Rɔmɛ̀n-anmàn-bɔ̀ 12 - Ɛmɛẅi ankà ankrànkràn 2003

Ɛwúvà wrù Ɔwɔ-kɔ̀hɔ̀n-hán mɛ̀n

¹ Anwrɔn-nɛ́n-muan-ẅì hɔ̀n, ɔmuhi Ɔwɔ yé bɔ̀ n'ɛcüɛ̀n lɔ nɔn, me yɩ́ nyɛ̀n edù nyɛ́n bɩ́ nyɛ́n mumù lɔ ankɔrɛ-kɔrɛ mɛ̀n nyɛ́n ce nɛ̀n, ndɔ lɔ de dú n'ɛvɛ̀-cüɛn-ci nɔn. Hɩ lɔ de dú ecice-kɔ̀hɔ̀n-hán annanwɔrɛ léyi dú ɔwɔ̀ɛn nyɛ́n ẅɛn nɛ̀n nɔn.

² Ɛnhibù wú dùci hɔ̀n lɔ ke bɩ́ dú ny'eci-hán-ci, tɛ́n nyɛ́n teze Ɔwɔ kɛ crɔn nyɛ̀n, ô kɛ̀ tán nyɛ̀n ɛnkruemɛ̀n-wɛ̀n wrù. Zɛtɛn nyɛ lɛ cɔ̀ nyɛ́n nyri eci léyi Ɔwɔ ke ji nɔn: eci léyi zrɔ, eci léyi dú n'ɛvɛ̀-cüɛn-ci mán eci léyi fì nɔn.

³ Ecice-ci léyi Ɔwɔ tán mɛ̀n n'ɛcüɛ̀n lɔ mɛ̀n nɔn, hɩ kruhú de mɛ dɔ́ tán nyɛ lɛ fɛn le: nyɛ́n bɩ́ ẅɛn ankà-tro ke sevri kɛ vrán nyɛ́n mumù. Tɛ́n nyɛ́n ẅɛn ankà-tro hɔ̀n léyi vɛ́n nyɛ̀n, ɔwrɔnwrɔn n'ankaẅì-bùtan léyi Ɔwɔ tán nɛ̀n nɔn hɩ wú.

⁴ Bɔ̀ ẅɛn edùwrú ẅia zri, tɛ́n bɔ́ edùwrú lɔ grɔ n'edomɛ̀n anmɛ̀ntɛ mɛ̀ntɛ kɩ ɔwrɔnwrɔn ẅɛn n'ɔkɔ̀hɔ̀n.

⁵ Ɔmu zri léyi bɔ̀ cüɛ́n nɔn, bɔ̀ ẅɛn edùwrú zri, bɔ mán Krisì mɛhi b'ɔbɔ̀sɔ̀ lɔ mɛ̀n, kɩ bɔ̀ dú ɔbɔ̀sɔmɛ̀n hán edùwrú ẅia léyi grɔ anmɛ̀ntɛ mɛ̀ntɛ nɔn hɔ́!

⁶ Bɔ̀ ẅɛn ɛnkruemɛ̀n-ci-hán mɛ̀ntɛ mɛ̀ntɛ léyi Ɔwɔ ce ɔwrɔnwrɔn ankora nɔn. Ke dú kɛ bɔ́ ɛmɛ̀n lɔ, ɔwrɔn tɔ̀n ẅɛn ɛnkruemɛ̀n kɛ dɔ́ ɛmɛẅi ankà léyi bɔ̀ cɔ́ Ɔwɔ yri nɔn, ke ji le nɛ̀n dɔ́ yi ankaẅì-bùtan-ẅɛn mɛ̀n.

⁷ Ke dú kɛ ɔwrɔn nyàntɛn tɔ̀n, dú eci-bɩtan-wrɔn ɛnkruemɛ̀n ẅɛn mɛ̀n, ke ji le nɛ̀n dú eci-bɩtan-wrɔn. Ɔwrɔn léyi ẅɛn ɛnkruemɛ̀n ankà-yé mɛ̀n nɔn, ke ji le nɛ̀n dú ankà-yé-wrɔn.

⁸ Ɔwrɔn léyi nyri edùyì ci-hán nɔn, ke ji le nɛ̀n tán nɛ́n nyran hɔ̀n edùyì. Ke ji le ɔwrɔn léyi ẅɛn n'ɛci kɛ tán nɔn, kɛ̀ tán ɛnbɔrɛ ankrankran mɛ̀n. Ɔwrɔn léyi kɛ nyrɔn nɔn, kɛ̀ nyrɔn anvrɛnvrɛn. Ɔwrɔn léyi kɛ wá ɛmian-bɔ̀ ɛkɔrɛ̀ nɔn, nɛ̀n hán yi pɔpüɛ̀-brá mɛ̀n.

⁹ Ke ji le ɛcüɛ̀n kè dú annanwɔrɛ. Nyɛ́n sú ɛgbàn, nyɛ́n hán anvrɛn kɔ̀hɔ̀n.

