Rɔmɛ̀n-anmàn-bɔ̀ 10 - Ɛmɛẅi ankà ankrànkràn 2003

¹ Anwrɔn-nɛ́n-muan-ẅì hɔ̀n, eci léyi m'ɛnbɔrɛ ke zeze kɛ cüɛ̀n nɔn, dú hɩ le mɛ lɛ sán Ɔwɔ ô Zhüifɛ̀n-bɔ̀ kɛ cɔ́ ebɩ̀die nɔn.

² Annanwɔrɛ mɛ̀n lɔ, me le di yɔ dalɛfue tɛ̀ le, edùyì yɩ́ y'ɛnbɔrɛ lɔ Ɔwɔ kɔ̀hɔ̀n-hán mɛ̀n, tɛ́n y'edùyì lɔ kè sɩ̀ dù ankà-nyrì yri-kàn mɛ̀n.

³ Annanwɔrɛ mɛ̀n lɔ, yɔ sɩ̀ nyrì ɔmu le Ɔwɔ kɛ srɔ anwrɔnẅì ɛnyrɔnnan-bɔ̀ n'ezìwú, kɩ yɔ ji, ô yɔ wá yɔ mumù eci léyi kɛ lɛ srɔ yɔ ɛnyrɔnnan-bɔ̀ nɔn. Ɔmu lɔ de yɔ sɩ̀ sɩ̀ y'edomɛ̀n ɛnhi ɛnkru-kɔrɛ̀-nyànmàn léyi Ɔwɔ tán nɔn zìwú.

⁴ Ɔmuhi Krisì nyrɔn Mohizì nyànmàn lɔ hàn kɩ cɔ́ ɛnkru, ô anwrɔn hɔ̀n léyi ẅɛn ankaẅì-bùtan nɔn, kɛ̀ srɔ ɛnyrɔnnan-bɔ̀ Ɔwɔ zìwú.

Ɛnkrukɔrɛ̀ dú ɔwrɔn totɔtɔ̀n léyi ẅɛn ankaẅì-bùtan Ɛẅɛnwrɔn mɛ̀n nɔn tɛn

⁵ Nyàn ankà léyi Mohizì merɛ́n owrúemɛ̀n hɩ kɛ tán ɛkɔrɛ̀-levri yɛ srɔ ɛyrɔnnan-wrɔn ɛnyànmàn ẅɛn mɛ̀n nɔn: “Ɔwrɔn léyi kɛ ẅɛn Ɔwɔ nyànmàn hɔ̀n lɔ kɛ hɛ́n nɔn, kɛ lɛ cɔ́ ɔkɔrɛ̀ y'ɛmɛ̀n.”

⁶ Tɛ́n nyàn ɔmu le yɛ hán yɛ dɔ́ ɛnyrɔnnan-wrɔn-srɔ ankà ankaẅì-bùtan-ẅɛn mɛ̀n nɔn: “E bɩ́ dɔ́ v'ɛnbɔrɛ mɛ̀n le: Antɔnwrɔn kɛ lɛ hɔ́n anhobɩ́ɛ?” (ô kɛ̀ hán Krisì kɛ̀ kakɛ).

⁷ E bɩ́ dɔ́ ndɔ lɔ mán: “Antɔnwrɔn de kɛ lɛ kakɛ ɛnhibù wú anhɛ̀ nɛ́n?” (ô kɛ̀ hán Krisì kè dú owú-bɔ̀ mɛ̀n kɛ̀ srɔ).

⁸ Zɛtɛn ankà tán yɛ dɔ̀a? Ankà ndɔ lɔ: “Ankà-dɔ̀ nyɔn mɛ́n ɛtɛ̀sɛ̀n, v'anmùan mɛ̀n mán v'ɛnbɔrɛ mɛ̀n.” Ankà-dɔ̀ ndɔ lɔ dú ankaẅì-bùtan mɛẅi ankà léyi bɔ́ dɔ̀ nɔn.

⁹ Ke dú kɛ, e ci v'anmùan mɛ̀n, ɛ dɔ́ anwrɔn lɔ fɛn zìwú le Zhezü dú Ɛẅɛnwrɔn kɩ v'ɛnborɛ mumù lɔ fɛn mɛ̀n, ɛ ẅɛn ankaẅì-bùtan le Ɔwɔ bɩ́ Zhezü owú-bɔ̀ mɛ̀n vá ɛkɔrɛ-bɔ̀ mɛ̀n hô, ɛ lɛ cɔ́ ebɩ̀die.

¹⁰ Annanwɔrɛ mɛ̀n lɔ, ɛnbɔrɛ mɛ̀n de ankaẅì-bùtan ke dù kɛ srɔ, kɩ ɔwrɔn léyi kɛ ẅɛn ankaẅì-bùtan nɔn, Ɔwɔ kɛ srɔ nɛ̀n ɛnyrɔnnan-wrɔn; anmùan mɛ̀n de yɛ dɔ́ ankaẅì-bùtan ankà nɔn, kɩ Ɔwɔ kɛ tán ɔwrɔn léyi kɛ dɔ́ ankaẅì-bùtan ankà nɔn, ebɩ̀die.

