

¹³ Ny'ɛmɛ̀n lɔ ɔwrɔn tɔ̀n ke tro le nɛ̀n dú ankà-nyri-wrɔn hán? Nɛ̀n hán tán yɔ kán n'esù ankrankran nàn, n'eci-hán, n'edomɛ̀n ɛnhi-sɩ́ mán n'ankà-nyrì-ẅɛn mɛ̀n.

¹⁴ Tɛ́n, ke dú kɛ nyɛ́n ẅɛn ecüìhi-kɔ̀n drɔ ny'ɛnbɔrɛ lɔ mɛ̀n, mán ecüìwrɔn hɛ́n, nyɛ́n bɩ́ mrɛ́n ny'edomɛ̀n, ô nyɛ́n ẅɛn ɔyɔ̀n nyɛ́n ku annanwɔrɛ wú.

¹⁵ Ankà-nyrì ndɔ ɔmu lɔ, nɛ̀n sɩ̀ dù anhobɩ́ nɛ̀n và; nɛ̀n dú ɛnu ɛnhibù wú ci mán anwrɔnẅiemɛ̀n ci, kɩ nɛ̀n dú anwa mán.

¹⁶ Ɔmuhi ɛyri léyi ecüìhi-kɔ̀n mán ecüìwrɔn hɛ́n ndù nɔn, nanvrɛn lɔ sukù-sukù mán eci gbàngbàn lɔ fɛn ndù.

¹⁷ Tɛ́n ankà-nyrì léyi dú ɛwú và nɔn, nfì, kɩ zɛtɛn dú anwɔwɔ, sɔhɔ̀ mán ɔwrɔn ɛnhyɔ̀bɔ̀-nyriemɛ̀n; ɛcüɛ̀n yɩ́ nɛ̀n ɛmɛ̀n kɩ nɛ hán eci ankrankran mán ankà-nyrì; nɛ̀n di ɛnnɛ̀ncüì ɛzrɔ mɛ̀n mán eci-hán ankrànkràn mɛ̀n: nɛ̀n sɩ̀ ẅɛ̀n ɛmɛ̀n-grɔ mán anbrá-dì.

¹⁸ Anwrɔn hɔ̀n léyi kɛ hán anwɔwɔ kɔ̀hɔ̀n y'anwanzi nɔn, kɛ tɛ́ anwɔwɔ, kɩ antɛ̀-ẅì léyi yɔ küɛ nɔn, dú ɛwúvà léyi nyrɔn nɔn.