Ɔwɔ-mɛ̀n-yrikàn 8 - Ɛmɛẅi ankà ankrànkràn 2003

Ɔbɔ́ɛnmɛ̀n ci-tɔ́n-ci

¹ Ɛnvra léyi Ɔwɔ Kɔ̀kɔ̀sɛ̀-ẅì boyɛ ɔbɔ́ɛn mɛ̀n ci-tɔ́n-ci lɔ nɔn, ɔmùan kɛ́nhɛ́n anhobɩ́, di wacɛ̀n cá.

² Zɛtɛn mɛ̀n kán Ɔwɔ-kùyüre-bɔ̀ ɔbɔ̀ɛn lɔ nyɔn Ɔwɔ zìwú; yɛ tán yɔ anbrɛ̀n ɔbɔ̀ɛn.

³ Ɔwɔ-kùyüre-wrɔn nyàntɛn tɔ̀n vá nyɔn Ɔwɔ-cice-tɛbrɛ̀ tɛ̀sɛ̀n; ansíkɛ kpokpo léyi yɛ biɛ ɛci bánbán ɛwú nɔn, ɔtɔ̀n dú nɛ̀n antamɛ̀n. Yɛ tán nɛ̀n anjɔsàn bobrebe ô nɛ̀n ce eci ansikɛ tɛbrɛ̀ léyi hɛ́n ɛgbú-tòbù zìwú nɔn n'ɛwú, hɩ mán Ɔwɔ-fecüè-bɔ̀ Wɔ-sɛ̀n mɛhi.

⁴ Anjɔsàn yàbri dú Ɔwɔ-kùyüre-wrɔn ɛmànmɛ̀n kɛ hɔ́n ɛwú, Ɔwɔ zìwú, hɩ mán Ɔwɔ-fɛcüè-bɔ̀ Wɔ-sɛ̀n mɛhi.

⁵ Zɛtɛn Ɔwɔ-kùyüre-wrɔn lɔ bɩ́ kpokpo léyi yɛ bíɛ ɛci banban ɛwú nɔn, ku Ɔwɔ-cice-tɛbrɛ̀ hyà lɔ ɛmɛ̀n ɛnhyì kɩ kɔ́nze ɛnhi wú. Ɛnvra zri lɔ ɛwú di nkù bobrebe, esùva bobo ke shrì, ɛwú hyà hɔ̀n kɛ gbrɛ́n kɩ ɛnhi jɔkɔ̀.

Anbrɛ̀n-gbá hɔ̀n

⁶ Zɛtɛn Ɔwɔ-kùyüre-bɔ̀ léyi ẅɛn anbrɛ́n-gbá ɔbɔ̀ɛn lɔ nɔn, kɛ wá y'edomɛ̀n esùva, ô kè mú anbrɛ̀n.

⁷ Kpàkpà Wɔ-kùyüre-wrɔn lɔ mú ɛbrɛ̀n. Ɛnshiẅian mán ɛnhyà gbro ɛnkrɛ̀ mɛ̀n dú ɛwú cüe ɛnhiɛ. Ɛnhi, n'anhɔnmɛ̀n cá mán antɛ̀, y'anhɔnmɛ̀n cá wrú ɛnhyà, ɔmu zri lɔ de dú tán ɛfi wɔ̀ lɔ fɛn mán nɔn.

⁸ Zɛtɛ̀n anhyrɛmɛ̀n Wɔ-kùyüre-wrɔn lɔ mú ɛbrɛ̀n. Eci mù tɔ̀n cá ɛnkpò vri tɔ̀n léyi ke wrù, eci mù ndɔ lɔ, yɛ kɔ́n nɛ̀n di ecüe mɛ̀n. Ecüe, n'anhɔnmɛ̀n cá srɔ ɛnkrɛ̀.

⁹ Ɛci-kɔrɛkɔrɛ hɔ̀n lɔ fɛn léyi Ɔwɔ hán dú ecüemɛ̀n nɔn, y'anhɔnmɛ̀n cá nwù kɩ ɛnhyà-bri-hɛ̀ hɔ̀n lɔ fɛn y'anhɔ́nmɛ̀n cá jrɛ́.

¹⁰ Zɛtɛn anhɔ́n mɛ̀n Wɔ-kùyüre-wrɔn lɔ mú ɛbrɛ̀n. Okùcànkrò vrí tɔ̀n léyi ke wrù kɛ hán ɛnhyà lakà tɔ̀n hɔ́ nɔn, dú anhobɩ́ bore. Okùcànkro lɔ bore mancüè hɔ̀n lɔ y'anhɔnmɛ̀n cá mɛ̀n mán ɛnshi-bɛ́ hɔ̀n wú.

¹¹ (Okùcànkrò ndɔ lɔ n'ebi dú eci-drɔ́.) Ɛnshi hɔ̀n lɔ y'anhɔ́nmɛ̀n cá srɔ eci drɔ́ kɩ anwrɔn bobrebe léyi mi ɛnshí hɔ̀n lɔ nɔn, yɔ wù, ɔmuhi ɛnshi hɔ̀n lɔ owù-shi dú yɔ ɛmɛ̀n nɔn.

¹² Zɛtɛn anzɔmɛ̀n Wɔ-kùyüre-wrɔn lɔ mú ɛbrɛ̀n. Ɛnbri, n'anhɔnmɛ̀n cá ezì murɛn, ɔmu zri lɔ de dú tán okù mán okùcànkrò hɔ̀n, hán tán kɩ y'ɛgbrɛ́n lɔ srɔ anhɔnmɛ̀n cá; ɛcɛ̀n, n'anhɔnmɛ̀n cá mán ɛnnyran n'anhɔnmɛ̀n cá ke sɩ̀ ẅɛ̀n ɛyrikàn.

¹³ Mɛ̀n vru mɛ̀n nyan, kɩ mɛ̀n yá gbohò tɔ̀n ɔmùan dú ɛwú hɛ hɛ́n ke tú kɩ kɛ dɔ́ esùva cüìcüì tɔ̀n mɛ̀n le: “Mùzhie! Mùzhie! Mùzhie dú ɛnhi-wú-bɔ̀ tɛn, ɛnvra léyi Ɔwɔ-kùyüre-bɔ̀ anhɔ̀n léyi worɔ nɔn, ke le mú y'anbrɛ̀n hɔ̀n lɔ nɔn!”