Rɔmɛ̀n-anmàn-bɔ̀ 16 - Ɛmɛẅi ankà ankrànkràn 2003

M'ebinyan hɔ̀n

¹ Mɛ wá nyɛ̀n antamɛ̀n, bɔ́ muan-ẅì ɛnnyɔnwrɔn léyi ye bi Febe hɩ dú Sankre Wɔ-wɔn ci-bɩ̀tan-kɔ̀hɔ́n mɛ̀n nɔn.

² Nyɛ́n ẅɛn nɛ̀n anvrɛnvrɛn Ɛẅɛnwrɔn bɩmɛ̀n, kɛ hán ɔmu le ke ji le yɛ hán ankaẅì-bùtan-ẅɛn-bɔ̀ granmɛ̀n, ô nyɛ́n wá nɛ̀n ɛkɔrɛ̀ eci lɔ fɛn mɛ̀n léyi ne ji ny'ɛkɔrɛ̀-wá nɔn. Ɔmuhi nɛ́n mumù mán, nɛ̀n wá anwrɔn bobrebe ɛkɔrɛ̀, annannan le mɛ̀n mán.

³ Nyɛ́n tán Prisilɛ̀n mán Akilasɛ̀n m'ebinyan, yɔ léyi yɔ dú m'annyran anvrɛn hɔ̀n Zhezü Krisì ci-bɩtan-kɔ̀hɔ̀n lɔ mɛ̀n nɔn.

⁴ Yɔ vá y'ɛwúvà zrɛ́n yri, ô yɔ bɩ́ m'ɛwúvà lɔ yɔ die. Kè sɩ̀ dù mɛ́n zri kɩ mɛ̀n ẅɛ̀n y'ɔkùɛn tán, Ɔwɔ fɛcüè hɔ̀n lɔ fɛn dú ɛnhibù wú, hɩ kè sɩ̀ dù Zhüifɛ̀n-bɔ̀ mán nɔn, yɔ mán yɔ dú ɛmɛ̀n.

⁵ M'ebinyan kè dú Ɔwɔ fɛcüè léyi kɛ borɛ y'edomɛ̀n ɛkru y'anmàn nɔn tɛn. M'ebinyan kè dú annyran anvrɛn Epahinɛtɛ̀n tɛn, nɛ́n léyi nɛ̀n dú ɛnvrakpà-wrɔn, nɛ̀n srɔ ankaẅì-bùtan-ẅɛn-wrɔn Krisì bɩmɛ̀n, Azi kpɔsɔ wú nɔn.

⁶ M'ebinyan kè dú Mari tɛn, nɛ́n léyi nɛ̀n hán ɔkɔ̀hɔ̀n bobrebe nɛ̀n tán nyɛ̀n nɔn.

⁷ M'ebinyan kè dú Androniküsɛ̀n mán Zhüniasɛ̀n tɛn, yɔ léyi yɔ dú m'ɛmɛ̀n-bɔ̀, hɩ yɔ mɛhi yɛ wá bɔ̀ anwɔn-mɛ̀n-wá-wɔn mɛ̀n nɔn. Yɔ ẅɛn ɛcüɛ̀n bobrebe ɔkɔ̀hɔ̀n-wá-bɔ̀ wanzi kɩ yɔ vru yɔ dú krisì-sɛ̀nkɛn-bɔ̀ yakɛ mɛ̀n trɔ ɛmɛẅi.

⁸ M'ebinyan kè dú Anplihatüsɛ̀n tɛn, nɛ́n léyi nɛ̀n dú m'edùyɔ-wrɔn Krisì bɩmɛ̀n nɔn.

⁹ Nyɛ́n bi Urbɛ́n nyɛ́n nyan, nɛ́n léyi nɛ̀n dú bɔ́ nyran anvrɛn Krisì ci-bɩ̀tan-kɔ̀hɔ́n mɛ̀n, kɩ ebinyan zri lɔ kè dú m'annyran anvrɛn Stashisɛ̀n tɛn.