¹¹ Annanwɔrɛ mɛ̀n lɔ, Owrú kɛ dɔ̀ le: “Ɔwrɔn totɔtɔ̀n léyi kɛ ẅɛn ankaẅì-bùtan n'ɛwú nɔn, ke sɩ̀ cɔ́ anvɛvrà.”

¹² Ɔmu lɔ de Zhüifɛ̀n-bɔ̀ mán anwrɔn hɔ̀n léyi kè sɩ̀ dù Zhüifɛ̀n-bɔ̀ nɔn, angranmɛ̀n kè sɩ̀ vɛ́n yɔ: yɔ lɔ fɛn yɔ ẅɛn Ɛẅɛnwrɔn zri léyi kɛ tán yɔ, ɛnvra léyi yɔ bi nɛ̀n nɔn, n'ɛci anvrɛnvrɛn hɔ̀n lɔ.

¹³ Annanwɔrɛ mɛ̀n lɔ, yɛ dɔ̀ le: “Ɔwrɔn totɔtɔ̀n léyi ke le bi Ɛẅɛnwrɔn nɔn, kɛ lɛ cɔ́ ebɩ̀die.”

¹⁴ Tɛ́n anwɔntan de yɔ lɛ hán yɔ bi nɛ̀n ke dú kɛ yɔ sɩ̀ ẅɛ̀n ankaẅì-bùtan n'ɛwú nɛ́n? Kɩ anwɔntan de yɔ le bú n'ankà yɔ tán ankaẅì ke dú kɛ yɔ sɩ̀ yà yɛ dɔ̀ n'ankà nɛ́n? Kɩ anwɔntan de yɔ lɛ hán yɔ yá ke dú kɛ ɔwrɔn zriɛmɛ́n kè sɩ̀ dɔ́ n'ankà nɛ́n?

¹⁵ Kɩ anwɔntan de yɔ lɛ hán yɔ dɔ́ n'ankà ke dú kɛ ye sɩ̀ wá anwrɔn ɔkɔ̀hɔ̀n n'ankà-dɔ́ mɛ̀n nɛ́n? Hán ɔmu le Owrú kɛ dɔ̀ nɔn: “Ɛnfì zrɔ, ɛnvra léyi yɛ kán ɛmɛẅi ankà ankrànkràn dɔ́-bɔ̀ kɛ và nɔn!”

¹⁶ Tɛ́n yɔ lɛ fɛn yɔ sɩ̀ bɩ́ Ɛmɛẅi ankà Ankrankran lɔ. Annanwɔrɛ mɛ̀n lɔ Ezàhi kɛ dɔ̀ le: “Ɛẅɛnwrɔn, antɔnwrɔn de bú Ɛmɛẅi ankà Ankrankran léyi bɔ́ dɔ̀ nɔn, n'ankà tán ankaẅì nɛ́n?”

¹⁷ Ɔmu lɔ de, ankaẅì-bùtan kɛ và ɛnvra léyi ye die ɛmɛẅi ankà-dɔ̀ nukùɛ, kɩ ɛmɛẅi ankà ndɔ lɔ dú Krisì ankà-dɔ̀.

¹⁸ Zɛtɛn me yrɛ le: Zhüifɛ̀n-bɔ̀ kè sɩ̀ yà ɛmɛẅi ankà ndɔ lɔa? Hɛ̀ɛ̀, yɔ yá ɛmɛẅi ankà lɔ! Owrú kɛ dɔ̀ le: “Yɛ yá y'esùva lɔ ɛnhi mumù lɔ fɛn wú, kɩ y'ankà-dɔ̀ cɔ́ ɛnhibù kru trɔ.”

¹⁹ Me vru me yrɛ le: Izraɛlɛ̀n fɛcüè kè sɩ̀ gɔ̀ nyrìɛn? Zɛtɛn, nyàn n'ɛwú ankà léyi Mohizì kɛ tán nɔn: “Ɔwɔ kɛ dɔ̀ le, mɛ lɛ hán nyɛ̀n nye le dú ɛcüì-hi-kɔ́n mɛ̀n, nyɛ́n mán ɛnhi wú anmàn léyi kè sɩ̀ dù m'ɛnhi wú anmàn annanwɔrɛ nɔn m'ɛkruhú, mɛ lɛ hán nyɛ̀n nye le bɩ́ ɛmɛ̀nhyì ku ɛnhi wú anmàn léyi kè sɩ̀ ẅɛ̀n ɛnkruemɛ̀n nɔn wú.”

²⁰ Ezàhi kɛ sɔ́n ɛkɔrɛ̀ angbà kɛ dɔ̀ le: “Ɔwɔ kɛ dɔ̀ le, anwrɔn hɔ̀n léyi kè sɩ̀ dù m'ejiemɛ̀n nɔn de cɔ́ mɛ̀n nɔn, mɛ̀n bɩ́ m'edomɛ̀n mɛ̀n yé anwrɔn hɔ̀n léyi kè sɩ̀ sán mɛ̀n eci zriɛmɛ́n nɔn.”

²¹ Tɛ́n Izraɛlɛ̀n ankà-dɔ́ mɛ̀n lɔ, nɛ dɔ̀ le: “Ɛcɛ̀n mumù lɔ fɛn mɛ̀n trɛ́n ankɔrɛ̀ mɛ̀n tán fɛcüè tɔ̀n léyi dú wawa mán ɛnkru-shishi-ci-hán mɛ̀n nɔn.”