Zhakɛ̀n 1 - Ɛmɛẅi ankà ankrànkràn 2003

Ebinyan

¹ Ebinyán ndɔ lɔ dú Zhakɛ̀n yri kɛ và, nɛ́n léyi nɛ̀n dú Ɔwɔ mán ɛẅɛnwrɔn Zhezü Krisì ci-bɩtan-wrɔn nɔn. M'ebinyán lɔ dú Ɔwɔ fɛcüè lɔ fɛn léyi bonyi ɛnhibù mumù lɔ wú nɔn tɛn.

Ankaẅì-bùtan mán ankà-nyrì

² Anwrɔn-nɛ́n-muan-ẅì hɔ̀n nyɛ́n dú ɛnbɔrɛ-bruemɛ̀n ɛnvra léyi ejüedì mɛ̀ntɛ mɛ̀ntɛ kɛ lɛ srɔ́n nyɛ̀n ɛsù nɔn;

³ Ɔmuhi nyɛ́n nyrì le, ke dú kɛ ny'ankaẅì-bùtan lɔ kɛ nyɔn ɛshishiemɛ̀n, nɛ lɛ tán nyɛ̀n esɛ́.

⁴ Tɛ́n nyɛ́n hán ny'esɛ́ lɔ ke di ebɩ́ cehɛ́n, ô nyɛ́n krɔn pkehɛ́n, ɛnbrá ke bɩ́ dú nyɛ̀n edòmɛ̀n, eci zriɛmɛ́n ke bɩ́ ẅɛn nyɛ̀n ɛmiàn.

⁵ Tɛ́n ny'ɛmɛ̀n lɔ, ke dú kɛ ɔwrɔn tɔ̀n ke sɩ̀ ẅɛ̀n ankà-nyrì, ke ji le nɛ̀n sán Ɔwɔ kɩ kɛ lɛ tán nɛ̀n; ɔmuhi Ɔwɔ kɛ tán anwrɔn lɔ fɛn eci ankora ɛnbɔrɛ anvrɛnvrɛn mɛ̀n nɔn.

⁶ Tɛ́n, ke ji le nɛ̀n sán eci ankaẅì-bùtan mɛ̀n, mán ɛnbɔrɛ zriemɛ̀n, ɔmuhi ɔwrɔn léyi kɛ wá ɛnbɔrɛ anyhrɛ̀ eci-hán mɛ̀n nɔn, nɛ́n dù nɛ̀n cá ecüe afù léyi ɛndɔ̀nwrɔ̀n ke bɩ ke sɩ́ ɛwú, hɩ kɛ kɛ́n sɩ́ ɛyri lɔ fɛn nɔn.

⁷ Ɔwrɔn ɔmu lɔ nɛ́n bɩ́ tro le, nɛ lɛ cɔ́ eci-sán Ɛẅɛnwrɔn yri,

⁸ ɔmuhi esɛ́ bàdà n'eci-hán lɔ fɛn mɛ̀n nɔn.

Ɛmiàn mán ɛnnɛ̀ncüì-dì

⁹ Ke ji le ɛmian-wrɔn kè dú pɔ̀püɛ̀ mɛ̀n ɔmuhi Ɔwɔ ke sɩ́ nɛ̀n ɛwú nɔn,

¹⁰ ô ɛnnɛ̀ncüì mán ke shrí ɛnhi léyi Ɔwɔ ke le sɩ́ nɛ̀n nɔn. Annànwɔrɛ mɛ̀n lɔ ɛnnɛ̀ncüì kɛ lɛ vàcí kɛ lɛ hán ovú-tɛ̀ anhyrà hɔ́.

¹¹ Ɛnbri kɛ vá ɛwú kɩ n'ɛyri-yì, kɛ hán ɛtɛ̀ ke wrú; n'anhyrà kɛ kɔ́ bore, kɩ n'efì lɔ kɛ trɔ. Ɔmu zri lɔ, ɛnnɛ̀ncüì mán kɛ lɛ zrɛ́n n'ɔkɔ̀hɔ̀n-hán wanzi.

Ejüedì mán ɔwɔɛ̀nnyan

¹² Ɛnbɔrɛbru dú tán ɔwrɔn léyi kɛ ẅɛn ecüì ɔwɔɛ̀nnyan mɛ̀n; ɔmuhi, ɛnvra léyi ne yé nɛ́n biakpa-ẅɛn lɔ nɔn, nɛ lɛ cɔ́ ɔkɔ̀nkà krusɔn-ci, ɛwúvà léyi ke sɩ́ troa hɩ Ɔwɔ wá ɔmùan tán anwrɔn hɔ̀n léyi ẅɛn n'ɛcüɛ̀n nɔn.

¹³ Ke dú kɛ ɔwrɔn ke dú ɔwɔɛ̀nnyan mɛ̀n, nɛ́n bɩ́ dɔ́ le: “Ɔwɔ de kɛ wɔɛ́n mɛ̀n nyan nɔn.” Ɔmuhi Ɔwɔ ke sɩ̀ dú eci-gbàngbàn-wɔɛ̀nnyan mɛ̀n rɔ́, yakɛ nɛ́n dùku mán nɛ́n sɩ́ wɔɛ́n ɔwrɔn zriɛmɛ́n nɛ́n nyán.

¹⁴ Annanwɔrɛ mɛ̀n, ɔwrɔn ke dú ɔwɔɛ̀nnyan mɛ̀n, ɛnvra léyi nɛ́n mumù ne bru n'ankà-tro gbàngbàn tanwrɔn lɔ mɛ̀n nɔn,

¹⁵ zɛtɛn, ankà-tro gbàngbàn lɔ ke sɩ́ ɛmɛ̀ntɛ̀, kɩ ke bî ɛgbàn; kɩ ɛnvra léyi ɛgbàn kɛ sɔ́ anvrɛnvrɛn nɔn, nɛ́n mán ne bî owù.

