Ɔwɔ-mɛ̀n-yrikàn 9 - Ɛmɛẅi ankà ankrànkràn 2003

¹ Zɛtɛn ɛnríemɛ̀n Wɔ-kùyüre-wrɔn mú ɛbrɛ̀n. Mɛ̀n kán ɔkùcànkrò tɔ̀n dú anhobɩ́ bore ɛnhi wú; yɛ tán nɛ̀n ovru léyi n'ɛvrɛn kè sɩ̀ ẅɛ̀n ɛnkrutrɔ nɔn nɛ́n safɛ̀.

² Okùcànkro lɔ srú ovru lɔ ɔmùan kɩ ɛnhyàbrì tɔ̀n dú nɛ̀n ɛmɛ̀n srɔ hán ɛnhyà gbú hyàbri hɔ́. Ɛnhyàbri ndɔ lɔ hán ɛnbri mán ɛndɔ̀nwrɔ̀n srɔ anhyɔwɔ.

³ Cɛncecrèva hɔ̀n dú ɛnhyàbri ndɔ lɔ mɛ̀n srɔ ɛntrɛ kɩ bonyi ɛnhi wú; yɛ tán yɔ ɛkɔrɛ̀srɔn tɔ̀n ndú cá ɛkrá hɔ̀n tɛn lɔ hɔ́.

⁴ Yɛ wá tán yɔ ye bɩ́ jrɛ́ ɛfi mán, antɛ̀ mán, antɛẅì nyàntɛn mán, tɛ́n yɔ crɛ́ ezì yɔ kɛ́n anwrɔn hɔ̀n léyi ye sɩ̀ dì Ɔwɔ nrɛ̀n ezì-wú nɔn.

⁵ Ye sɩ̀ tàn yɔ ɛkɔrɛ̀levri yɔ wrì anwrɔn ndɔ hɔ̀n lɔ, tɛ́n yɔ hán yɔ, yɔ di ejüe okù ɛnrì. Ɛgbànkàn léyi dú nɛ̀n ɛmɛ̀n nɔn dú cá ɛkrá léyi kɛ kɛ́n ɛnnyî nɔn.

⁶ Okù ɛnrì lɔ mɛ̀n, anwrɔnẅì ke le ji owù, tɛ́n yɔ sɩ̀ wù; yɔ lɛ ji owú-yri, tɛ́n owù kɛ lɛ srɛ́ tèze yɔ.

⁷ Cɛncecrèva ndɔ hɔ̀n lɔ kɛ cá kpàngɔ hɔ̀n léyi krɔn kpehɛ́n kɛ̀ hɔ̀n kɛ kɔ́n anhà; y'ɛnkru hɔ̀n lɔ wú, eci dù hán ansíkɛ krusɔn-ci, kɩ y'ezì hɔ̀n lɔ cá anwrɔnẅì zì.

⁸ Yɔ ẅɛn ɛnkruẅie cá wúyɔ̀ hɔ̀n kruẅie hɔ́, kɩ y'ɛnnyî hɔ̀n dú cá gɔ̀ngɔ̀sɔvɛ̀ hɔ̀n nyî hɔ́.

⁹ Y'angbà lɔ kɛ cá eci léyi pritù ceci vá ɛwú nɔn, kɩ y'ɛtùvàkɔrɛ̀ hɔ̀n kù-dì lɔ, kɛ cá anhà-kɔ́n-hɛ̀ hɔ̀n léyi kpàngɔ hɔ̀n kɛ bɩ́ srɛ́ ku anhà kɔ́n kɔ̀ mɛ̀n nɔn, y'ɛnkù-dì hɔ́.

¹⁰ Yɔ ẅɛn frɛnfrɛn dú y'ɔẅiè hɔ̀n lɔ mɛ̀n hán ɛkrá hɔ̀n tɛn lɔ hɔ́, kɩ y'ɔẅiè hɔ̀n lɔ mɛ̀n de yɔ ẅɛn ɛkɔrɛ̀srɔn ô yɔ hán anwrɔnẅì kɛ kán ɛgbàn okù ɛnrì nɔn.

¹¹ Yɔ ẅɛn ɛnnɛncüì tɔ̀n ndù, nɛ́n de nɛ̀n dú ɛnnànmàn léyi n'ɛvrɛn kè sɩ̀ ẅɛ̀n ɛnkrutrɔ nɔn n'ɛnnan-wrɔn. Ye bi nɛ̀n ebre mɛ̀n, “Abàdɔn”, kɩ grɛkɛ̀n mɛ̀n “Apoliɔn”, n'ɛmɛ̀n kɛ dɔ̀ le “Eci-jrɛ́-wrɔn vri”.

¹² Ɛnvrakpà muzhie lɔ vacì; ndɔ lɔ mɛẅi lɔ, muzhie anhyrɛ̀ vrú dù kɛ lɛ và.

