Rɔmɛ̀n-anmàn-bɔ̀ 6 - Ɛmɛẅi ankà ankrànkràn 2003

Bɔ́ dú owú-bɔ̀ ɛgbàn mɛ̀n, tɛ́n Krisì mɛ̀n lɔ, bɔ́ dú ɔkɔrɛ-bɔ̀

¹ N'ɛwú lɔ ankà tán de bɔ́ lɛ dɔ̀ nɛ́n? Bɔ́ le dú ɛnvra lɔ fɛn ɛgbàn mɛ̀n, ô Ɔwɔ-boafɔ̀n kɛ sàn cüɛn kè dú bɔ́ tɛn hán?

² Annanwɔrɛ mɛ̀n lɔ kè sɩ̀ dù ɔmu lɔ! Bɔ̀ dú owú-bɔ̀ ɛgbàn mɛ̀n: anwɔntan de bɔ́ lɛ hán bɔ̀ vru bɔ́ dú ɛgbàn-wúvà mɛ̀n nɛ́n?

³ Nyɛ́n sɩ̀ nyrì ɔmu le bɔ́ lɔ fɛn léyi yɛ wá bɔ̀ ɛnshi ɛnkru, ô bɔ́ mán Zhezü Krisì mɛhi bɔ́ dú eci zri, kɩ bɔ́ ɛnshikru-wá lɔ hán bɔ̀ bɔ́ bru n'owù lɔ mɛ̀n hàn?

⁴ Zɛtɛn ɛnshikru-wá mɛ̀n de yɛ wá bɔ̀ ezhe nànmàn mɛ̀n, nɛ́n mán bɔ́ mɛhi, ô bɔ́ bru n'owù lɔ mɛ̀n, ô ɔmu zri léyi Ɔwɔ zi ci-zrɔ kɔrɛ̀-srɔ̀n lɔ mɛ̀n, Krisì dú owú-bɔ̀ mɛ̀n vá ɔkɔrɛ-bɔ̀ mɛ̀n nɔn, bɔ́ mán bɔ́ dú ɛwúvà wrù mɛ̀n.

⁵ Annanwɔrɛ mɛ̀n lɔ, ke dú kɛ bɔ́ mán nɛ́n mɛhi bɔ́ dú ɔbɔ̀sɔ mɛ̀n owù zri lɔ mɛ̀n hô, bɔ́ le vru bɔ́ dú ɔbɔ̀sɔ̀ zri lɔ mɛ̀n nɛ́n mán bɔ́ mɛhi n'owúemɛ̀n-dùfrɔ́ lɔ mɛ̀n.

⁶ Ke ji le bɔ́ nyri ankà ndɔ lɔ anvrɛnvrɛn: anwrɔnẅì léyi dú bɔ̀ ɛnkrubɔmɛ̀n nɔn, bɔ́ mán Krisì mɛhi ye di bɔ̀ owúemɛ̀n ɛgbàn-hán-tɛ̀ domɛ̀n, ô bɔ́ ɛgbàn-dù-cì lɔ yɛ jrɛ́ nɛ̀n, ô bɔ́ bɩ́ vru dú ɛgbàn-wɔ̀n-bɔ̀.

⁷ Ɔmuhi Ɔwrɔn léyi wù nɔn, nɛ̀n dú ɛgbàn mɛ̀n nɛ́n kakɛ.

⁸ Ke dú kɛ bɔ́ mán krisì mɛhi bɔ́ wù hô, bɔ̀ ẅɛn esɛ́ le, bɔ́ mán nɛ́n mɛhi bɔ́ lɛ kɔrɛ̀ bɔ́ le dù.

⁹ Bɔ́ nyri annanwɔrɛ mɛ̀n le, ɛnvra sheshe léyi Krisì dú owú-bɔ̀ mɛ̀n vru vá ɔkɔrɛ-bɔ̀ mɛ̀n nɔn, nɛ́n sɩ̀ vru wùɛ: owù kè sɩ̀ vrù ẅɛ̀n ɛkɔrɛ̀-srɔn zriɛmɛ́n n'ɛwúɛ.

¹⁰ Owúemɛ̀n lɔ, nɛ́n mán ɛgbàn mɛhi yɔ wú brɛzri; tɛ́n zɛtɛ̀ léyi nɛ̀n dú ɔkɔrɛ-bɔ̀ mɛ̀n nɔn, nɛ́n kɔrɛ̀ nɛ̀n dú Ɔwɔ tɛn.

¹¹ Ɔmu zri lɔ, nyɛ́n mán, nyɛ́n tro le nyɛ́n wú ɛgbàn kruhú kɩ nyɛ́n dú Ɔwɔ tɛn ɔkɔrɛ-bɔ̀ mɛ̀n, nyɛ́n mán Krisì mɛhi ny'ɔbɔ̀sɔ̀ lɔ mɛ̀n.

¹² Ke sɩ́ ji le ɛgbàn kè vru ke dú ny'owù dùwrú lɔ ɛwú, ô kɛ̀ hán nyɛ̀n nyɛ́n hán edùwrú ndɔ lɔ ci léyi ke ji nɔn.