¹⁰ Nyɛ́n cüɛn ny'edomɛ̀n kɛ̀ hán anwrɔn-nɛ́n-muan-ẅì hɔ̀n léyi kɛ cüɛn y'edomɛ̀n nɔn; nyɛ́n wá ny'edomɛ̀n ecüɛn mɛ̀n.

¹¹ Nyɛ́n ẅɛn edùyì, tɛ́n nyɛ́n bɩ́ dú ɛjɛ-bɔ̀. Edùyì kè yɩ́ ny'ɛnbɔrɛ lɔ, ô nyɛ́n dú ɛẅɛnwrɔn ci-bɩ̀tan-wrɔn.

¹² Nyɛ́n dú pɔpüɛ̀-brá mɛ̀n, ny'esɛ́ léyi nyɛ́n ẅɛn nɔn hɩ kruhú, nyɛ́n ẅɛn ɛnbɔrɛ nyɛ́n hɛ́n ejüedì-gbànkán mɛ̀n; nyɛ́n sɛ́n Ɔwɔ ɔmùan-zri-diemɛ̀n.

¹³ Nyɛ́n wá nyɛ́n muan-ẅì hɔ̀n ɛkɔrɛ̀ y'ɛmìan lɔ mɛ̀n, ô nyɛ́n nyrì ẅɛn nɛ̀nnyàn-bɔ̀ ɛnvra lɔ fɛn.

¹⁴ Nyɛ́n sán Ɔwɔ-shifù nyɛ́n tán anwrɔn hɔ̀n léyi kɛ hán nyɛ̀n nyɛ kán ɛgbàn nɔn; nyɛ́n dɔ́ Ɔwɔ kè fú yɔ ɛnshi, kè sɩ̀ dù hɩ le n'a dá yɔ ɛẅiɛ̀ nɔn.

¹⁵ Nyɛ́n brá pɔpüɛ̀ nyɛ́n mán anwrɔn hɔ̀n léyi dú pɔpüɛ̀ mɛ̀n nɔn, nyɛ́n wú eyú nyɛ́n mán anwrɔn hɔ̀n léyi ke wú eyú nɔn mɛhi.

¹⁶ Ny'ɛwúvà kè dú ɔmùan-krɔn mɛ̀n nyɛ́n mán nyɛ́n nyran hɔ̀n mɛhi. Nyɛ́n bɩ́ ji nmù-ci ɛvrivri hán, tɛ́n nyɛ́n cüɛn eci-hán léyi vɛ́n nyɛ̀n nɔn. Nyɛ́n bɩ́ bɩ́ ny'edomɛ̀n nyɛ́n hán ankà-nyri-bɔ̀.

¹⁷ Nyɛ́n bɩ́ bɩ́ ɛgbàn zriɛmɛ́n nyɛ́n di ɛgbàn-wɔ̀ɛn. Nyɛ́n hán kekremɛ̀n, ô nyɛ́n hán anvrɛn anwrɔn lɔ fɛn zìwú.

¹⁸ Ke dú kɛ kɛ lɛ krɔn tɛ̀, kɩ ndɔ lɔ kɛ crɛnyan nyɛ́n kɩ, nyɛ́n dú anwɔwɔ mɛ̀n nyɛ́n mán anwrɔnẅì lɔ fɛn mɛhi.

¹⁹ Annyran-anvrɛn-hɔ̀n, nyɛ́n bɩ́ hán ny'edomɛ̀n ɛwɔrɛ̀-tán-ci, tɛ́n nyɛ́n teze Ɔwɔ mɛ̀nhyì ke ci nyɛ̀n ɛmrɛ̀n, ɔmuhi Owrú kɛ dɔ̀ le: “Mɛ̀n de mɛ̀n dú ɛwɔrɛ̀-tán-wrɔn nɔn, mɛ̀n de me le di ɛwɔrɛ̀-tán-wɔ̀ɛn nɔn”, ɔmu de Ɛẅɛnwrɔn kɛ dɔ̀ nɔn.

²⁰ Kɩ ndɔ lɔ mán: “Ke dú kɛ v'egbri-wrɔn ɔmùanwù kɛ ẅɛ̀n hô, ɛ̀ tán nɛ̀n ɛci nɛ̀n zî; ke dú kɛ ɛnshi-mùanwù kɛ ẅɛn nɛ̀n, ɛ̀ tán nɛ̀n ɛnshi nɛ̀n mì; ɔmuhi, ɛ hán ɔmu lɔ hô, ndɔ lɔ ke le dù kɛ lɛ hán ɛnhyà-ẅì léyi e le ku nɛ̀n ɛnkru wanzi nɔn hɔ́.”

²¹ E bɩ́ tán ɛgbàn kɛ kɔ́n ká mɛ́n. Tɛ́n è dú ɛgbàn kɔ̀nkámɛ̀n anvrɛn-hán mɛ̀n.