Rɔmɛ̀n-anmàn-bɔ̀ 3 - Ɛmɛẅi ankà ankrànkràn 2003

¹ Zɛtɛn vɔ̀nshɛ́ tɔ̀n tán de yɛ lɛ ẅɛ̀n ke dú kɛ ye dú Zhüifɛ̀n-wrɔn nɛ́n? Wúcɔ̀-domɛ̀n-wì dú eci-hán-ciɛ?

² Vɔ̀nshɛ́ léyi dú nɛ̀n ɛmɛ̀n nɔn, sevri eci lɔ fɛn mɛ̀n. Kɩ ɛnkrubɔmɛ̀n lɔ, Zhüifɛ̀n-bɔ̀ de Ɔwɔ wá n'ɔmùan-wá hɔ̀n lɔ antamɛ̀n nɔn.

³ Annanwɔrɛ mɛ̀n lɔ, y'ɛmɛ̀n lɔ, ɛnjanbɔ̀ kè sɩ̀ dì ɔmùan-zri. Tɛ́n ecitan, Ɔwɔ kɛ lɛ wrɔ́ n'ɔmùan-zri-dì lɔ ɛmɛẅi, ɔmuhi yɔ tɛn yɔ sɩ̀ dì ɔmùan-zri nɛ́n?

⁴ Annànwɔrɛ mɛ̀n lɔ, hɔ̂, kè sɩ̀ dù ɔmu lɔ! Ɛmɛ̀n fi cehɛ́n le, Ɔwɔ kɛ hán eci annanwɔrɛ mɛ̀n, kɩ ke dú kɛ ɔwrɔn totɔtɔ̀n kɛ hán ɛyɔ̀n-ci mán, hán ɔmu le Owrú Prɔnprɔn ndɔ̀ nɔn: “Ke ji le è dú ɛnyrɔnnan mɛ̀n v'ankà-dɔ́ mɛ̀n, ô è dú ɔkɔ̀nká-wrɔn ke dú kɛ ye sɩ́ mɛ́n ɛmrɛ̀nciemɛ̀n.”

⁵ Tɛ́n ke dú kɛ ɛgbàn léyi bɔ́ hán nɔn, n'ɛwú lɔ Ɔwɔ kɛ hán bɔ̀ ɛgbàn hô, ankà tán bɔ́ lɛ dɔ̀a? Ɔwɔ kè sɩ̀ dù ɛnyrɔnnan-wrɔn ɔmuhi nɛ hán bɔ̀ ɛgbàn nɛ́n? (Mɛ dɔ́ anwrɔnẅìemɛ̀n ankà.)

⁶ Kè sɩ̀ dù ɔmu lɔ! Ɔmuhi ke dú ɔmu lɔ hô, anwɔntan de nɛ lɛ hán nɛ̀n ci ɛnhibù ɛmrɛ̀n nɛ́n?

⁷ Tɛ́n ke dú kɛ m'ɛyɔ̀n lɔ kɛ hán Ɔwɔ nyrɔnnan lɔ ke dú ɛyri-kan mɛ̀n, kɩ kɛ srɔ n'eci-zrɔ, cɛci kruhú kɛ ye le vru yɛ bó mɛ̀n nwù kɛ̀ hán ɛgbàn-hán-wrɔn hɔ́ nɛ́n?

⁸ Kɩ zɛtɛn, cɛci kruhú kɛ ye sɩ̀ dɔ̀ le: “Bɔ̀ hán ɛgbàn, ô bɔ̀ cɔ́ anvrɛn hán?” Anwrɔn janbɔ̀ léyi ke ji kɛ dɔ́ ɛyɔ̀n ankà ke ku mɛ̀n ɛwú nɔn, kɛ ẅɛn ɛshishiemɛ̀n hɛ́n le, ndɔ lɔ dú m'ɛnkruemɛ̀n ankà-dɔ̀. Anwrɔn ndɔ hɔ̀n lɔ, nwù-bɔ̀ dú yɔ tɛn, kɩ nwù-bɔ̀ ndɔ lɔ vɛ́n yɔ anvrɛnvrɛn!