¹⁶ Anwrɔn-nɛ́n-muan-ẅì hɔ̀n, ankà ndɔ lɔ mɛ̀n nyɛ́n bɩ́ zɛ́n hán:

¹⁷ Ecice anvrɛnvrɛn mán ecitán ankrankran ke dú anhobɩ́ kɛ và, yɔ dú Ɔwɔ yri yɛ và, nɛ́n léyi nɛ̀n dú anhobɩ́-yri-kàn-hán-wrɔn nɔn. Kɩ Ɔwɔ ke sɩ́ crɔn hán, yakɛ nɛ́n sɩ́ hán ɛyri-yɔwɔ n'eci-hán lɔ fɛn mɛ̀n.

¹⁸ N'ɛnbɔrɛ ankrankran mɛ̀n, nɛ̀n tán bɔ̀ ɛwúvà-kɔrɛ̀, nɛ́n annanwɔrɛ ankà-dɔ́ mɛ̀n, ô bɔ̀ dú ɛnvrakpà-bɔ̀ n'ɛci lɔ fɛn léyi nɛ̀n hán nɔn mɛ̀n.

Nukù-die mán eci-hán

¹⁹ Anwrɔn-nɛ́n-muan-ẅì hɔ̀n, kè bru nyɛ̀n le: ke ji le ɔwrɔnwrɔn ke bɩ́ wú edù n'ankà nukù-diemɛ̀n, tɛ́n nɛ̀n vrá, yakɛ nɛ̀n dɔ́ ankà, kɩ ke sɩ́ ji le nɛ́n gɔ́ bɩ́ ɛmɛ̀nhyì,

²⁰ ɔmuhi ɛmɛ̀nhyì-bɩ́-wrɔn lɔ, nɛ́n sɩ́ hán eci kɛ nyrɔn Ɔwɔ zìwú nɔn.

²¹ Hɩ le kruhú de ke ji le, nyɛ́n kɔ́n ɛci hɔ̀n lɔ fɛn léyi kɛ wá ɛnbrá edomɛ̀n, hɩ kɛ tán eci-gbàngbàn-hán nɔn, nyɛ́n cüe. Nyɛ́n shrì nyɛ́n sɩ́ ny'edomɛ̀n ɛnhi, ô nyɛ́n bɩ́ Ɔwɔ ankà léyi tɛ́ ny'ɛnbɔrɛ lɔ mɛ̀n nɔn, ɔmuhi ne le bɩ́ nyɛ̀n nɛ̀n die tɛ̀ nɔn.

²² Nyɛ́n bɩ́ frɛ́n ny'edomɛ̀n Ɔwɔ ankà nukù-diemɛ̀n, tɛ́n ke ji le nyɛ́n hán n'ɛkɔrɛ̀-zì ci.

²³ Ɔmuhi ɔwrɔn léyi ke die ankà nukùɛ, hɩ ke sɩ́ hán n'ɛkɔrɛ̀-zì ci nɔn, nɛ́n dù nɛ̀n cá ɔwrɔn léyi kɛ nyán n'edomɛ̀n zɛnciemɛ̀n, hɩ kɛ kán ɔmu le nɛ̀n hán nɛ́n dù nɔn.

²⁴ Ɛnvra léyi nɛ̀n nyán n'edomɛ̀n trɔ nɔn, nɛ hɔ̀n, kɩ ɛnvra zri lɔ, esùva ke yuru nɛ̀n, nɛ́n sɩ́ vru nyri ɔmu le nɛ̀n hán nɛ́n dù nɔn.

²⁵ Tɛ́n, ɔwrɔn léyi kɛ crɛ́n Ɔwɔ nyanmàn ankrànkràn lɔ ɛmɛ̀n anvrɛnvrɛn nɔn, ɛnyanmàn léyi kɛ tán bɔ̀ ɛkɔrɛ̀levri eci-hán mɛ̀n, hɩ kɛ ẅɛn nɛ̀n kɛ hɛ́n ɔmùan-zri-diemɛ̀n, hɩ ke sɩ́ bɩ́ nɛ̀n ke yuru esùva, hɩ kɛ hán n'ɛkɔrɛ̀-zì-ci nɔn, ɔwrɔn ndɔ lɔ, Ɔwɔ ke le fú nɛ̀n ɛnshi n'eci-hán mɛ̀n.

²⁶ Ke dú kɛ ɔwrɔn ke tro le nɛ̀n dú Ɔwɔ wrɔn kɩ nɛ́n sɩ́ nyri crɛ n'ɔwɔɛ̀n lɔ ankà-dɔ́ mɛ̀n hô, nɛ̀n dú ɛzɛ́n mɛ̀n: N'Ɔwɔ kɔ̀hɔ̀n lɔ ke sɩ̀ ẅɛ̀n vɔ̀nshɛ́.

²⁷ Nyàn eci léyi Ɔwɔ Zí ke bɩ ke wotro ɔkɔ̀hɔ̀n fifi mán annanwɔrɛ nɔn: Yɔ wá ɛzhe-ẅì hɔ̀n mán ɛngrɔn-wúyɔ̀ hɔ̀n ɛkɔrɛ̀ y'ɛgbànkàn lɔ mɛ̀n, ô nyɛ́n wá ny'edomɛ̀n esùva ɛnu ɛnhibù wú ci-gbàngbàn lɔ fɛn tɛ̀sɛ̀n.