¹³ Nyɛ́n bɩ́ vru bɩ́ ny'edùwrú yri hɔ̀n lɔ fɛn nyɛ́n wá ɛgbàn kɔ̀hɔ̀n-hán mɛ̀n. Tɛ́n nyɛ́n bɩ́ ny'edomɛ̀n nyɛ́n ce Ɔwɔ, kè dù kɛ̀ hán anwrɔn hɔ̀n léyi dú owú-bɔ̀ mɛ̀n vru vá ɔkɔrɛ-bɔ̀ mɛ̀n, ô nyɛ́n bɩ́ ny'edùwrú mumù lɔ fɛn nyɛ́n wá ɔkɔ̀hɔ̀n léyi dú ɛnyrɔnnan-ci nɔn mɛ̀n.

¹⁴ Annanwɔrɛmɛ̀n lɔ, ɛgbàn ke sɩ̀ vru ẅɛn ɛkɔrɛ̀-srɔn ny'ɛwú, ɔmuhi nyɛ́n sɩ̀ dù ɛnyànmàn kɔrɛ̀-levri wú, tɛ́n nyɛ́n dú Ɔwɔ-boafɔ̀n mɛ̀n nɔn.

Ɛnyrɔnnan ci-bɩtan-kɔ̀hɔ́n mɛ̀n

¹⁵ Tɛ́n ecitan? Bɔ́ lɛ hán ɛgbàn, ɔmuhi bɔ̀ sɩ̀ vrù dù ɛnyànmàn kɔrɛ̀-levri wú, tɛ́n bɔ̀ dú Ɔwɔ-boafɔ̀n mɛ̀n nɛ́n? Annànwɔrɛ mɛ̀n lɔ hɔ̂!

¹⁶ Nyɛ́n nyri anvrɛnvrɛn le: ke dú kɛ nyɛ́n dú ɔwrɔn tɔ̀n kɔ̀hɔ̀n-hán mɛ̀n, ô nyɛ́n ẅɛn n'ɔwá, nyɛ srɔ ankà-yé-wrɔn léyi nye yi anhyɛ nɔn, n'anwɔ̀n-bɔ̀; ndú hán ɛgbàn léyi ke sɩ́ owúemɛ̀n, vru dú hán Ɔwɔ anhyɛyì léyi ke sɩ́ ɛwúvà-nyrɔnnan mɛ̀n nɔn.

¹⁷ Tɛ́n Ɔwɔ kɛ̀ cɔ́ ɛmrɛ́n: nyɛ́n léyi nyɛ́n gɔ̀ dú ɛgbàn wɔ̀n-bɔ̀ nɔn, zɛtɛ̀ lɔ nyɛ́n bɩ́ ny'ɛnbɔrɛ lɔ fɛn nyɛ́n wá ankà-yé léyi nyɛ́n cɔ̀ nɔn wú.

¹⁸ Yɛ mrɛ́n nyɛ̀n ɛgbàn mɛ̀n yɛ sɔhɔ́ kɩ nyɛ́n bru ɛnyrɔnnan ci-bɩtan-kɔ̀hɔ́n mɛ̀n.

¹⁹ Mɛ dɔ́ anwrɔnẅìemɛ̀n ankà ɔmu lɔ, ɔmuhi ɛjɛ̀ dú ny'edùci nɔn. Ɛnkrubɔmɛ̀n lɔ, nyɛ́n dú nyɛ́n mumù lɔ fɛn anwɔ̀n-bɔ̀, kɩ nyɛ́n dú ɛnbrá mán eci-gbàngbàn hɔ̀n léyi kɛ tán nyɛ̀n ezì kɛ̀n Ɔwɔ tɛ̀sɛ̀n nɔn y'eci-bɩtan-kɔ̀hɔ́n mɛ̀n; ɔmu zri lɔ, zɛtɛ̀ lɔ, ke ji le nyɛ́n mumù lɔ fɛn nyɛ́n srɔ anwɔ̀n-bɔ̀, ô nyɛ́n dú ɛnyrɔnnan ci-bɩtan-kɔ̀hɔ́n mɛ̀n, ô nyɛ́n ẅɛn ɛwúvà prɔnprɔn.

²⁰ Ɛnvra léyi nyɛ́n dú ɛgbàn wɔ̀n-bɔ̀ nɔn, nyɛ́n dú anwrɔn kora hɔ̀n, nyɛ́n sɩ̀ dù ɛnnyrɔnnan-ci-hán mɛ̀n.

²¹ Zɛtɛn zɛtɛ̀ lɔ, ecitan de nyɛ́n cɔ́ ny'anvɛvrà ci-gbàngbàn hɔ̀n lɔ hán mɛ̀n nɛ́n? Eci-hán-ci ndɔ hɔ̀n lɔ ke sɩ́ owúemɛ̀n!

²² Tɛ́n zɛtɛ̀ lɔ nyɛ́n dú ɛgbàn mɛ̀n nyɛ́n kàkɛ kɩ nyɛ́n dú Ɔwɔ ci-bɩtan-kɔ̀hɔ̀n-hán mɛ̀n; nyɛ́n vɔ̀nshɛ́ dú ɛnyrɔn léyi ke sɩ́ nyɛ̀n ɛwúvà prɔnprɔn mɛ̀n, kɩ ɔtrɔmɛ̀n lɔ, nyɛ cɔ́ ɛwúvà léyi ke sɩ́ trɔa nɔn.

²³ Ɔmuhi ɛgbàn wɔ̀ɛn-dì dú owù nɔn; tɛ́n ecice-ci léyi Ɔwɔ kɛ tán ankora nɔn, dú ɛwúvà léyi ke sɩ́ trɔa, hɩ dú bɔ́ mán Zhezü Krisì bɔ́ Ɛẅɛnwrɔn mɛhi b'ɔbɔ̀sɔ̀ lɔ mɛ̀n nɔn.