Ɔwrɔnẅì zriɛmɛ́n kè sɩ̀ dù ɛnyrɔnnan-wrɔn

⁹ Tɛ́n ecitan? Bɔ́ Zhüifɛ̀n-bɔ̀ lɔ, bɔ̀ vrán bɔ́ nyran hɔ̀n hàn? Hɔ̂, kè sɩ̀ dù ɔmu lɔ! Mɛ́n gɔ̀ yé le, bɔ́ lɛ fɛn lɔ, Zhüifɛ̀n-wrɔn dú mɛ́n hô, è sɩ̀ dù Zhüifɛ̀n-wrɔn hô, bɔ̀ dú ɛgbàn kɔrɛ̀levri wú.

¹⁰ Owrú kɛ dɔ́ ankà lɔ: “Ɛnyrɔnnan-wrɔn zriɛmɛ́n bàdà, hɩ ká dú ɛnzri mán,

¹¹ ɔwrɔnẅì zriɛmɛ́n bàdà hɩ ká dú ankà-yá-wrɔn, ɔwrɔnẅì zriɛmɛ́n bàdà hɩ ká dú Ɔwɔ jiemɛ̀n nɔn.

¹² Yɔ lɔ fɛn yɔ cɔhɔ́ ɛnlevri ankrankran wú, ɔmùan-krɔn mɛ̀n yɔ dú ɛzrɛ́n mɛ̀n. Anvrɛn-hán-wrɔn zriɛmɛ́n bàdà, hɩ ká dú ɛnzri mán.

¹³ Y'esùva mɛ̀n lɔ dú cá ezhe nànmàn léyi ɔmùan vru dɛ́, y'ɔwɔ̀ɛn lɔ kɛ tán yɔ ɛfrɛ́n ci-hán, ɛnlɛbrì dà de ke dú yɔ ɔmùanwrú wú kɛ srɔ ɛntrɛ,

¹⁴ ɛẅìɛ-dà drɔ yɩ́ y'ɔmùan lɔ mɛ̀n.

¹⁵ Yɔ srɛ́ ɛkprànman mɛ̀n, ô yɔ wri ɔwrɔn,

¹⁶ ɛyri lɔ fɛn léyi yɔ cì nɔn, yɔ gbɔngbɔ́ ɛci kɩ yɔ wá muzhie ɛyri,

¹⁷ yɔ sɩ̀ nyrì anwɔwɔ levri.

¹⁸ Y'ɛwúvà lɔ mɛ̀n, yɔ sɩ̀ ẅɛ̀n Ɔwɔ sù.”

¹⁹ Bɔ nyri ɔmu le ankà lɔ fɛn léyi ɛnyànmàn kɛ dɔ̀ nɔn, nɛ dɔ́ tán anwrɔn hɔ̀n léyi nyɔn ɛnyànmàn wúɛ, ô ɔwrɔn zriɛmɛ́n ke bɩ́ mrɛ́n ɔmùan ke yɩ́ n'edomɛ̀n anhyɛ́, ô ɛnhibù mumù lɔ fɛn kè nyri ɔmu le, nɛ̀n dú nwù-bɔ mɛ̀n Ɔwɔ zìwú.

²⁰ Ɔmuhi ɔwrɔn zriɛmɛ́n ke sɩ́ dú ɛnyrɔnnan-wrɔn Ɔwɔ-zìwú, ɔmuhi nɛ̀n hán ɛnyànmàn kɔrɛ̀-zì-ci nɔn; ɛnyànmàn kɛ wá ɛkɔrɛ̀, ô ye nyri ɛgbàn.

Ɔmu le Ɔwɔ kɛ hán ke bɩ́ anwrɔnẅì ke die nɔn

²¹ Tɛ́n zɛtɛ̀ lɔ, Ɔwɔ yé bɔ̀ ɔmu le nɛ srɔ bɔ̀ ɛnyrɔnnan-bɔ̀ n'ezìwú, kɩ ndɔ lɔ kè sɩ̀ dù ɛnyànmàn wú ci-hán-mɛ̀n. Ɛnyànmàn mán Ɔwɔ-mùanwú-ankà-dɔ́-bɔ̀ wrú hɔ̀n lɔ gɔ́ di yi dalɛfuɛ lɔ:

²² Ɔwɔ kɛ srɔ anwrɔnẅì ɛnnyrɔnnan-bɔ̀ n'ezìwú y'ankaẅì-bùtan léyi yɔ ẅɛn Zhezü Krisì mɛ̀n nɔn hɩ wú. Nɛ hán ndɔ lɔ tán anwrɔn hɔ̀n lɔ fɛn léyi ẅɛn ankaẅì-bùtan Krisì mɛ̀n nɔn, ɔmuhi yɔ lɔ fɛn nzriɛmɛ́n kè sɩ̀ vɛ̀n hàn nɔn:

²³ yɔ lɔ fɛn yɔ hán ɛgbàn kɩ yɔ lɔ fɛn yɔ sɩ́ kán Ɔwɔ ci-zrɔ lɔ.