¹⁰ M'ebinyan kè dú Apelɛsɛ̀n tɛn, nɛ́n léyi nɛ̀n yé n'ankaẅì-bùtan lɔ Krisì mɛ̀n nɔn. M'ebinyan kè dú anwrɔn hɔ̀n léyi dú Aristobülɛ̀n bɩ́ lɔ mɛ̀n nɔn tɛ́n.

¹¹ M'ebinyan kè dú Herodiɔn tɛn, nɛ́n léyi nɛ̀n dú m'ɔwrɔn nɔn. M'ebinyan kè dú anwrɔn hɔ̀n léyi dú Narsisɛ̀n wɔn lɔ mɛ̀n, hɩ ẅɛn ankaẅì-bùtan Ɛẅɛnwrɔn mɛ̀n nɔn tɛn.

¹² M'ebinyan kè dú Trifɛnɛ̀n mán Trifozɛ̀n tɛn, yɔ léyi yɔ hán Ɛẅɛnwrɔn kɔ̀hɔ̀n bobrebe kɩ ebinyan zri lɔ kè dú nmàn anvrɛnvrɛn Persidɛ̀n tɛn, nɛ́n léyi nɛ̀n hán Ɛẅɛnwrɔn kɔ̀hɔ̀n bobrebe nɔn.

¹³ M'ebinyan kè dú Rüfüsɛ̀n tɛn, nɛ́n léyi nɛ̀n ẅɛn ɛvɛ̀cüɛ̀n, hɩ nɛ̀n dú Ɛẅɛnwrɔn ci-bɩ̀tan-wrɔn, kɩ ebinyan zri lɔ kè dú nɛ́n muan léyi vru dú nmàn nɔn tɛn.

¹⁴ M'ebinyan kè dú Asɛnkritɛ̀n, Felegɔn, Hermɛsɛ̀n, Patrobasɛ̀n, Hermasɛ̀n mán anwrɔn-nɛ́n-muan-ẅì hɔ̀n léyi yɔ mɛhi yɔ dù nɔn tɛn.

¹⁵ M'ebinyan ke dú Filologɛ̀n mán Zhüli, Nere mán nɛ́n muan-ẅì ɛnnyɔnwrɔn, Olɛnpasɛ̀n, mán ankaẅì-bùtan-ẅɛn-bɔ̀ lɔ fɛn léyi yɔ mɛhi yɔ dù nɔn tɛn.

¹⁶ Nyɛ́n bi ny'edomɛ̀n nyɛ́n nyan anwrɔn-nɛ́n-muan-ẅì hɔ̀n mùan-sɔ́n mɛ̀n. Krisì-fɛcüè-bɔ̀ lɔ fɛn ke yüre nyɛ̀n y'ebinyan.

Ɛmɛẅi-trɔ ankà-bi-dɔ̀

¹⁷ Mɛ dɔ́ nyɛ̀n, anwrɔn-nɛ́n-muan-ẅì hɔ̀n, nyɛ́n wá ny'edomɛ̀n esùva anwrɔn hɔ̀n léyi ke sɩ́ ɛsɔ̀nvoyan nɔn y'ɛtɛ̀sɛ̀n, yɔ léyi yɔ kɛ́n ankà-yé léyi ankaẅì-bùtan-ẅɛn-bɔ̀ ncɔ̀ nɔn ezì, kɩ kɛ hán yɔ, yɔ bru ɛzɛ́n mɛ̀n nɔn. Nyɛ́n cɔhɔ́ y'ɛtɛ̀sɛ̀n,

¹⁸ ɔmuhi anwrɔn ɔmu hɔ̀n lɔ kè sɩ̀ dù Krisì, bɔ́ Ɛẅɛnwrɔn ci-bɩ̀tan-bɔ̀, tɛ́n yɔ dú yɔ dùku y'ɛmɛ̀ntɛ̀ ci-bɩ̀tan-bɔ̀! Y'anmuan mɛ̀n mrɛnmrɛn mán y'ɛfrɛ́n ankà-dɔ̀, kɛ hán yɔ, yɔ frɛ́n ɛnhyɔ̀bɔ̀-di-bɔ̀.