¹³ Zɛtɛn Ɔwolemɛ̀n Wɔ-kùyüre-wrɔn lɔ mú ɛbrɛ̀n. Mɛ̀n yá esùva tɔ̀n dú ansikɛ-wɔ-cice-tɛbrɛ̀ léyi hɛ́n Ɔwɔ zìwú nɔn, n'ɛnkru d'anzɔ̀ lɔ wú nvà.

¹⁴ Esùva lɔ kɛ dɔ́ ɔwolemɛ̀n Wɔ-kùyüre-wrɔn léyi ɛbrɛ̀n dú antamɛ̀n nɔn le: “È teze Ɔwɔ-kùyüre-bɔ̀ anzɔ̀ léyi dú gbràka mɛ̀n nyɔn mancüè vri Efratɛ̀n tɛ̀sɛ̀n nɔn kɛ̀ hɔ̀n.”

¹⁵ Ye tecüe Ɔwɔ-kùyüre-bɔ̀ anzɔ̀ lɔ; wacɛ̀n ndɔ lɔ mɛ̀n, ɛnbì ndɔ lɔ, okù ndɔ lɔ mɛ̀n mán ɛnnanwàn ndɔ lɔ mɛ̀n cehɛ́n de yɛ wá tán yɔ, yɔ hán anwrɔnẅì, y'anhɔ́nmɛ̀n cá kè wù.

¹⁶ Ye yé mɛ̀n gɔliɛ-bɔ̀ mùan léyi yɔ ẅɛ̀n kɛ nyɔn kpàngɔ wúɛ nɔn: yɔ dú anwrɔn tɛ̀buri kru ɛkoẅi ɛvà dɛ̀n ɛvà.

¹⁷ Kɩ nyàn ɔmu le m'Ɔwɔ-mɛ̀n-yrikàn mɛ̀n lɔ, kpàngɔ mán y'ɛwú-yɛ́-bɔ̀ mɛhi srɔ mɛ̀n ezìwú nɔn: yɔ ẅɛn pritù ceci wɔnsɛn hán ɛnhyà hɔ́, gàlɛ̀, hán anhàn shishi bù hɔ́ kɩ dú ɛwosu-vàà hán ɛnhyà-dɔ̀nwrɔ̀n hɔ́. Kpàngɔ kru hɔ̀n lɔ kɛ cá gɔ̀ngɔ̀sɔvɛ̀ hɔ̀n kru hɔ́; y'ɔmùan lɔ mɛ̀n, ɛnhyà, ɛnhyàbri mán ɛnhyà-dɔ̀nwrɔ̀n ke dù kɛ srɔ ɛntrɛ.

¹⁸ Ɛgbàn-hán-ci anhɔ̀n ndɔ hɔ̀n lɔ wrí anwrɔnẅì y'anhɔnmɛ̀n cá: ɛnhyà, ɛnhyàbri mán ɛnhyà-dɔ̀nwrɔ̀n léyi ke dú kpàngɔ hɔ̀n lɔ anmùan mɛ̀n kɛ srɔ ɛntrɛ nɔn mɛ̀n.

¹⁹ Ɔmuhi kpàngɔ hɔ̀n korɛ̀srɔn lɔ dú y'anmùan mɛ̀n mán y'ɛẅiè hɔ̀n lɔ mɛ̀n. Annanwɔrɛ mɛ̀n lɔ y'ɛẅiè hɔ̀n lɔ kɛ cá ɛnlɛ̀brì; yɔ di ɛnkru, hɩ de yɔ bɩ yɔ hán anwrɔnẅì anbɔrɛ-ci nɔn.

²⁰ Anwrɔnẅì léyi wɔrɔ dú ɛnhibù wú nɔn, yɔ lɔ fɛn léyi ɛgbán-hán-ci ndɔ hɔ̀n lɔ, kè sɩ̀ wrì yɔ nɔn, yɔ sɩ̀ crɛ̀ ejüì yɔ sɔ̀n antɛ̀buri-wɔ léyi yɔ dùku yɔ bɩ́ y'ɛmàn, yɔ hán nɔn; yɔ dú anwa-bɔ̀ sɛ́n mɛ̀n mán ansíkɛ, ɔkùa, pritù, obù mán antɛ̀buri hɔ̀n léyi ke sɩ́ kán ɛyri rɔ́a, ke sɩ́ yá ankà rɔ́a, ke sɩ́ nán esù rɔ́a nɔn, y'ɛsɛ́n mɛ̀n.

²¹ Yɔ sɩ̀ tezɛ̀ y'anwrɔn wrì ankà, yɔ seke kɔ̀hɔ̀n-hán, y'esùnan gbàngbàn ci-hán mán y'ɛci-yerɛ kɔ̀hɔ̀n-hán.