²⁴ Tɛ́n Ɔwɔ, n'ɛzrɔ lɔ mɛ̀n, kɛ hán yɔ, yɔ srɔ ɛnyrɔnnan-bɔ̀ n'ezìwú, ankora, Zhezü Krisì léyi kɛ mrɛ́n yɔ ɛgbàn mɛ̀n sɔhɔ́ nɔn n'ɛkruhú.

^25-26 Ɔwɔ bɩ́ nɛ̀n ce eci, ô n'owù lɔ mɛ̀n, Krisì kɛ̀ cɔ́ ɛgbàn-bɩ̀-ce kè dú anwrɔn hɔ̀n léyi ẅɛn ankaẅì-bùtan n'ɛwú nɔn tɛn. Ɔmu lɔ de Ɔwɔ yé ɛnvra lɔ fɛn le, nɛ̀n dú ɛnyrɔnnan-wrɔn: nɛ́n gɔ̀ dú ɛnyrɔnnan-wrɔn ɛnbìɛhɛ́n, ɛnvra léyi anwrɔnẅì dú ɛgbàn mɛ̀n, hɩ nɛ̀n sɩ̀ bɩ̀ ɛmɛ̀nhyì nɛ̀n teze yɔ, yɔ dú ɛgbàn-hán mɛ̀n; nɛ̀n dú ɔmu zri lɔ zɛtɛ̀ lɔ, ɔmuhi ne ji ɛnvra zri lɔ mɛ̀n nɛ̀n dú ɛnyrɔnnan-wrɔn, ô anwrɔn hɔ̀n léyi ẅɛn ankaẅì-bùtan Zhezü mɛ̀n nɔn, nɛ̀n srɔ yɔ ɛnyrɔnnan-bɔ̀.

²⁷ Tùtre-dì ankà tɔ̀n vru dú nɛ̀n ɛmɛ̀n hàn? Hɔ̂, nzriɛmɛ́n! Ecitan kruhúɛ? Ɔmuhi ɛshishi léyi dú nɛ̀n ɛmɛ̀n nɔn, kè sɩ̀ dù ɛnyànmàn léyi ye le nyrì wá esùva nɔn, tɛ́n ke ji le ye bù tán ankaẅì.

²⁸ Bɔ́ tro le, annanwɔrɛ mɛ̀n lɔ, ɔwrɔnẅì kɛ srɔ ɛnyrɔnnan-wrɔn Ɔwɔ zìwú n'ankaẅì-bùtan-ẅɛ̀n kruhú, kɩ kè sɩ̀ dù ɛnyànmàn léyi nɛ wá nɔn hɩ kruhú.

²⁹ Kale zɛtɛn, Ɔwɔ ke le dú Zhüifɛ̀n-bɔ̀ zri Wɔa? Kɛ̂ nɛ̀n sɩ̀ dù fɛcüè ndɔ hɔ̀n lɔ mán y'Ɔwɔ hà? Annanwɔrɛ kɩ, yɔ mán nɛ̀n dú y'Ɔwɔ,

³⁰ ɔmuhi Ɔwɔ zri kɩ dù nɔn. Nɛ lɛ srɔ Zhüifɛ̀n-bɔ̀ ɛnyrɔnnan-bɔ̀ n'ezìwú ankaẅì-bùtan-ẅɛn mɛ̀n, kɩ nɛ lɛ srɔ anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, yɔ mán ɛnyrɔnnan-bɔ̀ n'ezìwú ankaẅì-bùtan-ẅɛn mɛ̀n.

³¹ Kɛ̂ ndɔ lɔ, n'ɛmɛ̀n kɛ dɔ̀ le ankaẅì-bùtan-ẅɛ̀n lɔ kɛ hán bɔ́ srɔ ɛnyànmàn eci woro hɛ́? Hɔ̂, tɛ́n bɔ́ tán nɛ̀n, nɛ́n vɔ̀nshɛ́ annanwɔrɛ lɔ.