¹⁹ Anwrɔnẅì lɔ fɛn nyri ny'Ɛẅɛnwrɔn wá. Mɛ brá pɔpüɛ̀ ny'ɛwú, tɛ́n mɛ cüɛ̀n le, nyɛ́n dú ankà-nyri-bɔ̀, ô nyɛ́n hán anvrɛn nyɛ́n dú ɛfifi, ô nyɛ́n yrá ɛgbàn.

²⁰ Ɔwɔ, léyi dú anwɔwɔ shi-bɛ́ nɔn, kɛ lɛ boyɛ anwawrɔn wá ɛnvra buriemɛ̀n ny'annantrɛ̀ krugbɛ̀n. Ke ji le bɔ́ Ɛẅɛnwrɔn Zhezü boafɔ̀n lɔ kɛ và dú nyɛ̀n ɛmɛ̀n!

²¹ Timote, m'anyran anvrɛn ɔkɔ̀hɔ̀n hán mɛ̀n, ke bi nyɛ̀n nyan, ɔmu zri lɔ de Lüsiüsɛ̀n, Zhasɔn mán Sozipatɛrɛ̀n, m'ɛmɛ̀n-bɔ̀ ke bi nyɛ̀n nyan nɔn.

²² Kɩ mɛ̀n Tertihüsɛ̀n, mɛ̀n léyi mɛ̀n merɛ́n owrú ndɔ lɔ nɔn, me yüre nyɛ̀n m'ebinyan Ɛẅɛnwrɔn léyi kɛ bɔsɔ bɔ̀ nɔn, n'ebɩmɛ̀n.

²³ Gahiüsɛ̀n, m'ebɩ-nɛ́n-zi, ke bi nyɛ̀n nyan. N'ebɩ́ lɔ mɛ̀n de Ɔwɔ fɛcüè lɔ fɛn kɛ borɛ ɛkru nɔn. Erastɛ̀n, anmàn-kùa-hɛ́n-wrɔn ke bi nyɛ̀n nyan, ɔmu zri lɔ de Kartüsɛ̀n mán ke bi nyɛ̀n nyan nɔn. [

²⁴ Ke ji le bɔ́ Ɛẅɛnwrɔn Zhezü Krisì boafɔ̀n lɔ kɛ và dú nyɛ lɛ fɛn ɛmɛ̀n. Kè dú ɔmu lɔ.]

Ɔwɔ mɛẅi-trɔ mrɛ́n

²⁵ Bɔ̀ mrɛ́n Ɔwɔ! Nɛ̀n ẅɛn ɛkɔrɛ̀srɔn nɛ lɛ tán bɔ̀ ecüì ankaẅì-bùtan mɛ̀n, Ɛmɛẅi ankà Ankrankran léyi mɛ dɔ̀ nɔn n'ɛwú, ɛkùyüre léyi mɛ tán Zhezü Krisì ankà wú nɔn, mán Ɔwɔ ankɔ́nda ci-hán ankà-bán-ankà léyi bɔ́ cɔ̀ bɔ́ nyrì nɔn n'ɛwú. Ankɔ́nda ci-hán ndɔ lɔ dú ɛbán mɛ̀n ɛnvra sheshe ɛnbiehɛ́n vra lɔ,

²⁶ tɛ́n zɛtɛ̀ lɔ, ye sɩ́ nɛ̀n ɛyri-kán mɛ̀n, Ɔwɔ-mùanwú-ankà-dɔ́-bɔ̀ wrú hɔ̀n lɔ mɛ̀n; hán ɔmu le godogodo Wɔ wá tán nɔn, yɛ tán ɛnhi wú anmàn hɔ̀n lɔ fɛn nyrì, ô yɔ bú n'ankà yɔ tán ankaẅì, yɔ ẅɛn n'ɔwá.

²⁷ Ɔwɔ zri léyi dú ankà-nyri-wrɔn nɔn eci-zrɔ kè dú nɛ tɛn, Zhezü Krisì bɩmɛ̀n, ɛnvra lɔ fɛn! Kè dú ɔmu lɔ.